ბრაქიცეფალია
მოპსის მსგავსად, ბოქსიორი ბრაქიცეფალია, რაც იმას ნიშნავს, რომ ის მოკლე ცხვირითა და შევიწროებული ნესტოებით ხასიათდება. სწორედ ამიტომ, ოჯახის ეს მნიშვნელოვანი წევრები ტემპერატურის მატებასთან ერთად, სუნთქვის პრობლემებისა და ხვრინვისკენ არიან მიდრეკილი. მათი სუნთქვის პრობლემა წონის მატებასთან ერთად უარესდება. სწორედ ამიტომ, ჯანსაღი საკვების მიღებასა და წონის მონიტორინგს პრობლემის პრევენციისთვის განსაკუთრებული მნიშვნელობა აქვს.
თავის ქალის ბრაქიცეფალიური სტრუქტურის გამო, ბოქსიორების დახურულ სივრცეში დიდხანს დატოვება განსაკუთრებით სახიფათოა. დახუთულ გარემოში ბოქსიორებს შეიძლება სუნთქვა გაუძნელდეთ და კრუნჩხვითი შეტევები განუვითარდეთ. მოერიდეთ, აგრეთვე, ბოქსიორის მზის გულზე გასეირნებას. ჰაერის მაღალი ტემპერატურა და მზის პირდაპირი სხივები ჩვენი კომპანიონი ცხოველების ცხვირის ღრუში დიდი რაოდენობით ლორწოს დაგროვებას და სუნთქვის გაძნელებას იწვევს.
ალერგია
ბოქსიორებს ალერგიული ფონით გამოწვეული კანის ინფექციებიც ხშირად აწუხებთ. საკვებით ან ალერგენებით (მტვერი და ობი) მიმართ გამოწვეულ სიმპტომებს იოლად შეამჩნევთ. ჩვეულებისამებრ, სიმპტომები კანის ქავილთან ერთად ბეწვის გადაჭარბებულ ცვენაშიც გამოიხატება.
კანის ინფექციებთან დაკავშირებული გართულებების თავიდან ასარიდებლად, სპეციალურად ოთხფეხა მეგობრებისთვის განკუთვნილი ჰიგიენური საშუალებების გამოყენებას გირჩევთ. აგრეთვე, შესაძლებლობის შემთხვევაში, სასურველია თქვენს ოთხფეხა მეგობარს ალერგიული სინჯი გაუკეთოთ და მაქსიმალური სიზუსტით დაადგინოთ, თუ რომელ პროდუქტებზე აქვს მას ალერგია. ეს შესაძლებლობას მოგცემთ რაციონიდან ამოიღოთ ყველა ის ინგრედიენტი, რომელიც თქვენი ბოქსიორის კვებით ალერგიას იწვევს.
თვალის პრობლემები
თვალის სიმშრალე წყლის არასაკმარისი რაოდენობით მიღებამ შეიძლება გამოიწვიოს. ცრემლის წარმოქმნის სირთულე თვალის გაღიზიანებასა და მხედველობასთან დაკავშირებულ პრობლემებს იწვევს. თვალის პრობლემების მაპროვოცირებელ გარემოებად ხშირად კლიმატი გვევლინება. მაგალითად, თუ ზაფხულის გატარებას თქვენს პატარა მეგობართან ერთად, ზღვისპირა ქალაქში დააპირებთ, სასურველია განსაკუთრებული სიფრთხილე გამოიჩინოთ და თქვენი კომპანიონი შეძლებისდაგვარად მოარიდოთ სიცხეს.
ბოქსიორის თვალები მტვრის მიმართაც განსაკუთრებით მგრძნობიარეა. სწორედ ამიტომ, გირჩევთ, თქვენ კომპანიონ ცხოველთან ერთად ქარიან ამინდში სეირნობაზეც უარი თქვათ.
გთხოვთ, განსაკუთრებული სიფრთხილე გამოიჩინეთ თვალის დაავადებისთვის დამახასიათებელი ისეთი ადრეული სიმპტომების მიმართ, როგორიც სიწითლე და ცრემლდენაა. სასურველია ამ სიმპტომების გამოვლენისთანავე ესტუმროთ ვეტერინარს. როგორც კომპეტენტურმა მშობელმა, მნიშვნელოვანია გაითვალისწინოთ ისიც, რომ თვალებზე ყოველდღიურ ზრუნვას და სპეციალურად ძაღლებისთვის განკუთვნილი ჰიგიენური საშუალებებით მათ ყოველდღიურ წმენდას დაავადებების პრევენციისთვის არსებითი მნიშვნელობა აქვს.
ბარძაყის დისპლაზია
ბარძაყის დისპლაზია სამედიცინო ტერმინია, რომელიც მენჯ-ბარძაყის სახსრის ნაწილობრივ ან სრულ ამოვარდნას გულისხმობს. ბარძაყის დისპლაზიამ შესაძლოა ძვლის ცვეთა და ამ პროცესთან დაკავშირებული ტკივილი გამოიწვიოს.
კომპანიონი ცხოველების უმრავლესობას ბარძაყის დისპლაზია დაბადებიდანვე აქვს. თუ ბარძაყის დისპლაზიის დიაგნოზირება ადრეულ ეტაპზე მოხდება, პრობლემის გამოსწორებას იოლად შეძლებთ. სხვა შემთხვევებში, ძვლების მდებარეობის შესაცვლელად შესაძლოა ოპერაცია გახდეს საჭირო.
მიუხედავად იმისა, რომ ამ დაავადების განვითარებაში გენეტიკა მნიშვნელოვან როლს ასრულებს, სახსრებზე დატვირთვის შესამცირებლად ჯანსაღი წონის შენარჩუნებას განსაკუთრებული მნიშვნელობა აქვს. ყოველდღიური სეირნობა და ცურვა მენჯ-ბარძაყის გარშემო არსებული კუნთების ჩამოყალიბებას და მათი სიმტკიცის შენარჩუნებას შეუწყობს ხელს.
აორტის სტენოზი
ბოქსიორის ჯიშისთვის დამახასიათებელი ეს დეფექტი გულს აიძულებს ორგანიზმის სისხლით მოსამარაგებლად უფრო მეტი დატვირთვით იმუშაოს. აორტის სტენოზის უყურადღებოდ დაყოვებამ შესაძლოა გულისცემის გახშირება და უეცარი სიკვდილიც კი გამოიწვიოს. ჩვეულებისამებრ, ვეტერინარი დიაგნოზს კომპანიონ ცხოველზე სათანადო დაკვირვების საფუძველზე, გულის კარდიოლოგიური გამოკვლევის შემდეგ სვამს.
კარდიომიოპათია
კარდიომიოპათია გულის დაავადებაა, რომელიც გულის კუნთების, განსაკუთრებით მარცხენა პარკუჭის, გასქელებას იწვევს. დაავადებამ შესაძლოა გულის უკმარისობა და სხვა გულ-სისხლძარღვთა პრობლემები გამოიწვიოს.
კარდიომიოპათიით გამოწვეული სიმპტომების სამართავად და დაავადების პროგრესირების შესანელებლად ვეტერინარები ხშირად მედიკამენტებით მკურნალობას მიმართავენ. სრულფასოვანი მკურნალობის გეგმა და გულის ჯანმრთელობის მუდმივი მონიტორინგი თქვენი ოჯახის მნიშვნელოვანი წევრის ჯანმრთელობის გარანტია. თუმცა, ნუტრიციოლოგთან თანამშრომლობა და მისი რეკომენდაციის საფუძველზე სპეციალიზებული დიეტის დაცვა გულის ჯანმრთელობისთვის არანაკლებ მნიშვნელოვანია.
ლიმფომა
ლიმფომა დაავადებაა, რომელიც ლიმფური სისტემის უჯრედების დაზიანებას იწვევს. დაავადების დროს ლიმფოციტები სიმსივნური უჯრედების მსგავსად იქცევიან, უკონტროლოდ მრავლდებიან და ლიმფურ კვანძებში გროვდებიან. ვინაიდან, ლიმფოციტები მთელს ორგანიზმში ცირკულირებენ, სიმსივნური წარმონაქმნები შესაძლოა ლიმფური კვანძის გარდა სხეულის სხვა ადგილებშიც წარმოიქმნას.
გენეტიკური ფაქტორების გარდა, ლიმფომის გამოწვევა ბაქტერიულ და ვირუსულ ინფექციებსაც შეუძლია. ტემპერატურის მატება, წონის კლება, ჭარბი ოფლიანობა, დაღლილობა და სუნთქვის გაძნელება ის სიმპტომებია, რომელთაც განსაკუთრებული ყურადღება უნდა მიაქციოთ. ნებისმიერი სიმპტომის გამოვლენისთანავე ჩანიშნეთ ვიზიტი ვეტერინართან და დარწმუნდით, რომ თქვენი ოჯახის მნიშვნელოვანი წევრის ჯანმრთელობას საფრთხე არ ემუქრება.
ეპილეფსია
ეპილეფსია ცენტრალური ნერვული სისტემის დაავადებაა, რომელიც თავის ტვინში არსებული ნერვული უჯრედების აქტივობის დარღვევას და გულყრას იწვევს. ეპილეფსიური ეპიზოდები ძირითადად რამდენიმე წამის ან წუთის განმავლობაში გრძელდება.
ეპილეფსიის პრევენციული ღონისძიებები თანმიმდევრული რუტინის შენარჩუნებას და სტრესის მინიმუმამდე შემცირებას გულისხმობს. თუმცა, გახსოვდეთ, რომ ვეტერინარის დროული ყურადღება და შესაბამისი მედიკამენტური მკურნალობის დაწყება ამ დაავადების მართვის საუკეთესო გზაა.
