შიბა ინუ აკიტას მინიატურულ ვერსიას მოგაგონებთ. აქტიური, მეგობრული და ფხიზელი შიბა დამოუკიდებელი მოაზროვნეა. მოწყენილობის თავიდან ასაცილებლად მას რეგულარული ვარჯიში და გონებრივი სტიმულაცია ესაჭიროება. არასათანადო ფიზიკური აქტივობის შემთხვევაში, შესაძლოა მას პრობლემური ქცევაც (მაგ., გადაჭარბებული ღეჭვა) კი განუვითარდეს. 

მონადირული ინსტინქტებისა და სიმამაცის გამო, შიბასთან ერთად ლაშქრობა ნამდვილი თავგადასავალია. თუმცა, ვინაიდან, ცნობისმოყვარეობა ოჯახის ამ მნიშვნელოვან წევრს ხშირად ახალი ადგილების აღმოჩენისკენ უბიძგებს, მისი საბმელის გარეშე დამგზავრება სარისკო გადაწყვეტილებაა. 

მუხლის ქუდის დისლოკაცია

მუხლის ქუდის დისლოკაციით გამოწვეული დისკომფორტის თავიდან ასაცილებლად რეგულარული ვარჯიში და ჯანსაღი წონის შენარჩუნებაა საჭირო. მაღალი ხარისხის ცილის, კალციუმისა და ფოსფორის დაბალანსებულად მიღება თქვენი ოჯახის მნიშვნელოვან წევრს კუნთების სწორად განვითარებაში დაეხმარება. 

მუხლის ქუდის დისლოკაციასთან დაკავშირებული მძიმე შემთხვევების გამოსასწორებლად შესაძლოა მაკორექტირებელი ოპერაციაც გახდეს საჭირო. თუმცა, რეგულარული ვეტერინარული შემოწმებები ამ პრობლემის ადრეულ ნიშნებს აღმოაჩენს და შესაბამისი ზომების მიღების შესაძლებლობას დაავადების განვითარების ადრეულ ეტაპზე მოგცემთ.

გლაუკომა 

გლაუკომა თვალშიგა წნევის ზრდას და მხედველობის ნერვის დაზიანებას იწვევს. გლაუკომის განვითარების თავდაპირველ ეტაპზე კომპანიონი ცხოველების მხედველობა უმნიშვნელოდ უარესდება, თუმცა, დროთა განმავლობაში, შესაძლოა საქმე განუკურნებელ სიბრმავემდე მივიდეს.

მიუხედავად იმისა, რომ დაავადების პრევენცია რთულია, რეგულარული ვეტერინარული შემოწმება და თვალების ჯანმრთელობის დიაგნოსტიკა დაავადების ადრეულ ეტაპზე გამოვლენასა და მკურნალობის პროცესის ეფექტურად წარმართვაში მნიშვნელოვნად დაგეხმარებათ. 

ზრდასრული შიბა ინუსთვის რეკომენდირებული საკვები სასიცოცხლოდ აუცილებელ ყველა ძირითად საკვებ ნივთიერებას სათანადო ოდენობით უნდა შეიცავდეს. სრულად დაბალანსებული საკვები საჭმლის მომნელებელი სისტემის ეფექტურ ფუნქციონირებასთან ერთად,  ფეკალური მასისთვის დამახასიათებელი უსიამოვნო სუნის შემცირებასაც შეუწყობს ხელს. 

კვების პროცესში, ძაღლის ასაკის გათვალისწინება, ხარისხიანი საკვების შერჩევაზე არანაკლებ მნიშვნელოვანია. ზრდასრული ძაღლებისგან განსხვავებით, ლეკვებს განსხვავებული კვებითი საჭიროებები აქვთ. სწორედ ამიტომ, მათ სპეციალურად ლეკვებისთვის შექმნილი მაღალი ხარისხის საკვები ესაჭიროებათ. 

კვების გრაფიკის შედგენაში საკვების შეფუთვაზე დატანილი რეკომენდაციები დაგეხმარებათ. თუმცა, თუ თქვენი კომპანიონი ცხოველის ინდივიდუალური საჭიროებების გათვალისწინებით გსურთ გადაწყვეტილების მიღება, სასურველია დახმარებისთვის ნუტრიციოლოგს მიმართოთ. 

როგორც კომპეტენტურ მშობელს, გახსოვდეთ, რომ თქვენთვის საყვარელი საკვები შესაძლოა შიბა ინუსთვის მომწამვლელი აღმოჩნდეს. ამიტომ, მოერიდეთ მისთვის დამატებითი საკვების მიწოდებას და მაინც, თუ გულით მოისურვებთ თქვენი ოჯახის მნიშვნელოვან წევრთან საკვების გაზიარებას, უპირატესობა ისეთი უსაფრთხო ხილისა და ბოსტნეულის მცირე ნაჭრებს მიანიჭეთ, როგორიც  ვაშლი, ბანანი, კიტრი,  გოგრა, სტაფილო ან ბროკოლია. 

შიბა ინუ იაპონური კულტურის ნაწილად მე-7 საუკუნეში იქცა. აზიური წარმომავლობის ამ უძველესი ჯიშის სახელწოდება ადგილობრივებისთვის “პატარა ძაღლს” აღნიშნავს. თუმცა, ზომის მიუხედავად, ოჯახის ამ მნიშვნელოვან წევრებს ფრინველებთან ერთად დიდი ზომის ცხოველებზე სანადიროდაც (მაგ., გარეული ღორი) ხშირად იყენებდნენ. კულტურული მნიშვნელობისა და უნიკალური მახასიათებლების გამო, შიბა ინუ 1937 წელს გამოცხადდა იაპონიის ეროვნულ საგანძურად. 

მეორე მსოფლიო ომამდე შიბას სამი ტიპი არსებობდა: მინო, სანინი და შინშუ (შინშუ ყველაზე მეტად ჰგავს დღევანდელ შიბა ინუს). თუმცა, ომით გამოწვეულმა საკვების ნაკლებობამ და ომისშემდგომმა ჭირის ეპიდემიამ ჯიშის წარმომადგენელთა რაოდენობა კრიტიკულ ნიშნულამდე შეამცირა. ამის მიუხედავად, აქტიური კონსერვაციის წყალობით, შიბა ინუ სხვა იაპონურ ჯიშებთან შეწყვილების გზით იხსნეს გადაშენებისგან.