მოსიყვარულე ბუნება, დამოუკიდებელი პიროვნება და გამორჩეული ფიზიკური მახასიათებლები ამერიკულ მოკლებეწვიანს სასურველი კომპანიონი ცხოველის სტატუსს ანიჭებს არამხოლოდ მარტო მცხოვრები ადამიანებისთვის,  არამედ მათთვის, ვისაც სახლში სხვა ოთხფეხა მეგობრები ჰყავს. 

ამ ჯიშის წარმომადგენლები ხშირად ავლენენ სიყვარულს ოჯახის წევრების მიმართ და მათთან სასიამოვნო ემოციურ კავშირს აყალიბებენ. თუმცა, დამოუკიდებელი ბუნებიდან გამომდინარე, ნუ გაგიკვირდებათ, თუ ამერიკული მოკლებეწვიანი ზოგჯერ თქვენგან განცალკევებით ყოფნას ამჯობინებს. ხასიათთან დაკავშირებული ამ ნიუანსის დამსახურებით, ოჯახის ეს მნიშვნელოვანი წევრები სახლში მარტო დარჩენის შემთხვევაშიც კი არ ავლენენ მოწყენილობით გამოწვეულ დესტრუქციულ ქცევას.

ინტელექტის მაღალი დონე, მხიარული ბუნება და სახალისო თამაშებისადმი ინტერესი ოჯახის ამ მნიშვნელოვან წევრს ბავშვებისთვისაც მიმზიდველ კომპანიონად აქცევს. თუ ამერიკულ მოკლებეწვიანს იყოლიებთ, დარწმუნდებით, რომ მის დამოუკიდებელ პიროვნებაზე დაკვირვება ნამდვილი თავგადასავალია.

ჰიპერტროფიული კარდიომიოპათია

ჰიპერტროფიული კარდიომიოპათია გულის დაავადებაა, რომელიც გულის კუნთების გასქელებას იწვევს. ამან შესაძლოა გულის უკმარისობა და გულ-სისხლძარღვთა პრობლემები გამოიწვიოს. ამ გენეტიკური დაავადების პრევენციისთვის სელექციონერები ჰიპერტროფიული კარდიომიოპათიისადმი მიდრეკილი კატების იდენტიფიცირებას და მათი გამრავლების თავიდან აცილებას ცდილობენ.

რეგულარული კარდიოგრამა და გულის ჯანმრთელობის მუდმივი მონიტორინგი თქვენი ოჯახის მნიშვნელოვანი წევრის კეთილდღეობის გარანტია. თუმცა, ნუტრიციოლოგთან თანამშრომლობას და მისი რეკომენდაციის საფუძველზე სპეციალიზებული დიეტის დაცვას გულის ჯანმრთელობისთვის არანაკლები მნიშვნელობა აქვს.

დიაბეტი

დიაბეტი   სისხლში შაქრის დონის მატებით გამოწვეული ქრონიკული დაავადებაა. დიაბეტის დროს პანკრეასი საკმარისი რაოდენობით ვერ გამოიმუშავებს ინსულინს. ამან შესაძლოა თირკმელების, გულ-სისხლძარღვთა და მხედველობის სისტემების დაზიანება გამოიწვიოს. 

დიაბეტის სიმპტომები მომატებულ წყურვილთან ერთად წონის უეცარ კლებასა და მადის ცვლილებაშიც გამოიხატება. დაბალანსებული კვება თქვენი კომპანიონი ცხოველის სისხლში შაქრის დონის დარეგულირებაში დაგეხმარებათ, თუმცა, პროცესის სამართავად შესაძლოა ინსულინოთერაპია გახდეს საჭირო. 

სტომატოლოგიური პრობლემები

ამერიკული მოკლებეწვიანისთვის დამახასიათებელი სტომატოლოგიური პრობლემები ხშირად პაროდონტიტსა და კბილის რეზორბციას მოიცავს. პაროდონტიტი ორგანიზმის იმუნიტეტის დაქვეითების ფონზე ვითარდება და იმ ქსოვილების დაზიანებას იწვევს, რომლებიც კბილს კბილბუდეში აფიქსირებენ. რეზორბციას რაც შეეხება, ეს დაავადება ხშირად ღრძილის ქვეშ ფარულად მიმდინარეობს და კბილის ფესვის დაშლას იწვევს. 

აღნიშნული სტომატოლოგიური პრობლემების სამართავად აუცილებლად მიჰყევით თქვენი ვეტერინარის რჩევებს. სათანადო მკურნალობის გარეშე ამ დაავადებებმა შესაძლოა ტკივილი და კვების გაძნელება გამოიწვიოს. პრევენციის მიზნით სასურველია რეგულარულად იზრუნოთ თქვენი კომპანიონი ცხოველის პირის ღრუს ჯანმრთელობაზე. 

საშარდე გზების დაავადებები

საშარდე გზების დაავადებებში ის პრობლემები მოიაზრება, რომლებიც კატის შარდსასქესო სისტემის ჯანმრთელობაზე ახდენს გავლენას. მათ შორისაა ინფექციები, ცისტიტი და ურეთრიტი. ცისტიტი შარდის ბუშტის კედლის, უმთავრესად კი მისი ლორწოვანი გარსის ანთებითი პროცესია, რომელიც შარდის ბუშტში მოხვედრილი მიკრობებითაა გამოწვეული. ურეთრიტს რაც შეეხება, ის შარდის ბუშტიდან გარეთ გამავალი არხის მწვავე ანთებას გულისხმობს. ცისტიტის მსგავსად ურეთრიტსაც მიკრობები და ბაქტერიები იწვევენ.

საშარდე გზების დაავადებებთან დაკავშირებული სიმპტომები შესაძლოა სისხლიან შარდვას, შარდვის შეკავებას ან პირიქით, შეუკავებლობას მოიცავდეს. პრევენციის მიზნით, გირჩევთ დარწმუნდეთ, რომ თქვენი კომპანიონი ცხოველის ორგანიზმი სათანადოდაა ჰიდრირებული. დაიცავით დაბალანსებული დიეტა და დაუყოვნებლივ მიმართეთ ვეტერინარს თუ ზემოთ აღნიშნულ სიმპტომებს შენიშნავთ.

რესპირატორული პრობლემები

რესპირატორული პრობლემები კატებში შესაძლოა ინფექციით, ალერგიით ან გარემო ფაქტორების ზემოქმედებით იყოს გამოწვეული. ზედა სასუნთქი გზების ინფექციები ხშირად ისეთ სიმპტომებში ვლინდება, როგორიც ცემინება და ხველაა. სუნთქვასთან დაკავშირებული პრობლემები შესაძლოა ვირუსული ან ბაქტერიული ხასიათის იყოს, ამიტომ საგულდაგულოდ უზრუნველყავით საცხოვრებელი სივრცის ვენტილაცია და ვეტერინარის რჩევების გათვალისწინებით მართეთ მკურნალობის პროცესი. სწორი დიაგნოზი და კომპეტენტური ზრუნვა რესპირატორული პრობლემების თავიდან აცილებაში დაგეხმარებათ.

კონიუნქტივიტი

კონიუნქტივიტი თვალის ლორწოვანი გარსის ანთებაა, რომელსაც ალერგია, ინფექცია ან ვირუსი იწვევს. ამ პრობლემამ შესაძლოა დისკომფორტი, თვალის სიწითლე და ცრემლდენა გამოიწვიოს. ინფექციის წყარო შესაძლოა ჭუჭყიანი თათები გახდეს, ამიტომ დაავადების თავიდან ასაცილებლად კომპანიონი ცხოველის ჰიგიენის სათანადოდ დაცვას განსაკუთრებული მნიშვნელობა აქვს. 

თვალის ჯანმრთელობაზე ფოკუსირებულ რეგულარული ვეტერინარული გამოკვლევები ამერიკული მოკლებეწვიანის თვალის პრობლემების ადრეულ ეტაპზე გამოვლენასა და მკურნალობის პროცესის ეფექტურად მართვაში დაგეხმარებათ.

კომპანიონი ცხოველის ნუტრიციოლოგიური მოთხოვნილებების სათანადოდ გააზრება, ინფორმირებული არჩევანი და ჯანმრთელობასთან დაკავშირებული პრობლემების თავიდან აცილება კომპეტენტური ზრუნვის წინაპირობაა.

ამერიკულ მოკლებეწვიან კატას მოკრძალებული დიეტური მოთხოვნილებები აქვს, თუმცა, აუცილებელია მისი რაციონის საფუძველი სპეციალურად კატებისთვის შექმნილი დაბალანსებული საკვები იყოს. მოძებნეთ მაღალი ხარისხის კომერციული საკვები, რომელიც რეპუტაციის მქონე ორგანიზაციების მიერ დადგენილ სტანდარტებს აკმაყოფილებს და ისეთ აუცილებელ საკვებ ნივთიერებებს შეიცავს, როგორიც ცილები, ცხიმები, ვიტამინები და მინერალებია. ნუტრიციოლოგთან კონსულტაცია თქვენი კომპანიონი ცხოველისთვის საჭირო პორციის ზომის ასაკის, წონისა და აქტივობის დონის მიხედვით განსაზღვრაში დაგეხმარებათ.

პროტეინი ის აუცილებელი კომპონენტია, რომელიც კომპანიონი ცხოველების საერთო ჯანმრთელობას, ჯანსაღი ბეწვის ზრდას და ძლიერი კუნთების განვითარებას უზრუნველყოფს. დარწმუნდით, რომ თქვენ მიერ შერჩეული კატის საკვები პროტეინისა და ცილების სათანადო ოდენობას შეიცავს. 

ოჯახის მნიშვნელოვან წევრზე კომპეტენტური ზრუნვა მისი წონის მონიტორინგსა და ჯანსაღი ცხიმების მიღების წახალისებასაც გულისხმობს. სიმსუქნემ კატებში შესაძლოა დიაბეტთან ერთად სახსრების პრობლემებიც გამოიწვიოს. ამის თავიდან აცილებაში დაბალანსებული დიეტა, სათანადო პორციებით კვება და რეგულარული ვარჯიში დაგეხმარებათ. 

სანამ ყურადღებას ვამახვილებთ იმაზე, თუ რა უნდა შედიოდეს ჩვენი კომპანიონი ცხოველის რაციონში, მნიშვნელოვანია ვიცოდეთ ისიც თუ რას უნდა მოვარიდოთ ჩვენი ოჯახის მნიშვნელოვანი წევრები. ადამიანებისთვის განკუთვნილი ისეთი საკვები, როგორიც შოკოლადი, კოფეინი, ალკოჰოლი, ხახვი და ნიორია, განსაკუთრებით ტოქსიკურია კატებისთვის. 

თუ გსურთ ოჯახის მნიშვნელოვან წევრს თქვენი საკვებით გაუმასპინძლდეთ, შეგიძლიათ არჩევანი კატებისთვის უსაფრთხო ისეთ საკვებზე შეაჩეროთ, როგორიც მოხარშული უცხიმო ხორცია (საქონლის ხორცი, ინდაური, ქათამი). თუმცა, მნიშვნელოვანია სიფრთხილე გამოიჩინოთ და დარწმუნდეთ, რომ ხორცი კარგად არის თერმულად დამუშავებული და კანთან ერთად ძვლებიც მოშორებული აქვს. არასოდეს მისცეთ კატებს უმი ხორცი, ამან შესაძლოა მათი დაავადება გამოიწვიოს. 

სხვა კატების მსგავსად ამერიკული მოკლებეწვიანიც ცნობილია თევზის სიყვარულით. ფხაგამოცლილი თევზის მოხარშული ხორცი  ნამდვილად სასარგებლოა კომპანიონი ცხოველებისთვის, რადგან ამ საკვები პროდუქტისგან მიღებული ჯანსაღი ცხიმოვანი მჟავები ართრიტთან ერთად თირკმლის დაავადებების პრევენციაშიც  დაგეხმარებათ. თქვენი ოჯახის მნიშვნელოვან წევრს პროტეინით მდიდარი შვრიით, ყავისფერი ბრინჯით და კუსკუსითაც შეგიძლიათ გაუმასპინძლდეთ. 

ჯანმრთელობასთან დაკავშირებული პრობლემების თავიდან ასაცილებლად, კომპანიონი ცხოველის რაციონში ახალი საკვები პროდუქტის დამატებამდე აუცილებლად გაიარეთ კონსულტაცია ნუტრიციოლოგთან.

ამერიკული მოკლებეწვიანის ისტორია ამერიკული კოლონიზაციის ადრეული პერიოდით თარიღდება. მიუხედავად იმისა, რომ მეტისების მსგავსად, ამ კატების ზუსტი წარმომავლობაც გარკვეულწილად ბურუსით არის მოცული, მისი წარმოშობა შესაძლოა იმ კომპანიონ ცხოველებს დავუკავშიროთ, რომლებიც, მე-17 საუკუნეში, ამერიკაში ევროპიდან ჩამოსახლებულ ადამიანებს ახლდნენ თან. თავდაპირველად, ეს კატები გადამწყვეტ როლს ასრულებდნენ გემებზე და მღრღნელების პოპულაციის შემცირებას ისახავდნენ მიზნად.

ახალ გარემოსთან ადაპტირების შესანიშნავი უნარის მქონე ეს კომპანიონი ცხოველები მალე ფერმერების ოთხფეხა მეგობრებად იქცნენ და მოსავალთან ერთად სახლების დაცვაც დაიწყეს მავნებლებისგან. 

დროთა განმავლობაში, ამერიკული მოკლებეწვიანის მომხიბვლელობამ და გონიერებამ ჯიშზე მოთხოვნა მნიშვნელოვნად გაზარდა. ამ პროცესს თან ამ სახეობის სხვა ქვეყნებში ექსპორტი მოჰყვა. ჯიშის პოპულარობა განსაკუთრებით მე-20 საუკუნის შუა ხანებში გაიზარდა. ჰოლივუდურ ფილმებსა და რეკლამებში გამოჩენამ ამერიკული მოკლებეწვიანის გლობალური რეპუტაცია კიდევ უფრო მეტად გაამყარა. 

დღესდღეობით, ამერიკული მოკლებეწვიანი კატის ერთ-ერთი ყველაზე ცნობილი და საყვარელი ჯიშია მთელს მსოფლიოში.