ოჯახის გარეშე დარჩენილ მეტისებს ყოველდღიურად უამრავ გამოწვევასთან უწევთ გამკლავება. ცხოვრების ამგვარი წესი მათი სიცოცხლის ხანგრძლივობას მკვეთრად ამცირებს. თუმცა, პოტენციური საფრთხისგან დაცვას და მოსიყვარულე ოჯახით უზრუნველყოფას მათი ცხოვრების ხარისხის მკვეთრად გაუმჯობესება შეუძლია. ასეთ შემთხვევაში, მეტისის ასაკმა შესაძლოა 15 წელსაც მიაღწიოს. 

თანაგრძნობით შთაგონებული ეს აქტი მხოლოდ გაჭირვებით სავსე ხანმოკლე ცხოვრებისგან არ იხსნის მეტისს. შენი კეთილშობილება უფრო ხანგრძლივი და ბედნიერი ცხოვრებით ტკბობის შესაძლებლობას მისცემს ოჯახის ამ მნიშვნელოვან წევრებს.

მეტისი კატები განსაკუთრებული ინტელექტითა და ემპათიით გამოირჩევიან. მოსიყვარულე, მეგობრული და მხიარული ბუნების გამო, ისინი შესანიშნავ დროს ატარებენ ბავშვების გარემოცვაში და არც სხვა შინაური ცხოველების გვერდით ცხოვრებაზე ამბობენ უარს. მშვიდი ქცევა და მინიმალური მოვლის საჭიროება მათ ხანდაზმულებისთვისაც შესაფერის კომპანიონად აქცევს.

მეტისი კატების ერთ-ერთი საუკეთესო მახასიათებელი ადაპტირების შესანიშნავი უნარია. იქნება ეს დიდი სახლი თუ პატარა მყუდრო ბინა, ოჯახის ეს მნიშვნელოვანი წევრები შესანიშნავად ეგუებიან მრავალფეროვან საცხოვრებელ გარემოს. სოციალური ქცევა, მოთმინების უნარი და ნაზი ტემპერამენტი მათ ბავშვებთან და სხვა შინაურ ცხოველებთან თანაცხოვრებისთვისაც შესაფერის კომპანიონად აქცევს. 

ცნობისმოყვარე და მხიარული ბუნების გამო, მეტისები ყოველთვის მზად არიან თამაშისა და თავგადასავლებისთვის. გონიერება და სწრაფად დასწავლის უნარი მათთან ინტერაქციას დაუვიწყარ გამოცდილებად აქცევს. ვინაიდან მათი წარმომავლობა უცნობია, ძნელია წინასწარ განვსაზღვროთ, როგორი იქნება კატა ზრდასრულ ასაკში. შესაძლოა ის ამერიკული მოკლებეწვიანისთვის დამახასიათებელი სიმშვიდით ან პირიქით, იაპონური ბობტეილის მსგავსი განსაკუთრებული ვოკალიზაციით ხასიათდებოდეს. 

გენეტიკური მრავალფეროვნების გამო შერეული ჯიშის კატები მემკვიდრეობითი დაავადებების მიმართ ნაკლები მგრძნობელობით გამოირჩევიან. თუმცა, ცხადია არც ისინი არიან დაზღვეული ჯანმრთელობის პრობლემებისგან. 

Მეტის კატებზე კომპეტენტური ზრუნვის ერთ-ერთი მთავრი ასპექტი სტომატოლოგიური პრობლემების თავიდან აცილებაა. პირის ღრუს დაავადებებს ტკივილის, კვების გაძნელებისა და სერიოზული ინფექციების გამოწვევა შეუძლია. ამ პრობლემის თავიდან ასაცილებლად, რეგულარულ სტომატოლოგიურ მოვლას გადამწყვეტი  მნიშვნელობა აქვს. 

მეტისები აგრევე მიდრეკილნი არიან სიმსუქნისკენ, განსაკუთრებით იმ შემთხვევაში, თუ ისინი ჭარბად იკვებებიან ან არ აქვთ საკმარისი ფიზიკური დატვირთვა. შესაძლოა სიმსუქნემ ჯანმრთელობის რიგი პრობლემები, მათ შორის დიაბეტი, გულის დაავადება და ართრიტი გამოიწვიოს. დაბალანსებული დიეტის დაცვა და ფიზიკური აქტივობის წახალისება ამ რისკების შემცირებას ეფექტურად შეუწყობს ხელს. 

რწყილების, ტკიპებისა და ჭიებით გამოწვეული პარაზიტული ინფექციები კიდევ ერთი გავრცელებული პრობლემაა, განსაკუთრებით იმ მეტისი კატებისთვის, რომლებიც ქუჩაში ცხოვრობენ. ვეტერინართან აქტიური კომუნიკაცია და შესაბამისი მკურნალობა პარაზიტების თავიდან ასაცილებლად აუცილებელი პროფილაქტიკური ღონისძიებაა.

საშარდე გზების პრობლემები კიდევ ერთი საყურადღებო საკითხია, როდესაც საქმე მეტისების ჯანმრთელობას ეხება. დაგვიანებული მკურნალობის შემთხვევაში, ინფექციამ ან თირკმელების ფუნქციის დარღვევამ შესაძლოა სიცოცხლისთვის საშიში შედეგები გამოიწვიოს. საშარდე გზების პრობლემებთან დაკავშირებული რისკის შემცირებაში სუფთა წყლის სისტემატური მიწოდება და დაბალანსებული დიეტა დაგეხმარებათ.

ჯანსაღი და სრულფასოვანი ცხოვრების უზრუნველსაყოფად, მეტისი კატების კვება მათი ნუტრიციოლოგიური საჭიროებების გულდასმით გათვალისწინებას საჭიროებს. 

უპირველეს ყოვლისა, მნიშვნელოვანია შევარჩიოთ მაღალი ხარისხის კატის საკვები, რომელიც ზედმიწევნით აკმაყოფილებს საკვების წარმოების საუკეთესო სტანდარტებს. მოძებნეთ საკვები, რომელიც ეტიკეტირებულია, როგორც სრული და დაბალანსებული. ასეთ შემთხვევაში, თქვენი ოჯახის მნიშვნელოვანი წევრი ყველა იმ აუცილებელ ნივთიერებას მიიღებს, რომელიც კატების ჯანმრთელობისთვის არის მნიშვნელოვანი.

საკვების რეკომენდირებული ოდენობის დასადგენად ისეთი ფაქტორები უნდა გაითვალისწინოთ, როგორიც მეტისის ასაკი, წონა, აქტივობის დონე და ჯანმრთელობის მდგომარეობაა. მაგალითად, კნუტებს, ზრდასრულ და სტერილურ კატებს საკვების განსხვავებული შემადგენლობა და  კალორიების შესაბამისი ოდენობა ესაჭიროებათ. 

საუკეთესო შედეგისთვის, საკვების შეფუთვაზე მოცემული კვების სახელმძღვანელო მითითებები დაიცავით. თუმცა საჭიროების შემთხვევაში, პორციის ზომა, ნუტრიციოლოგთან კონსულტაციის საფუძველზე, თქვენი ოთხფეხა მეგობრის ინდივიდუალური მოთხოვნების შესაბამისად შეცვალეთ.

გახსოვდეთ ისიც, რომ კომპანიონი ცხოველებისთვის ადამიანის საკვების შეთავაზება ხშირად სავალალო შედეგით სრულდება. ამ უსიამოვნო გამოცდილების თავიდან ასაცილებლად, განსაკუთრებით ხახვს, ნიორს, ყურძენს, შოკოლადსა და კოფეინის შემცველ პროდუქტებს ერიდეთ.

ნეოლითური რევოლუციის შემდეგ, ადამიანებმა გაიაზრეს, რომ მარაგის მღრღნელებისგან დასაცავად სანდრო პარტნიორი ესაჭიროებოდათ და სწორედ ამ აღმოჩენამ განაპირობა მათსა და კატებს შორის სიმბიოზური ურთიერთობის ჩამოყალიბება. 

კატები დაუღალავად შრომობდნენ, რომ ბეღლები და საკვების შესანახი სხვა ობიექტები ვირთხებისა და სხვა მავნებლებისგან დაეცვათ. ამის სანაცვლოდ კი საკვებსა და უსაფრთხო საცხოვრებელ ადგილს იღებდნენ. 

სუფთა ჯიშის კატებისგან განსხვავებით, შინაურ მოკლებეწვიან კატებს ჯიშის სპეციფიკური სტანდარტი არ აქვთ. თუმცა, მაინც არსებობს მათთვის დამახასიათებელი ზოგადი მახასიათებლები, რომელთა შორის ძლიერი და მოქნილი სხეული, ბეწვის ფერთა მრავალფეროვნება და ლოიალური ბუნება ყველა მეტად არის აღსანიშნავი. 

მეტისი კატების მახასიათებლების ჩამოყალიბებაში შერჩევითმა მოშენებამ მნიშვნელოვანი როლი ითამაშა. თუმცა, სუფთა ჯიშის კატებისგან განსხვავებით, მეტისებს მრავალფეროვანი გენეტიკური ხაზი აქვთ, რაც ხელს უწყობს მათ მტკიცე ჯანმრთელობას და გარემო პირობებთან ადაპტირების მაღალ ხარისხს უზრუნველყოფს.

მეტისი კატების ყოლასთან დაკავშირებული ერთ-ერთი მთავარი გამოწვევა ჯანმრთელობის უცნობი ისტორიაა. წარმომავლობის ცოდნის გარეშე, შესაძლოა მოულოდნელი სამედიცინო პრობლემების წინაშე აღმოჩნდეთ. თუმცა, ნუ იღელვებთ. ამ პრობლემის პრევენციას რეგულარული ვეტერინარული შემოწმებით შეძლებთ. 

კიდევ ერთი გამოწვევაა მათი ქცევა და სოციალიზაციაა. ახალ გარემოსთან შეგუების პროცესში, მეტისმა კატებმა შესაძლოა შფოთვა, შიში და დესტრუქციული ქცევაც კი გამოავლინონ. თუმცა, მოთმინება და თანმიმდევრული სოციალიზაციის მცდელობა ახალ გარემოსთან ადაპტაციის პროცესს მნიშვნელოვნად გააადვილებს. უსაფრთხო, წყნარი სივრცის უზრუნველყოფა და ადაპტაციისთვის დროის მიცემა თქვენდამი არსებულ ნდობას კიდევ უფრო მეტად გააძლიერებს.

ისეთ ოჯახში ინტეგრირება, სადაც სხვა კომპანიონი ცხოველებიც ცხოვრობენ, შესაძლოა კიდევ ერთი გამოწვევა აღმოჩნდეს მეტისი კატისთვის. ცხოველებს შორის ჰარმონიული ურთიერთობის უზრუნველსაყოფად, თქვენი ზედამხედველობა და ადაპტაციის პროცესისთვის თანდათანობითი ხელშეწყობა განსაკუთრებით მნიშვნელოვანია

მეტის კატების გული უსაზღვრო მადლიერებითა და უპირობო სიყვარულითაა სავსე. ამიტომ, გვჯერა, ამ გამოწვევებს არ შეუშინდები და მათთვის საოცნებო ოჯახის შექმნას საინტერესო გამოწვევად აქცევ!