გამორჩეული ვიზუალური მახასიათებლების გარდა, ბრიტანული მოკლებეწვიანი ამაყობს პიროვნებით, რომელიც ოჯახებს მთელი მსოფლიოს მასშტაბით აბედნიერებს. ამ ჯიშის წარმომადგენლებს ხშირად კატების სამყაროს “ჯენტლმენებადაც” კი მოიხსენიებენ. 

მეტისი კატების მსგავსად, ბრიტანული მოკლებეწვიანისთვისაც არ წარმოადგენს პრობლემას ძაღლებთან ჰარმონიული თანაცხოვრება. ისინი ოჯახის ყველა წევრისადმი ავლენენ სიყვარულს და განსაკუთრებულ ლოიალურობას მცირეწლოვანი ბავშვების მიმართ იჩენენ. თუ დაკავებული ადამიანი ბრძანდებით და კომპანიონი ცხოველის ყოლაზე უარს თქვენი გრაფიკის გამო ამბობთ, თქვენთვის შესანიშნავი ამბავი გვაქვს! ბრიტანული მოკლებეწვიანი ის გამონაკლისი კომპანიონი ცხოველია, რომლისთვისაც სახლში მარტო დარჩენა სულაც არ წარმოადგენს პრობლემას.

ეს გასაოცარი არსებები განსაკუთრებით აფასებენ ოჯახის წევრების მიერ მათდამი გამოვლენილ სითბოს, თუმცა, დამოუკიდებელი ბუნების გამო, არასდროს ითხოვენ ზედმეტ ყურადღებას. ბრიტანულ მოკლებეწვიანს რუტინისა და სტაბილურობის შეგრძნება ხიბლავს. ოჯახის ეს მნიშვნელოვანი წევრები მშვიდ გარემოში ცხოვრებისთვის არიან შექმნილნი და, როგორც წესი, ქცევის უეცარი ცვლილებებისადმიც არ არიან მიდრეკილნი.

პოლიკისტოზი

პოლიკისტოზი გენეტიკური დაავადებაა, რომელიც სითხით სავსე ცისტების ფორმირებას და თირკმელების ფუნქციის დაკარგვას იწვევს. დაავადების გავრცელების პრევენციისთვის პოლიკისტოზის გენის მატარებელი კომპანიონი ცხოველის იდენტიფიცირება და გამრავლების პროცესისთვის მათი შეუსაბამოდ გამოცხადებაა საჭირო.

თირკმლის ფუნქციის მხარდასაჭერად შესაძლოა სპეციალიზებული დიეტის დაცვა გახდეს საჭირო. ამ პროცესის წარმართვა მხოლოდ გამოცდილ ნუტრიციოლოგთან თანამშრომლობის საფუძველზეა რეკომენდირებული. სისხლის ანალიზები, ხშირი ვეტერინარული შემოწმება და კომპანიონ ცხოველზე კომპეტენტური ზრუნვის პრაქტიკა დაავადების მართვაში და მკურნალობის სტრატეგიის კორექტირებაში დაგეხმარებათ.

ჰიპერტროფიული კარდიომიოპათია

ჰიპერტროფიული კარდიომიოპათია გულის დაავადებაა, რომელიც გულის კუნთების, განსაკუთრებით მარცხენა პარკუჭის, გასქელებას იწვევს. დაავადებამ შესაძლოა გულის უკმარისობა და სხვა გულ-სისხლძარღვთა პრობლემები გამოიწვიოს.

რუტინული ვეტერინარული გამოკვლევები გულის დაავადების ადრეული ნიშნების გამოვლენაში დაგეხმარებათ. ამ გენეტიკური დაავადების პრევენციისთვის სელექციონერებმა ჰიპერტროფიული კარდიომიოპათიისადმი მიდრეკილი კატების იდენტიფიცირებასა და მათი გამრავლების თავიდან აცილებაზე უნდა იზრუნონ. 

კარდიომიოპათიით გამოწვეული სიმპტომების სამართავად და დაავადების პროგრესირების შესანელებლად ვეტერინარები ხშირად მედიკამენტებით მკურნალობას მიმართავენ. სრულფასოვანი მკურნალობის გეგმა და გულის ჯანმრთელობის მუდმივი მონიტორინგი თქვენი ოჯახის მნიშვნელოვანი წევრის ჯანმრთელობის გარანტია. თუმცა, ნუტრიციოლოგთან თანამშრომლობა და მისი რეკომენდაციის საფუძველზე სპეციალიზებული დიეტის დაცვა გულის ჯანმრთელობისთვის არანაკლებ მნიშვნელოვანია.

აუტოიმუნური ლიმფოპროლიფერაციული სინდრომი 

აუტოიმუნური ლიმფოპროლიფერაციული სინდრომი იშვიათი გენეტიკური დაავადებაა, რომელიც იმუნურ სისტემაზე ახდენს გავლენას. მისმა განვითარებამ შესაძლოა ანემია და იმუნიტეტთან დაკავშირებული სხვა გართულებები გამოიწვიოს. ლიმფოპროლიფერაციულ სინდრომზე პასუხისმგებელი გენის იდენტიფიცირებას სინდრომის პრევენციისთვის გადამწყვეტი მნიშვნელობა აქვს.

ორგანიზმის იმუნური პასუხის სამართავად შესაძლოა იმუნოსუპრესიული პრეპარატებით მკურნალობა გახდეს საჭირო. დაავადებით გამოწვეული ანემიის მძიმე შემთხვევებში, სისხლის წითელი უჯრედების დონის ასამაღლებლად ხშირად სისხლის გადასხმაც რეკომენდირებულია. კომპანიონი ცხოველის მდგომარეობის მონიტორინგისთვის და, საჭიროებისამებრ, მკურნალობის გეგმის კორექტირებისთვის რეგულარულ ვეტერინარულ შემოწმებას განსაკუთრებული მნიშვნელობა აქვს.

ჯიშის სპეციფიკური დიეტური საჭიროებების სათანადოდ გააზრება კომპეტენტური ზრუნვის აუცილებელი წინაპირობაა. ბრიტანული მოკლებეწვიანი კატების სათანადოდ გამოკვება მათი კეთილდღეობის უზრუნველსაყოფად და ჯანმრთელობის პოტენციური პრობლემების თავიდან ასაცილებლად განსაკუთრებით მნიშვნელოვანია. 

როგორც კომპეტენტურ მშობელს, გირჩევთ შეარჩიოთ მაღალი ხარისხის დაბალანსებული საკვები, რომელიც ზრდასრული კატების ნუტრიციოლოგიური მოთხოვნილებების დასაკმაყოფილებლად, ჯანსაღი წონის შესანარჩუნებლად და ჯიშის საერთო კეთილდღეობის მხარდასაჭერად არის შექმნილი. უპირატესობა მიანიჭეთ საკვებს, რომელიც ხელოვნურ დანამატებს არ შეიცავს.

მკვრივი აღნაგობის გამო, შესაძლოა თქვენი ოჯახის მნიშვნელოვანი წევრი სიმსუქნისკენ იყოს მიდრეკილი. სიმსუქნე ჯანმრთელობის სხვადასხვა პრობლემებს, მათ შორის სახსრების დაავადებებსა და დიაბეტს იწვევს. კომპანიონი ცხოველისთვის საკვების გაზომილი რაოდენობით მიწოდება და კვების რეგულარული გრაფიკის დაწესება ზედმეტი კალორიების მიღების თავიდან აცილებაში დაგეხმარებათ. თქვენი ოჯახის მნიშვნელოვანი წევრისთვის შესაფერისი კალორიების დღიური ნორმის დასადგენად კონსულტაცია ნუტრიციოლოგთან გაიარეთ. გადაწყვეტილების მიღებისას კი მხედველობაში ისეთი ფაქტორები მიიღეთ, როგორიც ასაკი, წონა და აქტივობის დონეა.

თირკმელების პრობლემებისადმი მიდრეკილების გამო, სასმელ წყალზე წვდომის უზრუნველყოფა თქვენი ოჯახის მნიშვნელოვანი წევრისთვის სასიცოცხლოდ მნიშვნელოვანია. კომპანიონი ცხოველების ორგანიზმის სათანადო ჰიდრატაციას, წყლის მიღებასთან ერთად სველი საკვების მიწოდებითაც შეგიძლიათ შეუწყოთ ხელი. 

გახსოვდეთ, რომ თქვენი საკვების ოთხფეხა მეგობრისთვის გაზიარებისას განსაკუთრებული სიფრთხილე გმართებთ. კომპანიონი ცხოველისთვის თქვენი საკვების შეთავაზებით შესაძლია კვების დისბალანსი გამოიწვიოთ. მოერიდეთ თქვენი ბრიტანული მოკლებეწვიანისთვის ისეთი საკვების შეთავაზებას, რომელიც ტოქსიკურია კატებისთვის. ამ სიაში მოწინავე ადგილს ხახვი, ნიორი, შოკოლადი, უმი კვერცხი, ყურძენი და ქიშმიში იკავებს. შესაძლოა ამ ნივთიერებებმა ჯანმრთელობის სერიოზული პრობლემები გამოიწვიოს, ამიტომ მათი თავიდან აცილება სასიცოცხლოდ მნიშვნელოვანია.

თუ გსურთ დარწმუნდეთ, რომ თქვენი ოჯახის მნიშვნელოვან წევრზე კომპეტენტურად ზრუნავთ, გირჩევთ, კვებასთან დაკავშირებული ნებისმიერი საკითხი ნუტრიციოლოგთან შეათანხმოთ. ჯიშის სპეციფიკური საჭიროებების გათვალისწინებით, დაბალანსებული დიეტით და პორციების კონტროლით, თქვენი საყვარელი კომპანიონი ცხოველის ცხოვრების უკეთესობისკენ შეცვლას შეძლებთ.

ბრიტანულ მოკლებეწვიანს მდიდარი ისტორია აქვს, რომელიც სათავეს უძველესი დროიდან იღებს. ჯიშის წარმოშობა შესაძლოა ბრიტანეთში ჩვენს წელთაღრიცხვამდე პირველ საუკუნეში შეჭრილ რომაულ ლეგიონებს და მათ თანმხლებ შინაურ კატებს უკავშირდებოდეს. დროთა განმავლობაში, რომაული წარმოშობის კატები ადგილობრივი კატების პოპულაციასთან შეწყვილდა და შედეგადაც წარმოიქმნა უნიკალური ჯიში, რომელიც მტკიცე ჯანმრთელობითა და გამძლე ფიზიკური აღნაგობით არის ცნობილი.

საუკუნეების განმავლობაში, ბრიტანული მოკლებეწვიანი ბრიტანეთის მკაცრ კლიმატთან ადაპტირდა და კუნძულის კულტურული და სოციალური ცხოვრების განუყოფელი ნაწილი გახდა. თუმცა, მხოლოდ მე-19 საუკუნის ბოლოს დაიწყო ამ ჯიშის შერჩევითი მოშენება. ამ პერიოდში, კატების მოყვარულთა საზოგადოებების ჩამოყალიბებამ ენთუზიასტებს ჯიშის დახვეწის შესაძლებლობა მისცა.

1871 წელს, როდესაც ჰარისონ უეირმა კატების პირველი ჩვენება მოაწყო ლონდონის კრისტალ პალასში, სხვა გამორჩეულ ჯიშებთან ერთად უნიკალური ფიზიკური და პიროვნული მახასიათებლების მქონე ბრიტანულმა მოკლებეწვიანმაც გამოიჩინა თავი. ამ პერიოდში, სახეობას “ბრიტანული ცისფერის” სახელით მოიხსენიებდნენ. შოუმ მნიშვნელოვნად აამაღლა ჯიშის ცნობადობა და მათი მოშენების მიმართ განსაკუთრებული ინტერესი გააჩინა. 

მე-20 საუკუნის დასაწყისში ბრიტანული მოკლებეწვის გარეგნობის სტანდარტიზაციას შეეცადნენ. სელექციონერებმა ჯიშის ბეწვისა და სხეულის სტრუქტურის გასაუმჯობესებლად ბრიტანული მოკლებეწვიანის სპარსულ კატებთან შეწყვილება დაიწყეს.

ბრიტანეთის გლობალური გავლენის გავრცელებასთან ერთად, ბრიტანული მოკლებეწვიანის ცნობადობამაც ახალ სიმაღლეებს მიაღწია. ამ ჯიშის წარმომადგენლები შორეულ მოგზაურობებში ხშირად ახლდნენ თან ბრიტანელ მკვლევარებს, მოვაჭრეებსა და მოგზაურებს. ჯიშის უნიკალურმა გარეგნობამ და მეგობრულმა ტემპერამენტმა ყველა კონტინენტზე დაიმსახურა ადამიანების აღფრთოვანება.