ინდივიდუალურ საჭიროებებზე მორგებული, კარგად დაბალანსებული დიეტა, ჯანსაღი, აქტიური და ბედნიერი ცხოვრების უზრუნველყოფით გააუმჯობესებს მეტისის ცხოვრების ხარისხს. სწორედ ამიტომ არის რეკომენდებული ჩვენი ოჯახის მნიშვნელოვან წევრს მაღალი ხარისხის ისეთი კომერციული ძაღლის საკვები შევთავაზოთ, რომელიც სრულად დააკმაყოფილებს მის საჭიროებებს.
კომპანიონი ცხოველის ასაკთან, წონასა და აქტივობის დონესთან დაკავშირებული დიეტური მითითებების მისაღებად და კვების შესაბამისი გრაფიკის დასადგენად, ნუტრიციოლოგთან კონსულტაცია საუკეთესო გადაწყვეტილებაა.
მეტისის რაციონი მაღალი ხარისხის ცილების, ნახშირწყლების, ცხიმების, ვიტამინებისა და მინერალების დაბალანსებულ ნაზავს უნდა მოიცავდეს. თუმცა, გახსოვდეთ, რომ ლეკვებს ზრდასრულ ძაღლებთან შედარებით მეტი ცილა და კალორია ესაჭიროებათ. მათ მცირე ზომის კუჭი აქვთ, ამიტომ სასურველია დღეში 3-ჯერ ან 4-ჯერ გავუმასპინძლდეთ ლეკვის საუკეთესი საკვებით. ექვსი თვის ასაკიდან შეგვიძლია მათი კვების სიხშირე ორამდე შევამციროთ.
ხანდაზმულ ძაღლებს რაც შეეხება, მათი გამოკვება ისეთი საკვებითაა რეკომენდირებული, რომელიც სახსრების ჯანმრთელობის უზრუნველსაყოფად საჭირო დამხმარე ნივთიერებებით (გლუკოზამინი, ქონდროიტინი) არის მდიდარი.
ბევრს შეცდომით სჯერა, რომ მეტისი ძაღლების გამოკვება მხოლოდ ნასუფრალით შეუძლიათ. თუმცა, ეს სიმართლეს არ შეესაბამება. ნარჩენებს ხშირად აკლიათ საჭირო საკვები ნივთიერებები და შესაძლოა მათმა ხშირმა მიღებამ სიმსუქნესთან ერთად საჭმლის მომნელებელი სისტემის პრობლემებიც გამოიწვიოს.
მიუხედავად იმისა, რომ იშვიათ შემთხვევებში, სუფრიდან მორჩენილი საკვების მეტისისთვის გაზიარება უსაფრთხოა, ნუტრიციოლოგიური საჭიროებების სრულყოფილად დასაკმაყოფილებლად, ძაღლებისთვის სპეციალურად შექმნილი დაბალანსებული დიეტაა საჭირო.
გახსოვდეთ, რომ ადამიანისთვის განკუთვნილი გარკვეული საკვები ძაღლებისთვის ტოქსიკურია და კომპანიონი ცხოველისთვის მათი შეთავაზება დაუშვებელია. განსაკუთრებით საშიშია შოკოლადი, ხახვი, ნიორი, ყურძენი, ქიშმიში და ხელოვნური დამატკბობლების შემცველი პროდუქტები. არანაკლებ მავნეა ცხიმის მაღალი შემცველობის მქონე საკვები და მოხარშული ძვლები. შესაძლოა მათმა მიღებამ პანკრეატიტი და შინაგანი დაზიანებებიც კი გამოიწვიოს.
