ბულდოგი გამორჩეული ჯიშია, რომელიც უნიკალური ფსიქოლოგიითა და პიროვნულობით ხასიათდება. ოჯახის ეს მნიშვნელოვანი წევრები ყოველ ნაბიჯზე ავლენენ თვისებების იმ მომხიბვლელ კომბინაციას, რომელიც მათ ადამიანების საყვარელ კომპანიონად აქცევს.

პიროვნული თვალსაზრისით, ბულდოგები ნაზი და მოსიყვარულე ბუნებით გამოირჩევიან. სოციალური ინტერაქციისთვის საჭირო უნარები მათ განვითარების ადრეული ეტაპიდან დაჰყვება და ადამიანებთან ძლიერი ემოციური კავშირის დამყარებაში ეხმარება. მათი სოციალური ბუნება ბავშვებთან და სხვა შინაურ ცხოველებთან ჯანსაღ ინტერაქციაზეც ვრცელდება და ყურადღებასთან ერთად ფიზიკური სიახლოვის საჭიროებაში გამოიხატება.

ბულდოგებს დაბალი ენერგიის მქონე ძაღლების რეპუტაცია აქვთ. ისინი ფიზიკურ აქტივობას დასვენებას ამჯობინებენ და ხანმოკლე გასეირნებითაც კმაყოფილდებიან. გარკვეულ გარემოებებში გამოვლენილი სიჯიუტის მიუხედავად, ბულდოგი ჭკვიანი ძაღლია, რომლის წვრთნა მოთმინებითა და პოზიტიური განმტკიცებითაა შესაძლებელი. ეს პიროვნული მახასიათებლები მათ ნაკლებად აქტიური ცხოვრების წესის მქონე ადამიანებისთვის ხდის შესაფერისს.

სუნთქვის პრობლემები

ბულდოგის ყველა ჯიში ბრაქიცეფალია, რაც იმას ნიშნავს, რომ ისინი მოკლე ცხვირითა და შევიწროებული ნესტოებით ხასიათდებიან. სწორედ ამიტომ, ჩვენი პატარა კომპანიონები სხეულის ტემპერატურის მატებასთან ერთად, სუნთქვის პრობლემებისა და ხვრინვისკენ არიან მიდრეკილი. მათი სუნთქვის პრობლემა წონის მატებასთან ერთად უარესდება. შესაბამისად, ჯანსაღი საკვების მიღებას და წონის მონიტორინგს პრობლემის პრევენციისთვის განსაკუთრებული მნიშვნელობა აქვს.

ბულდოგის კომპეტენტურმა მშობლებმა უნდა იცოდნენ ისიც, რომ ჩვენთვის ძვირფასი ეს კომპანიონი ცხოველები სითბური დარტყმებისადმი არიან მიდრეკილი. ბულდოგის დახურულ სივრცეში (ბინაში ან მანქანაში) დიდხანს დატოვება განსაკუთრებით სახიფათოა. დახუთულ გარემოში, სადაც ტემპერატურა მაღალია, ბულდოგებს სუნთქვა უძნელდებათ და კრუნჩხვითი შეტევები უვითარდებათ. მზის გულზე ან ყინვაში სეირნობისას, აგრეთვე, იოლად შეამჩნევთ, როგორ იწყებენ თქვენი პატარა მეგობრები ხვრინვას. ეს მათ ცხვირის ღრუში დიდი რაოდენობით ლორწოს დაგროვების გამო ხდება.

სახსრების დაავადება

ჩვენი პატარა მეგობრების უნიკალური აღნაგობის მიზეზი ძვლის ქსოვილის თანდაყოლილი დაავადებაა, რომელიც ძვლის ზრდის დარღვევასა და კიდურების საგძნობ დამოკლებას იწვევს. სახეობისთვის დამახასიათებელი ამ გენეტიკური დაავადებით გამოწვეული შემდგომი გართულებების თავიდან ასაცილებლად მარტივი და უტყუარი გზა დაბალანსებული კვება და ვარჯიშია. თქვენს ბულდოგზე მორგებული ინდივიდუალური კვების რაციონის შესაქმნელად საჭირო კვალიფიციური რჩევების მისაღებად, გირჩევთ კონსულტაცია ნუტრიციოლოგთან გაიაროთ. წვრთნასთან დაკავშირებული რეკომენდაციებისთვის კი გამოცდილ კინოლოგს შეგიძლიათ მიმართოთ.

ყურისა და კანის ინფექციები

ბულდოგებს, აგრეთვე, ხშირად აწუხებთ ყურისა და კანის ინფექციები, რომელთა გამომწვევი ძირითადი მიზეზი ალერგიული ფონი და სტრესია. შესაძლოა თქვენი ერთგული მეგობარი საკვების ან გარემო ალერგენების  (მტვერი და ობი) მიმართ იყოს მგრძნობიარე, თუმცა, ნებისმიერ შემთხვევაში, ალერგიით გამოწვეულ სიმპტომებს იოლად შეამჩნევთ. სიმპტომები კანის ქავილთან ერთად ბეწვის გადაჭარბებულ ცვენაშიც გამოიხატება.

კანის ინფექციებთან დაკავშირებული გართულებების თავიდან ასარიდებლად, სპეციალურად ოთხფეხა მეგობრებისთვის განკუთვნილი ჰიგიენური საშუალებების გამოყენებას გირჩევთ. აგრეთვე, შესაძლებლობის შემთხვევაში, სასურველია თქვენს პატარა კომპანიონს ალერგიული სინჯი გაუკეთოთ და მაქსიმალური სიზუსტით დაადგინოთ, თუ რომელ პროდუქტებზე აქვს მას ალერგია. ეს შესაძლებლობას მოგცემთ ულუფიდან ამოიღოთ ყველა ის ინგრედიენტი, რომელმაც კვებითი  ალერგიული რეაქცია შეიძლება გამოიწვიოს.

თვალის პრობლემები

თვალის სიმშრალე წყლის არასაკმარისი რაოდენობით მიღებამ შეიძლება გამოიწვიოს. ცრემლის წარმოქმნის სირთულე თვალის გაღიზიანებას და მხედველობასთან დაკავშირებულ პრობლემებს იწვევს. თვალის პრობლემების მაპროვოცირებელ გარემოებად ხშირად კლიმატი გვევლინება. მაგალითად, თუ ზაფხულის გატარებას თქვენს პატარა მეგობართან ერთად, ზღვისპირა ქალაქში დააპირებთ, სასურველია განსაკუთრებული სიფრთხილე გამოიჩინოთ და თქვენი კომპანიონი შეძლებისდაგვარად მოარიდოთ სიცხეს.

ბულდოგის თვალები, აგრეთვე, განსაკუთრებით მგრძნობიარეა მტვრიანი ადგილების მიმართ. ამიტომ, გირჩევთ, თქვენთვის ძვირფასი კომპანიონი ცხოველი ქარიან ადგილებთან ერთად, მშენებლობასა და რემონტსაც მოარიდოთ.

გთხოვთ, განსაკუთრებული სიფრთხილე გამოიჩინეთ თვალის დაავადებისთვის დამახასიათებელი ისეთი ადრეული სიმპტომების მიმართ, როგორიც სიწითლე და ცრემლდენაა. სასურველია ამ სიმპტომების გამოვლენისთანავე ესტუმროთ ვეტერინარს. როგორც კომპეტენტურმა მშობელმა, მნიშვნელოვანია გაითვალისწინოთ ისიც, რომ თვალებზე ყოველდღიურ ზრუნვას და სპეციალურად ძაღლებისთვის განკუთვნილი ჰიგიენური საშუალებებით მათ ყოველდღიურ წმენდას დაავადების პრევენციისთვის არსებითი მნიშვნელობა აქვს.

ბულდოგის ჯანმრთელობასთან დაკავშირებული სხვა პრობლემებიდან, აგრეთვე, აღსანიშნავია:

• მენჯის ძვლების დისპლაზია
• სიმსუქნისკენ მიდრეკილება
• მშობიარობის თანმხლები გართულებები
• კატარაქტა
• სხვადასხვა სახის დერმატიტი

როდესაც საქმე ჩვენი ოჯახის მნიშვნელოვან წევრებს ეხება, კომპეტენცია გააზრებული სიყვარულის მთავარი სიმბოლო ხდება. ამ იდეით შთაგონებულებს, გვსურს ბულდოგის კვებით საჭიროებებთან დაკავშირებული სწორი ცოდნა მოგაწოდოთ და გითხრათ, რომ, როგორც ლეკვობის, აგრეთვე, მოზარდობის პერიოდში მიღებული მაღალი ხარისხის, არამაღალკალორიული, ვიტამინებითა და მიკროელემენტებით მდიდარი საკვები თქვენს ერთგულ კომპანიონს ჯანმრთელობასთან დაკავშირებული პრობლემების თავიდან აცილებაში დაეხმარება. ბულდოგებს ცილებით, ცხიმებითა და ნახშირწყლებით მდიდარი საკვები ესაჭიროებათ. მათი ნუტრიციოლოგიური მოთხოვნილებების დასაკმაყოფილებლად სრულფასოვანი და დაბალანსებული კვებაა საჭირო.

მართალია, ბულდოგის საჭმლის მომნელებელი სისტემა მომეტებული მგრძნობელობით ხასიათდება, თუმცა, ამ ფაქტთან გამკლავებას იმ საკვების თავიდან არიდებით შეძლებთ, რომელთა ბულდოგებისთვის შეთავაზებაც არ არის რეკომენდირებული. ამ საკვები პროდუქტების ჩამონათვალში ბეკონი, შოკოლადი, ავოკადო, ყურძენი, ქიშმიში, სოკო და უმი კარტოფილი შედის. თუმცა, ეს სია მხოლოდ ამით არ შემოიფარგლება და არსებობს სხვა პროდუქტებიც, რომელთა მიღება კომპანიონი ცხოველებისთვის არ არის მიზანშეწონილი.

ჩვენი ოჯახის მნიშვნელოვანი წევრების კეთილდღეობას მისი იმუნური სისტემა განაპირობებს. იმუნური სისტემის გასაძლიერებლად, სასურველია დაბალანსებულ საკვებთან ერთად C ვიტამინის მიწოდებითაც შევუწყოთ ხელი ჩვენი ერთგული მეგობრის ჯანმრთელობას. C ვიტამინი ეფექტურად მოქმედებს სიცხით გამოწვეული სტრესის დროს, რაც განსაკუთრებით მნიშვნელოვანია ზაფხულის ცხელ დღეებში.  C ვიტამინის მსგავსად, A ვიტამინის მიღებაც გონივრული გადაწყვეტილებაა, იმ შემთხვევაში, თუ ოთხფეხა მეგობრის კანისა და ბეწვის სიჯანსაღის საგრძნობლად გაუმჯობესება გსურთ. ვიტამინოთერაპიის პერიოდული კურსი განსაკუთრებით სასარგებლო სეზონის ცვლილების დროსაა.

იმისთვის, რომ იყოთ კომპეტენტური მშობელი, სასურველია გაითვალისწინოთ ისიც, რომ სიმსუქნისა და ალერგიული რეაქციებისადმი მიდრეკილების გამო, ბულდოგის რაციონი გონივრულად უნდა იყოს შერჩეული. სწორედ ამიტომ, ცხოვრების თანამგზავრი კომპანიონი ცხოველის კვებასთან დაკავშირებული პერსონალური რჩევების მისაღებად და დაბალანსებული საკვები რაციონის შესადგენად, გირჩევთ, კონსულტაცია ნუტრიციოლოგთან გაიაროთ.

ბულდოგის ისტორია მე-13 საუკუნეში, დიდ ბრიტანეთში იწყება. უნიკალური პერსონალობით გამორჩეული ამ სახეობის შექმნას იმ დროისთვის პოპულარულ სანახაობას „ხარის სატყუარას“ უკავშირებენ. მაყურებლის გასართობად, ამ წარმოდგენაში ხარი ძაღლებს უპირისპირდებოდა. შესაბამისად, გასაკვირი არ იქნება თუ გეტყვით, რომ სპეციალურად ამ სანახაობისთვის შექმნილი ბულდოგები გასაოცარი სიმამაცით, ძლიერი ფიზიკური აღნაგობითა და ტკივილისადმი მდგრადობით ხასიათდებოდნენ.

1835 წელს ბრიტანეთის მთავრობამ ბულდოგებისა და ხარების დაპირისპირება კანონით აკრძალა, თუმცა პროცესმა არალეგალური ხასიათი შეიძინა და ჩვენთვის ძვირფასი კომპანიონი ცხოველების გამოყენება უკანონო ბრძოლისთვის დაიწყეს. მოგვიანებით, არალეგალური ბრძოლებისადმი ინტერესის დაკარგვამ ბულდოგი გადაშენების პირას მიიყვანა, თუმცა სახეობის თაყვანისმცემლებმა ის მებრძოლი ძაღლიდან ყველასთვის საყვარელ ერთგულ კომპანიონად გარდაქმნეს. შთამბეჭდავია, არა?

დღეს ბულდოგი ინგლისის ეროვნული სიმბოლოა. ვიზუალისა და თვისობრივი მახასიათებლების გამო, მას ხშირად ბრიტანეთის პრემიერ მინისტრს, უინსტონ ჩერჩილსაც კი ადარებენ.