ზომა

მდედრი და მამრი ჯეკ რასელ ტერიერები სიმაღლეში 25-38 სანტიმეტრს აღწევენ. სხვა ფიზიკურ მონაცემებს რაც შეეხება, მათი სიგრძე 46-55 სანტიმეტრის ფარგლებში მერყეობს.

წონა

ჯეკ რასელის წონასთან დაკავშირებული ინდივიდუალური შემთხვევები გენეტიკის, დიეტისა და ჯანმრთელობის მდგომარეობის შესაბამისად განისაზღვრება. თუმცა, ჩვეულებისამებრ, ზრდასრული მამრი და მდედრი ჯეკ რასელ ტერიერები 4.1 კილოგრამიდან 6.8 კილოგრამამდე იწონიან.

სიცოცხლის ხანგრძლივობა

ჯეკ რასელ ტერიერის სიცოცხლის ხანგრძლივობა 13-დან 16 წლამდე მერყეობს და ადამიანის ცხოვრების დაახლოებით 68-80 წელს უტოლდება. თუმცა, გახსოვდეთ, ეს ციფრები მხოლოდ პირობითია და თქვენი ოჯახის მნიშვნელოვანი წევრის სიცოცხლის ხანგრძლივობა მისი ცხოვრების ჯანსაღ წესსა და ჰარმონიულ საარსებო გარემოზეა დამოკიდებული.

ბეწვის საფარი

ჯეკ რასელ ტერიერის ჯიშის წარმომადგენლები მოკლე და მკვრივი ორფენოვანი ბეწვის საფარით ხასიათდებიან. ბეწვის გარე ფენა უხეში, ქვედა ფენა კი საგრძნობლად რბილია. ამ ტიპის ბეწვის საფარი შესანიშნავი თბოიზოლატორია, თუმცა, ოპტიმალური მდგომარეობის შესანარჩუნებლად რეგულარულ მოვლას საჭიროებს.

ჯეკ რასელ ტერიერები ენერგიული და თავგადასავლების მოყვარული ხასიათით არიან ცნობილი. გაბედული და უშიშარი ქცევის პარალელურად ისინი თამაშისა და კვლევის მიმართაც ხშირად ავლენენ უსაზღვრო ენთუზიაზმს. მაღალი ინტელექტი და მძაფრი ინსტინქტები ჯეკ რასელს შესანიშნავ მონადირედ აქცევს. მათი თავდაპირველი დანიშნულებიდან გამომდინარე, ამ კომპანიონ ცხოველებს ბუნებრივი მიდრეკილება აქვთ ისეთი საქმიანობების მიმართ, როგორიც თხრა, დევნა და მოძიებაა.

ოჯახის წევრებთან ურთიერთობის თვალსაზრისით, ჯეკ რასელ ტერიერები ერთგულებითა და სიყვარულით სავსე ქცევას ავლენენ. ზრდასრულებთან ერთად, ისინი მშვენივრად ადაპტირდებიან ბავშვებთანაც, განსაკუთრებით მაშინ თუ მცირე ასაკიდან იზრდებიან მათთან ერთად. სათანადო სოციალიზაციისა და წვრთნის შემთხვევაში, ოჯახის ამ მნიშვნელოვანი წევრებისთვის სხვა შინაურ ცხოველებთან ერთად ჰარმონიულად თანაცხოვრებაც არ წარმოადგენს სირთულეს.

ჯეკ რასელის ტიპის ტერიერებს რთულად გასაწვრთნელი ძაღლების რეპუტაცია აქვთ, თუმცა, სინამდვილეში, ისინი საკმაოდ ჭკვიანები არიან და ჩვენს მითითებებსაც იოლად იმახსოვრებენ თუ  წვრთნის პროცესში მოთმინებას ვინარჩუნებთ და მხოლოდ სწავლების პოზიტიურ პრაქტიკაზე ვკონცენტრირდებით.

მუხლის ქუდის დისლოკაცია

მუხლის ქუდის დისლოკაცია მემკვიდრეობითი პრობლემაა. ამ პრობლემით გამოწვეული დისკომფორტისა და ტკივილის თავიდან ასაცილებლად სახსრების ირგვლივ არსებული კუნთების რეგულარული ვარჯიში და ჯანსაღი წონის შენარჩუნება განსაკუთრებით მნიშვნელოვანია.

ამ მდგომარეობასთან დაკავშირებული მძიმე შემთხვევების გამოსასწორებლად შესაძლოა მაკორექტირებელი ოპერაციაც გახდეს საჭირო. თუმცა, რეგულარული ვეტერინარული შემოწმებები მუხლის ქუდის დისლოკაციის ადრეულ ნიშნებს აღმოაჩენს და შესაბამისი ზომების მიღების შესაძლებლობას დაავადების განვითარების ადრეულ ეტაპზე მოგცემთ.

სმენის პრობლემები

სმენის პრობლემები შესაძლოა თანდაყოლილი იყოს, ან მოგვიანებით, ისეთი ფაქტორების გამო განვითარდეს, როგორიცაა, მაგალითად, ხანდაზმულობის ასაკი ან ყურის ინფექცია. სმენის პრობლემები მნიშვნელოვნად მოქმედებს კომპანიონი ცხოველის ცხოვრების ხარისხზე და ხშირად წვრთნისა და კომუნიკაციის მეთოდების კორექტირებასაც საჭიროებს.

თვალის დაავადებები

კატარაქტა და პროგრესირებადი ბადურის ატროფია ის დაავადებებია, რომლებმაც შესაძლოა ჯეკ რასელ ტერიერის თვალის ჯანმრთელობას შეუქმნას საფრთხე. ვეტერინარი ოფთალმოლოგის მიერ თვალის რეგულარული გამოკვლევა ამ მდგომარეობის ადრეულ ეტაპზე გამოვლენაში და მკურნალობის ეფექტური კურსის დაგეგმვაში დაგეხმარებათ.

სიმპტომების მართვისა და დაავადების პროგრესირების შენელების მიზნით, თვალის დაავადებების მკურნალობა შესაძლოა მედიკამენტურ მკურნალობას ან ქირურგიულ ჩარევას საჭიროებდეს.

ჯეკ რასელ ტერიერის კვებისას, ჯიშის წარმომადგენელთა ჯანმრთელობისა და კეთილდღეობის უზრუნველსაყოფად, რამდენიმე საკითხი უნდა გავითვალისწინოთ. უპირველეს ყოვლისა, მნიშვნელოვანია უზრუნველვყოთ დაბალანსებული დიეტა, რომელიც ზედმიწევნით დააკმაყოფილებს მათ კვებით საჭიროებებს. მაგალითად, ჯეკ რასელები აქტიური და ენერგიული ძაღლები არიან, ამიტომ კუნთების განვითარებისა და აღდგენის მიზნით მათთვის მიწოდებული საკვები მაღალი ხარისხის პროტეინს უნდა შეიცავდეს.

უცხიმო ხორცის, კვერცხის, მაღალი ხარისხის ცილის, კალციუმისა და ფოსფორის დაბალანსებული რაოდენობით მიღება ჩვენი ოჯახის მნიშვნელოვან წევრს კუნთების სწორად განვითარებასა და მათი ჯანმრთელობის შენარჩუნებაში დაეხმარება. კალციუმი და ფოსფორი ძვლების ჯანმრთელობისთვის საჭირო ნივთიერებებია, რომლებიც სახსრების ჯანმრთელობას უწყობენ ხელს.

საჭირო ენერგიის მისაღებად, ჯეკ რასელის დიეტა ცხიმების ადეკვატურ რაოდენობას, ჯანსაღი კანისა და ქურთუკის შესანარჩუნებლად კი აუცილებელ ცხიმოვან მჟავებს უნდა შეიცავდეს. ჩვენი ოჯახის მნიშვნელოვანი წევრებისთვის ნახშირწყლების მიღებასაც არანაკლები მნიშვნელობა აქვს,  თუმცა სასურველია მათი წყარო მარცვლეული და ბოსტნეული იყოს.

პორციის კონტროლი განსაკუთრებით მნიშვნელოვანია კომპანიონი ცხოველის სიმსუქნის თავიდან ასაცილებლად. ჭარბმა წონამ შესაძლოა ჩვენი ოთხფეხა მეგობრების ჯანმრთელობის სხვადასხვა პრობლემები, მათ შორის სახსრების პრობლემები და დიაბეტიც კი გამოიწვიოს. ძაღლის წონის, ასაკისა და აქტივობის დონის შესაბამისად გაწერილი კვება პორციის შესაბამისი ზომის განსაზღვრაში დაგეხმარებათ.

მოერიდეთ ჯეკ რასელისთვის საკვების ნარჩენების შეთავაზებას. ამან შესაძლოა კვების დისბალანსი გამოიწვიოს. გახსოვდეთ, რომ ადამიანისთვის განკუთვნილი გარკვეული საკვები, მაგალითად, შოკოლადი, ხახვი და ყურძენი, ძაღლებისთვის ტოქსიკურია და მათი ოჯახის მნიშვნელოვანი წევრებისთვის შეთავაზება დაუშვებელია.

ცხოვრების აქტიური წესის გამო, ჯეკ რასელ ტერიერს სხვა ჯიშებთან შედარებით მეტი წყალი ესაჭიროება. ამიტომ, დარწმუნდით, რომ წყლის თასი თქვენი ოთხფეხა მეგობრისთვის მოსახერხებელ ადგილას არის განთავსებული და მუდამ სავსეა.

გახსოვდეთ, კვების რეგულარული გრაფიკი რუტინის ჩამოყალიბებასთან ერთად საჭმლის მონელების პროცესსაც უწყობს ხელს. ყურადღებით დააკვირდით კომპანიონი ცხოველის წონის, მადის ან ქცევის უეცარ ცვლილებას და თქვენი ოჯახის მნიშვნელოვან წევრზე მორგებული დიეტური რეკომენდაციების მისაღებად ნუტრიციოლოგთან გაიაროთ კონსულტაცია.

ჯეკ რასელ ტერიერის ჯიშის ისტორია მე-19 საუკუნის პირველ ნახევარში, ინგლისში დაიწყო. ჯიშს სახელი მელაზე ნადირობისთვის შესაფერისი ტერიერების მოშენებით დაინტერესებული პიროვნების, ჯონ რასელის საპატივცემულოდ უწოდეს. რასელი მიზნად ისახავდა შეექმნა პატარა ზომის მოქნილი ძაღლი, რომელიც მონადირეების თანხლებას და ბუნაგებიდან მელიების ეფექტურად გამოდევნას შეძლებდა.

ამ მიზნით, ჯონ რასელმა ნადირობის უნარის მქონე სხვადასვა ჯიშები, მათ შორის ფოქსტერიერი, ბულტერიერი და ბიგლი შეაწყვილა. მისი მთავარი მიზანი ისეთ თვისებებზე ფოკუსირება იყო, როგორიც ინტელექტი, გამძლეობა და გამბედაობაა. სელექციის შედეგად მიღებულმა ტერიერებმა ინგლისის სოფლებისთვის დამახასიათებელი უხეში რელიეფის დაძლევის უნარი და ნადირობის ძლიერი ინსტინქტები შეიძინეს.

დროთა განმავლობაში, სიმტკიცით, სისწრაფითა და უსაზღვრო ენერგიით გამორჩეული ჯეკ რასელ ტერიერი მონადირეებისა და ფერმერებისთვის საყვარელ ჯიშად იქცა. მალე, ეს ცნობადობა ინგლისის ფარგლებს გასცდა და ჯიშმა მსოფლიო აღიარება მოიპოვა.

მე-19 საუკუნის ბოლოს ჯეკ რასელ ტერიერი ოფიციალურად იქნა აღიარებული. თუმცა, ჯიშის უნიკალური მახასიათებლების შენარჩუნებისა და პოპულარიზაციის მიზნით ჯეკ რასელ ტერიერის თვისებების სტანდარტიზაცია მხოლოდ მე-20 საუკუნეში დაიწყო.