ზომა

იაპონური ბობტეილის სიმაღლე 20-23 სანტიმეტრს აღწევს, სიგრძე კი 33-38 სანტიმეტრის ფარგლებში მერყეობს.

წონა

ზრდასრული იაპონური ბობტეილი 2.7 კილოგრამიდან 5.4 კილოგრამამდე იწონის. ოჯახის ამ მნიშვნელოვანი წევრის წონა ყოველ ინდივიდუალურ შემთხვევაში გენეტიკის, დიეტისა და ჯანმრთელობის მდგომარეობის შესაბამისად იცვლება. 

სიცოცხლის ხანგრძლივობა

იაპონური ბობტეილის სიცოცხლის ხანგრძლივობა 9-დან 15 წლამდე მერყეობს. თუმცა, გახსოვდეთ, ეს ციფრები მხოლოდ პირობითია და თქვენი ოჯახის მნიშვნელოვანი წევრის სიცოცხლის ხანგრძლივობა მისი ცხოვრების ჯანსაღ წესსა და სტრესისგან თავისუფალ საცხოვრებელ გარემოზეა დამოკიდებული. რეგულარული ვეტერინარული შემოწმება და დაბალანსებული დიეტა მნიშვნელოვნად გააუმჯობესებს თქვენი კომპანიონი ცხოველის ცხოვრების ხარისხს.

ბეწვის საფარი

იაპონური ბობტეილის ბეწვი რბილი და აბრეშუმისებრია. ერთფეროვან ვიზუალთან ერთად, ჯიშისთვის მრავალფეროვან ფერთა კომბინაციებიც არის დამახასიათებელი.  იაპონური ბობტეილის კუდს, რომელიც გამორჩეულად მოკლეა, ხშირად სხეულის დანარჩენ ნაწილებთან შედარებით განსხვავებული ფერის ბეწვი ამშვენებს. ბობტეილის ამ მოკლებეწვიან ვერსიას დღეში მხოლოდ ერთხელ ესაჭიროება რბილი ჯაგრისით დავარცხნა. 

იაპონური ბობტეილი უნიკალური პიროვნებებითა და გამორჩეული ფიზიკური თვისებებით ხასიათდება. ამ კატებს მოკლე, პომ-პომის მსგავსი კუდები და გამომხატველი ნუშის ფორმის თვალები აქვთ. მაღალი ინტელექტითა და მხიარული ბუნებით ცნობილ იაპონურ ბობტეილებს ხშირად აღწერენ, როგორც ცნობისმოყვარე კომპანიონებს. მათ დამოუკიდებლობის ძლიერი გრძნობა აქვთ, თუმცა ოჯახის წევრების მიმართ სიყვარულის გამოხატვასაც არ ერიდებიან.

ეს კატები უაღრესად სოციალური არსებები არიან და სიამოვნებთ ადამიანებთან ურთიერთობა. ხშირად ითხოვენ ყურადღებას და ბავშვებთან ერთად სხვა შინაურ ცხოველებთან თამაშზეც არ ამბობენ უარს. იაპონური ბობტეილები ვოკალური ბუნებითაც გამოირჩევიან.

ცოცხალი ტემპერამენტის მქონე ეს მომხიბვლელი კატები ზედმეტად აქტიურები არიან იმისთვის, რომ დიდხანს დარჩნენ უძრავად. მაშინაც კი თუ ირგვლივ საინტერესო არაფერი ხდება, ახერხებენ, რომ მორიგი, მათთვის საინტერესო თავგადასავალი შექმნან. 

ხერხემლის დეფორმაცია

კუდის უჩვეულო ფორმამ შესაძლოა იაპონური ბობტეილის ხერხემლისა და მენჯის ძვლების განვითარებაზე იქონიოს გავლენა. ხერხემლის დეფორმაციის პროცესი ნელა და შეუმჩნევლად მიმდინარეობს. თუმცა, დეფორმაციის შორს წასულმა ფორმამ შესაძლოა გულმკერდის  არეში მდებარე ორგანოებზე ზეწოლა და სუნთქვის უკმარისობა გამოიწვიოს.

დაავადების დროული გამოვლენისა და მკურნალობის შემთხვევაში, საშიში არაფერია, თუმცა, თუ დროულად არ მიმართავთ ვეტერინარს, ხერხემლის ეს პრობლემა შესაძლოა სხვა დაავადებების გამომწვევ მიზეზად იქცეს. 

მხიარული ბუნებით გამორჩეულ იაპონურ ბობტეილს, ნაკლებად აქტიურ ჯიშებთან შედარებით, მეტი კალორიის მიღება ესაჭიროება. თუმცა, ჭარბი წონის თანმხლები ჯანმრთელობის პრობლემების თავიდან ასაცილებლად,  წონის მონიტორინგი განსაკუთრებით მნიშვნელოვანია. 

თანმიმდევრულობის შესანარჩუნებლად და ჭარბი კვების თავიდან ასაცილებლად, კვების გრაფიკის დადგენა გონივრული გადაწყვეტილებაა. მოერიდეთ თავისუფალ კვებას, რადგან ამან შესაძლოა სიმსუქნე და საჭმლის მომნელებელი სისტემის სხვა პრობლემები გამოიწვიოს. თქვენი ოჯახის მნიშვნელოვანი წევრის კვებისას, უპირატესობა მიანიჭეთ მაღალი ხარისხის კატის საკვებს, რომელიც სპეციალურად კომპანიონი ცხოველის ასაკის, აქტივობის დონისა და ჯანმრთელობის მდგომარეობის შესაბამისად არის შემუშავებული. 

თუ თქვენი იაპონური ბობტეილისთვის საკვების გაზიარებას გადაწყვეტთ, უპირატესობა ისეთ ჯანსაღ კერძებს მიანიჭეთ, როგორიც მოხარშული უცხიმო ხორცი, თევზის ფილე ან კატებისთვის უსაფრთხო ხილი და ბოსტნეულია. ამ საკითხთან დაკავშირებული დეტალური ინფორმაციის მიღებაში ნუტრიციოლოგი დაგეხმარებათ. 

დაბალანსებულ კვებასთან ერთად, დღის ნებისმიერ მონაკვეთში, მტკნარ წყალთან დაუბრკოლებელი წვდომა ჩვენი ოთხფეხა მეგობრის სათანადო ჰიდრატაციისთვის განსაკუთრებით მნიშვნელოვანია. ზოგიერთი კატა უპირატესობას გამდინარე წყალს ანიჭებს, ამიტომ სპეციალურად კატებისთვის შექმნილ შადრევანში ინვესტირებამ შესაძლოა წყლის სმის პროცესი კიდევ უფრო მეტად წაახალისოს. 

რეგულარულად დააკვირდით თქვენი კომპანიონი ცხოველის ქცევას და მადას. კვებასთან დაკავშირებული ჩვევების ცვლილება ან წონის უეცარი კლება/მატება შესაძლოა ჯანმრთელობის პრობლემებზე მიუთითებდეს. ამ ფაქტორების გულდასმით გათვალისწინებით და დაბალანსებული დიეტის უზრუნველყოფით, თქვენი ოჯახის მნიშვნელოვანი წევრი ხანგრძლივი და ბედნიერი ცხოვრებით იცხოვრებს.

იაპონური ბობტეილის ისტორია იაპონურ კულტურასთან არის მჭიდრო კავშირში. ჯიშს საუკუნეების მანძილზე სცემდნენ პატივს, როგორც წარმატებისა და კეთილდღეობის სიმბოლოს. ამ კომპანიონი ცხოველების წარმოშობის ზუსტი თარიღი გაურკვეველია, თუმცა, გავრცელებული მოსაზრების თანახმად, 1300 წელზე მეტია, რაც იაპონური ბობტეილები ჩვენს გვერდით ცხოვრობენ. 

ამ ჯიშის წარმომადგენლები ხშირად ფიგურირებდნენ ტრადიციულ იაპონურ ხელოვნებასა და ლიტერატურაში. იაპონური ფოლკლორი ბობტეილს ზებუნებრივ ძალებსაც კი მიაწერდა, რაც ჯიშის სტატუსს კიდევ უფრო მეტად ამყარებდა საზოგადოებაში. ამ ძვირფას კომპანიონ ცხოველებს ხშირად ჩუქნიდნენ ოჯახებს იღბლისა და კეთილდღეობის მოსატანად. 

ომის დროს მოსახლეობის შემცირებისა და სტიქიური უბედურებების მიუხედავად, თავდადებული სელექციონერები დაუღალავად მუშაობდნენ იაპონური ბობტეილის ჯიშის შესანარჩუნებასა და პოპულარიზაციაზე. სწორედ ამის დამსახურებაა, რომ ოჯახის ეს მნიშვნელოვანი წევრები დღესაც აგრძელებენ ადამიანების მოხიბვლას გამორჩეული გარეგნობით, მხიარული ქცევითა და მდიდარი კულტურული მემკვიდრეობით.