ინგლისური კოკერ სპანიელები მხიარული და მოსიყვარულე ბუნებით არიან ცნობილი. საყვარელი პიროვნებისა და შეუდარებელი გარეგნობის გამო, მათ მთელი მსოფლიოს მასშტაბით ჰყავთ თაყვანისმცემლები. ოჯახის ეს მნიშვნელოვანი წევრები სოციალური არსებები არიან და ადამიანთა კომპანიაში ყოფნა განსაკუთრებით სიამოვნებთ. მეგობრული ტემპერამენტის გამო, ისინი შესანიშნავად ეგუებიან ბავშვებს და სხვა შინაურ ცხოველებთან ერთად ცხოვრებაზეც არ ამბობენ უარს.

ინგლისური კოკერ სპანიელის გონიერება საგრძნობლად ამარტივებს მისი წვრთნის პროცესს. ირლანდიური სეტერის მსგავსად, თანდაყოლილი ცნობისმოყვარეობა და სახალისო აქტივობებისადმი ინტერესი, მისი, როგორც მონადირე ძაღლის გენეტიკურ მემკვიდრეობას უსვამს ხაზს. 

ოჯახის ამ მნიშვნელოვან წევრებს უსაზღვრო ენერგია აქვთ და გვერდით ისეთი ადამიანი ესაჭიროებათ, რომელიც მათ საჭიროებებს პირნათლად დააკმაყოფილებს. ფიზიკური და გონებრივი კეთილდღეობისთვის, ისინი ყოველდღიურ ვარჯიშს საჭიროებს. იქნება ეს ლაშქრობა, სეირნობა თუ სირბილი,  კოკერ სპანიელისთვის მთავარი თქვენთან ერთად გატარებული დრო და ამ პროცესთან დაკავშირებული ემოციებით ტკბობაა. 

გაითვალისწინეთ, რომ კოკერ სპანიელს მგრძნობიარე ბუნება აქვს და ვარჯიშის დროს მხოლოდ პოზიტიურ მეთოდებზე რეაგირებს. წვრთნის პროცესში გამოჩენილმა აგრესიამ შესაძლოა შიშსა და შფოთვასთან ერთად არასასურველი ქცევის განვითარებასაც შეუწყოს ხელი. 

ყურის ინფექცია

ინფექციების განვითარების რისკის შესამცირებლად ყურის რეგულარულ წმენდას და  მისი სისუფთავის შენარჩუნებას განსაკუთრებული მნიშვნელობა აქვს. გამოიყენეთ ვეტერინარის მიერ რეკომენდირებული ყურის საწმენდი ხსნარი და ბამბით ნაზად გაუსუფთავეთ ყურები თქვენს კომპანიონ ცხოველს. 

ამ პროცესში სიფრთხილე გამოიჩინეთ და ეცადეთ ყურის არხი არ დააზიანოთ. ვინაიდან, ტენიანობა ბაქტერიების გამრავლებისთვის შესაფერის გარემოს ქმნის, ჰიგიენური პროცედურის დასრულებისთანავე დარწმუნდით, რომ თქვენი კომპანიონი ცხოველის ყურები მშრალია. 

გლაუკომა

გლაუკომა თვალშიგა წნევის ზრდას და მხედველობის ნერვის დაზიანებას იწვევს. გლაუკომის განვითარების თავდაპირველ ეტაპზე კომპანიონი ცხოველების მხედველობა უმნიშვნელოდ უარესდება, თუმცა, დროთა განმავლობაში, შესაძლოა საქმე განუკურნებელ სიბრმავემდე მივიდეს.

მიუხედავად იმისა, რომ დაავადების პრევენცია რთულია, რეგულარული ვეტერინარული შემოწმება და თვალების ჯანმრთელობის დიაგნოსტიკა დაავადების ადრეულ ეტაპზე გამოვლენასა და მკურნალობის პროცესის ეფექტურად წარმართვაში მნიშვნელოვნად დაგეხმარებათ. 

ანტიოქსიდანტებით, ომეგა 3 ცხიმოვანი მჟავებით, A, C და E ვიტამინებით მდიდარი რაციონი თქვენი ოჯახის მნიშვნელოვან წევრს თვალის ჯანმრთელობის შენარჩუნებაში საგრძნობლად დაეხმარება. 

ბადურის პროგრესირებადი ატროფია 

ბადურის პროგრესირებადი ატროფია ბადურის თანდათანობით გადაგვარებას და მხედველობის დაკარგვას იწვევს. აღნიშნული დაავადება კომპანიონ ცხოველებს მემკვიდრეობით გადაეცემათ. ბადურის ჯანმრთელობის შენარჩუნებაში თვალის რეგულარული გამოკვლევები და ანტიოქსიდანტებით მდიდარი დიეტა დაგეხმარებათ.

ოჯახის მნიშვნელოვანი წევრის შეძენამდე ყურადღებით გამოიკვლიეთ მისი გენეტიკა და დარწმუნდით, რომ თქვენს მომავალ კომპანიონს მხედველობასთან დაკავშირებული პრობლემებისადმი გენეტიკური მიდრეკილება არ აქვს. 

ატოპიური დერმატიტი

ატოპიური დერმატიტი კომპანიონ ცხოველებში გავრცელებული კანის დაავადებაა. ეს გახლავთ ალერგენების მიმართ ზედმეტად აქტიური იმუნური პასუხის გამო განვითარებული ანთებითი პროცესი. ატოპიური დერმატიტი კანის ანთებას, შეწითლებასა და ქავილს იწვევს. 

ატოპიური დერმატიტის სიმპტომები ხშირად ჰგავს კანის სხვა დაავადებებით გამოწვეულ სიმპტომებს და სწორედ ამიტომ არის მნიშვნელოვანი, რომ დიაგნოზი ვეტერინარმა დასვას. 

ბადურის დისტროფია 

დისტროფია ბადურის მოშლას და მხედველობის დაქვეითებას იწვევს. დაავადების გამომწვევი მიზეზი შესაძლოა მემკვიდრეობითი ფაქტორი, ასაკის მატება ან დიაბეტი იყოს. დაავადების დიაგნოსტიკისთვის ვეტერინართან კონსულტაციას გადამწყვეტი მნიშვნელობა აქვს. დროული და სწორი მკურნალობის შემთხვევაში საშიშროების თავიდან აცილებას ეფექტურად შეძლებთ.  

ნეფროპათია

ნეფროპათიით დაავადებული ძაღლები თირკმლის ანომალიური სტრუქტურით იბადებიან. ნეფროპათია პროგრესირებადი დაავადებაა და არასათანადო მკურნალობის შემთხვევაში შესაძლოა თირკმელების ფუნქციის შეწყვეტაც კი გამოიწვიოს. 

ნეფროპათიის კლინიკური ნიშნები უკონტროლო წყურვილს, მომეტებულ შარდვას, მადის კარგვასა და ღებინებას იწვევს. შარდში ცილის მუდმივი მაღალი დონე შესაძლოა ნეფროპათიაზე მიუთითებდეს. სწორედ ამიტომ, ვეტერინართან ვიზიტი და შარდის ანალიზის აღება დაავადების ადრეულ ეტაპზე გამოვლენის  საუკეთესო გზაა. 

აქტიური ბუნების გამო, ინგლისური კოკერ სპანიელი კარგად დაბალანსებულ საკვებს საჭიროებს. ჯიში ასაკისთვის შესაფერისი მაღალი ხარისხის ძაღლის საკვებით უნდა იკვებებოდეს. 

პირველ რიგში, დიეტა ცილებით უნდა იყოს მდიდარი. ეს კუნთების სათანადო განვითარებისა და აღდგენისთვის არის მნიშვნელოვანი. ენერგიის კონცენტრირებული წყაროს უზრუნველსაყოფად, კოკერ სპანიელის საკვები ნახშირწყლებისა და ჯანსაღი ცხიმების სათანადო რაოდენობასაც უნდა უზრუნველყოფდეს. 

ქათმის, ინდაურისა და თევზის უცხიმო ხორცი მაღალი ხარისხის ცილის შესანიშნავი წყაროა. თევზი ომეგა 3 ცხიმოვანი მჟავებითა და ვიტამინებით (D და B2) მდიდარი საკვები პროდუქტია. ის კალციუმთან ერთად ფოსფორსაც შეიცავს და ორგანიზმს ისეთი მინერალებით ამდიდრებს, როგორიც რკინა, თუთია, იოდი, მაგნიუმი და კალიუმია. 

ვიტამინებისა და მინერალების შემცველი საკვები ინგლისური კოკერ სპანიელის ჯანმრთელობისთვის განსაკუთრებით სასარგებლოა. საბედნიეროდ, თანამედროვე ტექნოლოგიით შექმნილი ძაღლის საუკეთესო საკვები დაბალანსებული რაოდენობით სთავაზობს ჩვენი ოჯახის მნიშვნელოვან წევრებს ორგანიზმისთვის საჭირო ვიტამინებისა და მინერალებს. 

ჰიდრატაცია ინგლისურ კოკერ სპანიელზე ზრუნვის კიდევ ერთი მნიშვნელოვანი ასპექტია. სუფთა წყალი ყოველთვის ხელმისაწვდომი უნდა იყოს ჩვენი ოჯახის მნიშვნელოვანი წევრებისთვის, განსაკუთრებით ვარჯიშის შემდეგ ან ცხელ ამინდში. 

ჯიშის ზოგიერთი წარმომადგენელი ჭარბი წონის მატებისკენ არის მიდრეკილი. ამის თავიდან ასაცილებლად, განსაკუთრებული ყურადღება გამოიჩინეთ და თვალი ადევნეთ რა რაოდენობის საკვებს იღებს თქვენი ოთხფეხა მეგობარი დღის განმვლობაში. წონის რეგულარული მონიტორინგი და კვების გრაფიკის დადგენა სიმსუქნესთან დაკავშირებული ჯანმრთელობის პრობლემების თავიდან აცილებაში საგრძნობლად დაგეხმარებათ. 

ვინაიდან, ჯიშის ყოველი წარმომადგენელი უნიკალურია და მათი დიეტური მოთხოვნილებებიც ასაკის, ჯანმრთელობის მდგომარეობისა და აქტივობის დონის მიხედვით იცვლება, კომპანიონი ცხოველის სპეციფიკური კვებითი მოთხოვნების ეფექტურად დასაკმაყოფილებლად სასურველია ნუტრიციოლოგს მივმართოთ.

ინგლისური კოკერ სპანიელი ერთ-ერთი ყველაზე ძველი და ცნობილი სპანიელის ჯიშია, რომელიც ინგლისში, პატარა ზომის ფრინველებზე, კონკრეტულად კი ტყის ქათმებზე (Woodcock) სანადიროდ გამოიყვანეს. ოჯახის ამ მნიშვნელოვან წევრებს სისწრაფის, მკვეთრი ყნოსვისა და კომპაქტური ზომის გამო აფასებდნენ. სწორედ ამ ფიზიკური მახასიათებლების გამო შეეძლო კოკერ სპანიელს დაბურულ ტყეში ნავიგაცია და ფრინველების მოძიება. 

ჯიშის ღირსებას არამხოლოდ მონადირეები და ფერმერები, არამედ ინგლისის სამეფო ოჯახის წევრებიც ყოველთვის სათანადოდ აფასებდნენ. პრინცი უილიამი და ქეით მიდლტონი დღესაც ფლობენ ინგლისურ კოკერ სპანიელს სახელად ლუპოს.

1890-იან წლებში სპანიელის ოჯახი ორად გაიყო და ერთმანეთისგან დამოუკიდებლად დაიწყო განვითარება. ამის მიზეზი გახდა ამერიკელი სელექციონერების სურვილი შეექმნათ ტრადიციული კოკერ სპანიელის სახესხვაობა. ინგლისური და ამერიკული კოკერ სპანიელები. ოფიციალურად 1946 წელს გამიჯნეს ერთმანეთისგან და ორ დამოუკიდებელ ჯიშად აღიარეს.