ძაღლის ჯიშები

მოპსი

  • ჯიშის მიმოხილვა

    ბეწვის ცვენა

    ნერწყვდენა

    გრუმინგის სიხშირე

    ბავშვებთან ურთიერთობა

    სხვა ცხოველებისადმი კეთილგანწყობა

    ოჯახის წევრებისადმი დამოკიდებულება

    სოციალიზაციის უნარი

    გაწვრთნის სიმარტივე

    ახალ გარემოსთან ადაპტაცია

    აქტიურობის დონე

    ფიზიკური დატვირთვის საჭიროება

    ყეფის ინტენსივობა

    სუნთქვის პრობლემები

ძაღლის ჯიშები

მოპსი

მოპსი გამორჩეული გარეგნობითა და მომხიბვლელი პიროვნებით იპყრობს ძაღლების მოყვარულთა გულებს მთელი მსოფლიოს მასშტაბით. კომპაქტური აღნაგობა, ღრმა ნაოჭები და მრავლისმეტყველი თვალები მოპსის ადვილად ცნობად და საყოველთაოდ აღიარებულ სახეობად აქცევს. სახასიათო გარეგნობის მიღმა, მოპსები მეგობრული და მოსიყვარულე ბუნებითაც გამოირჩევიან. კომუნიკაციის თანდაყოლილი უნარი, მხიარული ქცევა და ადამიანებთან ურთიერთობისადმი სიყვარული მოპსებს განსაკუთრებულ კომპანიონ ცხოველებად აქცევს როგორც ინდივიდებისთვის, აგრეთვე ოჯახებისთვის.

ჯიშისთვის დამახასიათებელი ძირითადი თვისებები:

  • კომპაქტური ზომა
  • მოსიყვარულე ბუნება
  • კომუნიკაბელურობა
  • მხიარული ქცევა
  • ბავშვებისადმი კეთილგანწყობა 
  • დეტალური ინფორმაცია

    ზომა

    ზომის თვალსაზრისით, მდედრი და მამრი მოპსის ფიზიკური მახასიათებლები ერთმანეთისგან მნიშვნელოვნად არ განსხვავდება. მდედრი მოპსი სიმაღლეში 25-30, მამრი მოპსი კი 25-36 სანტიმეტრს აღწევს. სხვა ფიზიკურ მონაცემებს რაც შეეხება, მდედრი და მამრი მოპსის სიგრძე 39-52 სანტიმეტრის დიაპაზონში მერყეობს.

    წონა

    მოპსის წონასთან დაკავშირებული ინდივიდუალური შემთხვევები გენეტიკის, დიეტისა და ჯანმრთელობის მდგომარეობის შესაბამისად განისაზღვრება. თუმცა, ჩვეულებისამებრ, ზრდასრული მამრი მოპსი 9-დან 14 კილოგრამამდე იწონის. მდედრი მოპსის შემთხვევაში, ეს მაჩვენებელი უფრო მცირეა და 5-9 კილოგრამს შეადგენს.

    სიცოცხლის ხანგრძლივობა

    მოპსის სიცოცხლის ხანგრძლივობა 13-დან 15 წლამდე მერყეობს და ადამიანის ცხოვრების დაახლოებით 68-76 წელს უტოლდება. თუმცა, გახსოვდეთ, ეს ციფრები მხოლოდ პირობითია და თქვენი ოჯახის მნიშვნელოვანი წევრის სიცოცხლის ხანგრძლივობა მისი ცხოვრების ჯანსაღ წესსა და ჰარმონიულ საარსებო გარემოზეა დამოკიდებული.

    ბეწვის საფარი

    ჩვეულებისამებრ, მოპსებს მოკლე და გლუვი ბეწვის საფარი აქვთ. თუმცა, სიგრძის მიუხედავად, ბეწვის სიჯანსაღის შესანარჩუნებლად და ცვენის შესამცირებლად, მოპსები რეგულარულ მოვლას საჭიროებენ. მოპსის ბეწვის დასავარცხნად სასურველია რბილი სავარცხელი გამოიყენოთ და ეს პროცედურა კვირაში მინიმუმ ორ-სამჯერ გაიმეოროთ.

  • ჯიშის ხასიათი

    ამ უნიკალური ჯიშის წარმომადგენლებს ერთგული კომპანიონების რეპუტაცია აქვთ. მოპსის მომხიბვლელ ხასიათს მისი მეგობრული და მოსიყვარულე ბუნება განაპირობებს.

    მცირე ზომის მიუხედავად, მოპსი საოცრად ენერგიული ძაღლია და სახალისო ოინებით გამოწვეული ბედნიერებით ავსებს პარტნიორი ადამიანების გულებს. ამ ჯიშისთვის დამახასიათებელი ექსპრესიული სახე მრავალფეროვან ემოციებს გადმოსცემს. ეს ფაქტი ადამიანებს მოპსებთან კომუნიკაციას მნიშვნელოვნად უადვილებს.

    მშვიდი და კომუნიკაბელური ბუნება მოპსებს ცხოვრების მრავალფეროვან სტილთან ადაპტაციის შესაძლებლობას აძლევს. ამგვარ ადაპტირებად ტემპერამენტთან ერთად, ადამიანებისადმი გამოვლენილი განსაკუთრებული სიყვარული მათ შეუდარებელ კომპანიონებად აქცევს.

  • ჯანმრთელობის პოტენციური პრობლემები

    თვალის პრობლემები

    მოპსების მიდრეკილება თვალის პრობლემებისადმი დიდწილად მათი გამორჩეული სახის ნაკვთებითაა განპირობებული. ამ სახეობისთვის დამახასიათებელი სახის ბრაქიცეფალიური (ბრტყელი) სტრუქტურა რქოვანას დაზიანებისა და თვალის ტრამვების რისკს მნიშვნელოვნად ზრდის.

    შესაძლოა მოპსებმა მემკვიდრეობით ბადურის პროგრესირებადი ატროფია მიიღონ. თვალის ეს დეგენერაციული დაავადება, მხედველობის დაკარგვას იწვევს, თუმცა, კომპეტენტური ზრუნვის პრაქტიკამ შესაძლოა ეს რისკი მნიშვნელოვნად შეამციროს.

    გაითვალისწინეთ, რომ თვალის ჯანმრთელობაზე ფოკუსირებულ რეგულარულ ვეტერინარულ გამოკვლევებს ჩვენი კომპანიონი ცხოველების თვალის პოტენციური პრობლემების ადრეული გამოვლენისა და ეფექტური მართვისთვის არსებითი მნიშვნელობა აქვს. თვალის პრობლემების პრევენციისთვის, კომპანიონი ცხოველის ჰიგიენის სათანადოდ დაცვაც აუცილებელია. სახის ნაკეცების ნაზად გაწმენდითა და გამღიზიანებლების თავიდან აცილებით თქვენი ოჯახის მნიშვნელოვანი წევრის თვალის ჯანმრთელობას მნიშვნელოვნად შეუწყობთ ხელს.

    სუნთქვის პრობლემები

    თავის ქალის ბრაქიცეფალიური (ბრტყელი) სტრუქტურა, კომპანიონი ცხოველების ამ სახეობას სუნთქვის გაძნელების მიმართ განსაკუთრებით მგრძნობიარეს ხდის. ვინაიდან, ჯანმრთელობის ეს პრობლემა ცხელ ან ნოტიო პირობებში უფრო მეტად მძაფრდება, გირჩევთ სათანადო ყურადღება მიაქციოთ გარემო პირობებს და თქვენი ოჯახის მნიშვნელოვანი წევრი უჰაერობასა და მაღალ ტემპერატურას მოარიდოთ.

    ჭარბწონიანობა

    აქტივობის დაბალი დონისა და ჭამისადმი გამოვლენილი განსაკუთრებული სიყვარულის გამო მოპსები ჭარბი წონის მატებისკენ არიან მიდრეკილი. ამის გათვალისწინებით, მნიშვნელოვანია ყურადღება მიაქციოთ რა რაოდენობით იღებს თქვენი ოჯახის მნიშვნელოვანი ცხიმის შემცველ საკვებს. დაბალანსებული დიეტა და რეგულარული ვარჯიში მოპსების სიმსუქნის პრევენციისა და მართვისთვის გადამწყვეტია.

    ბარძაყის დისპლაზია

    ბარძაყის თანდაყოლილი დისპლაზია არის  მდგომარეობა, რომელიც მენჯ-ბარძაყის სახსრისა და მისი ცალკეული ელემენტების განუვითარებლობით არის გამოწვეული. თუ თქვენი ოჯახის მნიშვნელოვან წევრს დროულად არ ჩაუტარდება დიაგნოსტიკა და მკურნალობა, შესაძლოა მომავალში სიარულის პრობლემები შეექმნას. სწორედ ამიტომ, რეგულარულად ეწვიეთ ვეტერინარს და ეცადეთ თქვენს პატარა მეგობარს ჯანსაღი წონი შეუნარჩუნოთ.

    კანის დერმატიტი

    მოპსისთვის დამახასიათებელი კანის ნაოჭები დერმატიტის განვითარების მნიშვნელოვანი რისკფაქტორია. ტენიანობისა და ეთერზეთების კანის ნაკეცებში დაგროვებამ შესაძლოა ინფექცია და მასთან დაკავშირებული უსიამოვნო სიმპტომები გამოიწვიოს. დერმატოლოგიური პრობლემების თავიდან ასაცილებლად ნაკეცების რეგულარულ წმენდას და სათანადოდ გაშრობას განსაკუთრებული მნიშვნელობა აქვს.

    ალერგია

    ჯიშისთვის დამახასიათებელმა ალერგიამ შესაძლოა კანის ქავილთან ერთად, ყურის ინფექცია და კუჭ-ნაწლავის პრობლემებიც გამოიწვიოს. ალერგიული რეაქციის ეფექტურად მართვისთვის ვეტერინართან კონსულტაცია და ალერგენების დროული იდენტიფიცირება კომპეტენტური მშობლობის განუყოფელი ნაწილია.

    მიუხედავად იმისა, რომ მოპსები ჯანმრთელობის პრობლემებისადმი არიან მიდრეკილი, კომპეტენტური ზრუნვის პრაქტიკა, რეგულარული ვეტერინარული მოვლა და დაბალანსებული დიეტა მათი ხანგრძლივი და ბედნიერი ცხოვრების გარანტია.

  • ნუტრიციოლოგიური საჭიროებები და კვება

    მოპსის კვებით საჭიროებებზე მორგებულ დიეტას ჯანმრთელობის პოტენციური პრობლემების თავიდან ასაცილებლად და იმუნური სისტემის გასაძლიერებლად არსებითი მნიშვნელობა აქვს. საუკეთესო შემთხვევაში, თქვენი ოჯახის მნიშვნელოვანი წევრის საკვები რაციონი ცილების, ცხიმების, ნახშირწყლების, ვიტამინებისა და მინერალების საბალანსებულ კომბინაციას უნდა მოიცავდეს.

    თუმცა, გახსოვდეთ, რომ პერსონალური კვების გეგმის შესადგენად სასურველია კონსულტაცია ნუტრიციოლოგთან გაიაროთ და სწორედ მისი რეკომენდაციების შესაბამისად შეადგინოთ რაციონი, რომელიც თქვენი ძვირფასი მეგობრის ინდივიდუალურ საჭიროებებს საუკეთესოდ შეესაბამება.

    მაღალი ხარისხის ცხოველური ცილები თქვენი ერთგული კომპანიონის კუნთების განვითარებისთვის აუცილებელია. ამ მიზნით მიღებული მჭლე ხორცი, თევზი და კვერცხი აუცილებელი ამინომჟავების მიწოდებით გააუმჯობესებს თქვენი კომპანიონი ცხოველის ცხოვრების ხარისხს.

    თუ გსურთ რომ თქვენი ოჯახის მნიშვნელოვან წევრს ჯანსაღი კანი და მბზინვარე ბეწვის საფარი ჰქონდეს, დროა ორი მაგიური პროდუქტის – თევზის ზეთისა და სელის თესლის შესახებ შეიტყოთ. მიუხედავად იმისა, რომ ამ პროდუქტებში  შემავალი ჯანსაღი ცხიმები დაბალანსებული დიეტის განუყოფელი ნაწილია, სიმსუქნის პრევენციისთვის, მათი პორციის კონტროლს არსებითი მნიშვნელობა აქვს.

    სასურველია, დაბალანსებული დიეტა მარცვლეულთან ერთად მრავალფეროვან ხილსა და ბოსტნეულსაც მოიცავდეს. მარცვლეულისა და ბოსტნეულის მსგავსი რთული ნახშირწყლები, ფაგებისთვის მდგრადი ენერგიის წყაროა, რომელიც მათ ორგანიზმს აუცილებელი ვიტამინებითა და მინერალებით ამარაგებს.

    თვალებთან და სახსრებთან დაკავშირებულუ გენეტიკური დაავადებების თავიდან ასაცილებლად დარწმუნდით, რომ თქვენი ოჯახის მნიშვნელოვანი წევრი კალციუმთან და ფოსფორთან ერთად A და D ვიტამინებსაც სათანადო ოდენობით იღებს.

    ჭარბწონიანობისკენ მიდრეკილების გამო, კვების რეგულარული გრაფიკის შემუშავება და საკვების დღიური ნორმის ორ-სამ კვებაზე განაწილება განსაკუთრებით მნიშვნელოვანია. ნუტრიციოლოგთან კონსულტაცია მოპსის ასაკის, წონისა და აქტივობის დონის მიხედვით პორციის შესაბამისი ზომის განსაზღვრაში დაგეხმარებათ.

  • ჯიშის წარმოშობის ისტორია

    ლაღი პიროვნების მიღმა არსებული მდიდარი ისტორია, სახეობას მეტ უნიკალურობას მატებს. მოპსი უძველესი ჯიშია, რომელიც დაახლოებით 2000 წლის წინ, სპეციალურად ჩინეთში მცხოვრები დიდგვაროვნებისთვის შექმნეს. ჰანის დინასტიის იმპერატორები უპირატესობას პატარა ზომის ბრტყელსახიან  კომპანიონ ცხოველებს ანიჭებდნენ. შესაბამისად, შორეული აღმოსავლეთის ძლევამოსილი ჯიშების მსგავსად, უნიკალური გარეგნობისა და პიროვნული თვისებების გამო, მოპსი ნამდვილ საგანძურად მიიჩნეოდა ჩინეთში.

    მე-16 საუკუნეში, ამ უნიკალური კომპანიონი ცხოველის ცნობადობა აზიის ფარგლებს გასცდა. ჰოლანდიელმა ვაჭრებმა ოჯახის ეს მნიშვნელოვანი წევრი ევროპას გააცნეს. ამ უნიკალურმა სახეობამ სწრაფად დაიპყრო ევროპელი თავადაზნაურობის გული და მათი განსაკუთრებული სიყვარული დაიმსახურა. ამ ჯიშის ერთ-ერთმა წარმომადგენელმა ჰოლანდიის პრინცი ესპანეთის ჯარების ბანაკზე თავდასხმის შესახებ ყეფით გააფრთხილა და ამით მისი სიცოცხლე გადაარჩინა. ამ დამსახურების გამო, მოპსი ნიდერლანდების სამეფო ოჯახის თილისმად იქცა.

    ინგლისში ოფიციალური ვიზიტის დროს ჰოლანდიის მონარქს თან რამდენიმე მოპსი ახლდა. ინგლისის სამეფო ოჯახი ამ უნიკალური სახეობის პიროვნული თვისებებით მოიხიბლა. სწორედ ამ მომენტიდან დაიწყო ბრიტანელების ამ ჯიშით გატაცება და მოპსის ცნობადობის ფართო მასშტაბით გავრცელება.