ამერიკული კოკერ სპანიელები, როგორც წესი, მოსიყვარულე და მეგობრული პიროვნების მქონე, ნაზი ტემპერამენტით გამორჩეული კომპანიონი ცხოველები არიან. ისინი ზომიერი აქტიურობით ხასიათდებიან და სიამოვნებით ატარებენ დროს როგორც ბავშვების, აგრეთვე  ზრდასრული ადამიანების გვერდით. 

ამერიკული კოკერ სპანიელის თავდაჯერებულ და ლოალურ თანამგზავრად ქცევისთვის ადრეული სოციალიზაციაა საჭირო. თქვენს ოთხფეხა მეგობარს, ჯერ კიდევ ლეკვობის ასაკში, კარგი მანერების სწავლებით დაეხმარებით ცუდი ჩვევების თავიდან აცილებაში. სათანადო წვრთნა ოჯახის ამ მნიშვნელოვანი წევრის მავნებლურ ქცევასა და უცხო ადამიანებისადმი გამოვლენილ შესაძლო აგრესიასაც აგაცილებთ თავიდან. 

სხვა სპორტული ჯიშებისგან განსხვავებით, ამერიკულ კოკერ სპანიელს დღეში მხოლოდ ერთიდან ორ საათამდე ვარჯიში ესაჭიროება. მათთვის რეკომენდირებული აქტივობები ოჯახთან ერთად ეზოში სეირნობას, სირბილს, ცურვას და გონების გასავარჯიშებელ თამაშებს უნდა მოიცავს. 

კოკერ სპანიელის დისციპლინის ჩამოსაყალიბებლად თანმიმდევრულობას გადამწყვეტი მნიშვნელობა აქვს. როდესაც საქმე კარგი ქცევისთვის მიღებულ ჯილდოს ეხება, სხვა ბევრი ჯიშის მსგავსად, საკვები ოჯახის ამ მნიშვნელოვანი წევრებისთვისაც კარგი მოტივატორია. გახსოვდეთ, კოკერ სპანიელი ძალიან მგრძნობიარე ძაღლია. მათთან მიმართებით, ხმის მშვიდი ტონის გამოყენებას ყოველთვის უკეთესი შედეგი აქვს, ვიდრე ბრძანებების მკაცრად გაცემას. 

ბარძაყის დისპლაზია

ბარძაყის დისპლაზია მენჯ-ბარძაყის სახსრის ნაწილობრივ ან სრულ ამოვარდნას გულისხმობს. ბარძაყის დისპლაზიამ შესაძლოა ძვლის ცვეთა და ამ პროცესთან დაკავშირებული ტკივილი გამოიწვიოს. 

კომპანიონი ცხოველების უმრავლესობას ბარძაყის დისპლაზია დაბადებიდანვე აქვს. თუ ბარძაყის დისპლაზიის დიაგნოზირება ადრეულ ეტაპზე მოხდება, პრობლემის გამოსწორებას იოლად შეძლებთ. სხვა შემთხვევებში, ძვლების მდებარეობის შესაცვლელად შესაძლოა ოპერაცია გახდეს საჭირო. 

მიუხედავად იმისა, რომ ამ დაავადების განვითარებაში გენეტიკა მნიშვნელოვან როლს ასრულებს, ჯანსაღი წონის შენარჩუნება სახსრებზე დატვირთვის შემცირებაში დაგეხმარებათ. ყოველდღიური სეირნობა და ცურვა კი მენჯ-ბარძაყის გარშემო არსებული კუნთების ჩამოყალიბებას და მათი სიმტკიცის შენარჩუნებას შეუწყობს ხელს.

ყურის ინფექციები

მოზრდილი ზომის ყურების მქონე ჯიშები (გერმანული ნაგაზი, პუდელი და ბიგლი) ყურის ინფექციებისადმი განსაკუთრებული მიდრეკილებით ხასიათდებიან. ყურის ინფექციების თავიდან ასარიდებლად, სპეციალურად ოთხფეხა მეგობრებისთვის განკუთვნილი ჰიგიენური საშუალებების გამოყენებას გირჩევთ. 

ყურის ინფექციას მრავალი სახის სოკო და ბაქტერია იწვევს. თუმცა, შესაძლოა ამის მიზეზი უცხო სხეული, პოლიპი ან სიმსივნეც კი იყოს. სწორედ ამიტომ, მხოლოდ მედიკამენტებით მკურნალობა პრობლემას ვერ გადაჭრის. საჭიროა თქვენი ამერიკული კოკერ სპანიელის ყურები ვეტერინარმა საფუძვლიანად გამოიკვლიოს.

გლაუკომა

გლაუკომა თვალშიგა წნევის ზრდას და მხედველობის ნერვის დაზიანებას იწვევს. გლაუკომის განვითარების თავდაპირველ ეტაპზე კომპანიონი ცხოველების მხედველობა უმნიშვნელოდ უარესდება, თუმცა, დროთა განმავლობაში, შესაძლოა საქმე განუკურნებელ სიბრმავემდე მივიდეს.

მიუხედავად იმისა, რომ დაავადების პრევენცია რთულია, რეგულარული ვეტერინარული შემოწმება და თვალების ჯანმრთელობის დიაგნოსტიკა დაავადების ადრეულ ეტაპზე გამოვლენასა და მკურნალობის პროცესის ეფექტურად წარმართვაში მნიშვნელოვნად დაგეხმარებათ. 

ანტიოქსიდანტებით, ომეგა 3 ცხიმოვანი მჟავებით, A, C და E ვიტამინებით მდიდარი რაციონი თქვენი ოჯახის მნიშვნელოვან წევრს თვალის ჯანმრთელობის შენარჩუნებაში საგრძნობლად დაეხმარება. 

მემკვიდრეობითი კატარაქტა

კატარაქტა კომპანიონი ცხოველის მხედველობის თანდათანობით გაუარესებას იწვევს. ამ დროს ბროლი, რომელიც ჯანმრთელ თვალში გამჭვირვალეა,  მონაცრისფრო ან რძისფერ შეფერილობას იძენს.

თანდაყოლილ კატარაქტას, როგორც წესი, დედის ორსულობის დროს გადატანილი ინფექციური დაავადება ან სამშობიარო ტრავმა იწვევს. მიუხედავად იმისა, რომ თანდაყოლილი დაავადებების მართვა ხშირად ჩვენი შესაძლებლობების მიღმაა, C და E ვიტამინებით მდიდარი საკვების მიღება მნიშვნელოვნად გააუმჯობესებს თქვენი ოჯახის მნიშვნელოვანი წევრის თვალის ჯანმრთელობას. 

როგორც კომპეტენტურ მშობელს, გახსოვდეთ, რომ რეგულარული ვეტერინარული შემოწმება და თვალების მზის მავნე ზემოქმედებისგან დაცვა დაავადების ეფექტურად მართვის წინაპირობაა.

ბადურის პროგრესირებადი ატროფია

ბადურის პროგრესირებადი ატროფია ბადურის თანდათანობით გადაგვარებას და მხედველობის დაკარგვას იწვევს. აღნიშნული დაავადება კომპანიონ ცხოველებს მემკვიდრეობით გადაეცემათ. ბადურის ჯანმრთელობის შენარჩუნებაში თვალის რეგულარული გამოკვლევები და ანტიოქსიდანტებით მდიდარი დიეტა დაგეხმარებათ.

ოჯახის მნიშვნელოვანი წევრის შეძენამდე ყურადღებით გამოიკვლიეთ მისი გენეტიკა და დარწმუნდით, რომ თქვენს მომავალ კომპანიონს მხედველობასთან დაკავშირებული პრობლემებისადმი გენეტიკური მიდრეკილება არ აქვს. 

ვიტამინებისა და მინერალების შემცველი საკვების მიღება ამერიკული კოკერ სპანიელის ჯანმრთელობისთვის განსაკუთრებით მნიშვნელოვანია. საბედნიეროდ, თანამედროვე ტექნოლოგიით შექმნილი მაღალი ხარისხის კომერციული ძაღლის საკვები დაბალანსებული რაოდენობით სთავაზობს ჩვენი ოჯახის მნიშვნელოვან წევრებს ორგანიზმისთვის აუცილებელ ვიტამინებსა და მინერალებს. 

დაიცავით ძაღლის საკვების შეფუთვაზე წარმოდგენილი მითითებები და მოერიდეთ თავისუფალ კვებას. ჭარბი წონის თავიდან ასაცილებლად, აგრეთვე დაადგინეთ კვების რეგულარული დრო და განსაკუთრებით მოერიდეთ საკვებს, რომელიც ხელოვნურ დანამატებს, შემავსებლებსა და ჭარბ მარცვლეულს შეიცავს.

ყოველთვის უზრუნველყავით წვდომა სუფთა წყალზე და დამატებით, ისეთი საკვებით გაამრავალფეროვნეთ თქვენი ოთხფეხა მეგობრის რაციონი, როგორიც ხილისა და ბოსტნეულის პატარა ნაჭრებია (მაგ., სტაფილო, ვაშლი, მწვანე ლობიო).

გახსოვდეთ, ადამიანისთვის განკუთვნილი ზოგიერთი საკვები (მაგალითად, შოკოლადი, ყურძენი, ხახვი, ნიორი) შესაძლოა ძაღლებისთვის მომწამვლელი აღმოჩნდეს. ამიტომ, მოარიდეთ კომპანიონი ცხოველი მაგიდის ნარჩენებს და ამით სიმსუქნესთან ერთად, საჭმლის მომნელებელი სისტემის პრობლემებსაც აიცილებთ თავიდან. 

ზოგადად, ამერიკული კოკერ სპანიელი აქტიური და ენერგიული ჯიშია, თუმცა თუ თქვენი ოთხფეხა მეგობარი მჯდომარე ცხოვრების წესს ამჯობინებს, სიმსუქნის თავიდან ასაცილებლად, მას უფრო დაბალი კალორიული შემცველობის საკვები დასჭირდება. ყოველდღიური რუტინის დასადგენად, ეცადეთ თქვენი ოჯახის მნიშვნელოვან წევრს საკვები ერთსა და იმავე დროს მიაწოდოთ. როგორც წესი, ზრდასრული ძაღლებისთვის, დღეში ორჯერადი კვებაც (დილით და საღამოს) სრულიად საკმარისია. 

თუმცა, ვინაიდან, ჯიშის ყოველი წარმომადგენელი უნიკალურია და მათი დიეტური მოთხოვნილებებიც ასაკის, ჯანმრთელობის მდგომარეობისა და აქტივობის დონის მიხედვით იცვლება, კომპანიონი ცხოველის სპეციფიკური კვებითი მოთხოვნების ეფექტურად დასაკმაყოფილებლად და კვების შესაბამისი გრაფიკის დასადგენად, სასურველია ნუტრიციოლოგს მივმართოთ.

ამერიკული კოკერ სპანიელის წინაპრები ინგლისიდან არიან. თუმცა ჯიშის წარმომადგენლები სელექციონერებმა შეერთებულ შტატებში დახვეწეს და მის სტანდარტიზაციაზეც სწორედ აქ იზრუნეს. ინგლისურმა და კანადურმა კინოლოგიურმა კლუბებმა ამერიკული და ინგლისური კოკერ სპანიელები ცალ-ცალკე ჯიშებად 1940 წელს აღიარეს. 

ინგლისური კოკერ სპანიელის მსგავსად, ამერიკული კოკერ სპანიელიც ტყის ფრინველებზე სანადიროდ შეიქმნა. მიუხედავად იმისა, რომ ოჯახის ეს მნიშვნელოვანი წევრები დღეს ერთგულ მეგობრებად და საუკეთესო თანამგზავრებად ითვლებიან, ნადირობისთვის საჭირო ინსტინქტებს კვლავაც სანიმუშოდ ინარჩუნებენ. 

ამერიკული კოკერ სპანიელი მსოფლიოში ყველაზე პატარა სპანიელია. კეთილი და მოსიყვარულე ბუნების გამო, ჯიში ბავშვებისთვის საყვარელ, ერთ-ერთ ყველაზე პოპულარულ თერაპიულ ძაღლად  მიიჩნევა. ამერიკული კოკერ სპანიელის სხვა ცნობილ მფლობელებს შორის თავად აშშ-ს 37-ე პრეზიდენტი რიჩარდ ნიქსონიცაა.

ამერიკული კოკერ სპანიელი განსაკუთრებით პოპულარული მე-20 საუკუნის პირველ ნახევარში იყო. ეს გარკვეულწილად უოლტ დისნეისა და მისი გუნდის დამსახურებაა, რადგან დისნეის მიერ 1955 წელს გადაღებულ ანიმაციურ ფილმში “ლედი და მაწანწალა” ლედის როლში სწორედ ამერიკული კოკერ სპანიელის ანიმაციური ვერსიაა წარმოდგენილი.