• ზომა

ინგლისური პოინტერის ჯიშის ორივე სქესის წარმომადგენელი სიმაღლეში 58-71 სანტიმეტრს აღწევს. სხვა ფიზიკურ მონაცემებს რაც შეეხება, მათი სიგრძე 86-104 სანტიმეტრის ფარგლებში მერყეობს.

• წონა

ინგლისური პოინტერის წონასთან დაკავშირებული ინდივიდუალური შემთხვევები გენეტიკის, დიეტისა და ჯანმრთელობის მდგომარეობის შესაბამისად იცვლება. თუმცა, ჩვეულებისამებრ, ჯიშის ზრდასრული წარმომადგენლები 16-დან 34 კილოგრამამდე იწონიან. 

• სიცოცხლის ხანგრძლივობა

ინგლისური პოინტერის სიცოცხლის ხანგრძლივობა 12-დან 16 წლამდე მერყეობს და ადამიანის ცხოვრების დაახლოებით 69-78 წელს უტოლდება. თუმცა, გახსოვდეთ, ეს ციფრები მხოლოდ პირობითია და თქვენი ოჯახის მნიშვნელოვანი წევრის სიცოცხლის ხანგრძლივობა მისი ცხოვრების ჯანსაღ წესსა და ჰარმონიულ საარსებო გარემოზეა დამოკიდებული.

• ბეწვის საფარი

ინგლისური პოინტერის მოკლე ბეწვი მინიმალურ მოვლას საჭიროებს. ბეწვის ბზინვარებისა და კანის ჯანმრთელობის შესანარჩუნებლად, ოჯახის ამ მნიშვნელოვან წევრებს მხოლოდ ყოველკვირეული გრუმინგი ესაჭიროებათ. აბაზანას რაც შეეხება, ჩვეულებისამებრ, ეს პროცედურა ყოველთვიურად, იმისდა მიხედვითაა რეკომენდირებული, თუ რამდენად ხშირად ბინძურდება ჩვენი კომპანიონი ცხოველი. 

ინგლისური პოინტერი მეგობრული და მოსიყვარულე ხასიათით გამორჩეული ჯიშია. ოჯახის ეს მნიშვნელოვანი წევრები სხვა კომპანიონ ცხოველებთან ცხოვრებასაც იოლად ეგუებიან. განსაკუთრებით მაშინ, თუ ადრეული ასაკიდან იზრდებიან მათთან ერთად. ისინი მჭიდროდ არიან დაკავშირებული ოჯახებთან და არასდროს ამბობენ უარს კომპანიონ ადამიანებთან ერთად დროის მხიარულად გატარებაზე.

ჯიშის წარმომადგენლები ნაკლებად შეეფერებიან ბინაში ან ქალაქში ცხოვრებას. ჩვეულებისამებრ, ფიზიკური აქტივობისთვის მათ მოზრდილი ზომის სახლი და დიდი ეზო ესაჭიროებათ.

ინგლისური პოინტერის წვრთნა მოთმინებას საჭიროებს. თუმცა, გაწეული შრომა შედეგად ნამდვილად ღირს. ოჯახის ეს მნიშვნელოვანი წევრები სამძებრო-სამაშველო საქმესთან ერთად თერაპიული ფუნქციების შესრულების დროსაც გასაოცარ გონიერებას ავლენენ.

წვრთნის პროცესში მხოლოდ პოზიტიური მეთოდები გამოიყენეთ და ხშირად შეაქეთ თქვენი ოთხფეხა მეგობარი. გახსოვდეთ, ინგლისური პოინტერი განსაკუთრებით მკაცრი ტონის მიმართ არიან მგრძნობიარე. ამიტომ, იყავით მომთმენი და თანმიმდევრულობა გამოიჩინეთ მითითებების გაცემისას. 

ბარძაყის დისპლაზია

ბარძაყის დისპლაზია მენჯ-ბარძაყის სახსრის ნაწილობრივ ან სრულ ამოვარდნას გულისხმობს. ბარძაყის დისპლაზიამ შესაძლოა ძვლის ცვეთა და ამ პროცესთან დაკავშირებული ტკივილი გამოიწვიოს. 

კომპანიონი ცხოველების უმრავლესობას ბარძაყის დისპლაზია დაბადებიდანვე აქვს. თუ დაავადების დიაგნოზირება ადრეულ ეტაპზე მოხდება, პრობლემის გამოსწორებას იოლად შეძლებთ. სხვა შემთხვევებში, ძვლების მდებარეობის შესაცვლელად შესაძლოა ოპერაცია გახდეს საჭირო. 

მიუხედავად იმისა, რომ ამ დაავადების განვითარებაში გენეტიკა მნიშვნელოვან როლს ასრულებს, სახსრებზე დატვირთვის შესამცირებლად ჯანსაღი წონის შენარჩუნებას განსაკუთრებული მნიშვნელობა აქვს. 

ჰიპოთირეოზი

ჰიპოთირეოზი ფარისებრი ჯირკვლის დაავადებაა. ჰიპოთირეოზის მქონე კომპანიონ ცხოველებში ფარისებრი ჯირკვალი ორგანიზმის ნორმალური ფუნქციონირებისთვის საჭირო  რაოდენობის თირეოიდულ ჰორმონებს ვერ გამოიმუშავებს. თირეოიდული ჰორმონების შემცირებული რაოდენობა კი ორგანიზმის ნორმალურ ფუნქციონირებას აფერხებს და შედეგად ისეთ სიმპტომებს იწვევს, როგორიც კანის სიმშრალე, დაღლობა და უენერგიობაა. 

ფარისებრი ჯირკვლის ჯანმრთელობისთვის იოდით მდიდარი დაბალანსებული დიეტაა საჭირო. რეგულარული ვეტერინარული შემოწმება და ფარისებრი ჯირკვლის ფუნქციის ტესტირება ამ მდგომარეობის დროულ იდენტიფიცირებასა და მართვაში დაგეხმარებათ. 

სიცოცხლის ადრეულ ეტაპზე, სწორი ზრდა-განვითარებისთვის, ინგლისურ პოინტერს მაღალი ხარისხის ლეკვის საკვები ესაჭიროება. სრულად დაბალანსებული პრემიუმ მშრალი საკვები ოჯახის ამ მნიშვნელოვან წევრებს იმუნური სისტემის გაძლიერებასთან ერთად, ფეკალური მასისთვის დამახასიათებელი უსიამოვნო სუნის შემცირებაშიც დაეხმარება.  

ჩვეულებისამებრ, ლეკვებს დღეში 3-4 ჯერ ესაჭიროებათ კვება. მათთვის რეკომენდირებული საკვების დღიური ოდენობის შესახებ ინფორმაციას პროდუქტის შეფუთვაზე დატანილი ეტიკეტიდან მიიღებთ. 

კვლევებმა აჩვენა, რომ ლეკვებთან შედარებით ზრდასრულ ძაღლებს ორჯერ უფრო ნაკლები ენერგია ესაჭიროებათ. ცხოვრების ამ ეტაპზე, ჩვენი ოჯახის მნიშვნელოვანი წევრების ნუტრიციოლოგიური საჭიროებები იცვლება. ამ პერიოდში, მათი ნაწლავების ჯანსაღი მიკროფლორის შენარჩუნებასა და საჭმლის მომნელებელი სისტემის ეფექტური ფუნქციონირების მხარდაჭერაზე უნდა ვიზრუნოთ.  ამისთვის, ჩვენს ინგლისურ პოინტერს სპეციალურად საშუალო ჯიშებისთვის შექმნილი მაღალი ხარისხის საკვებით უნდა გავუმასპინძლდეთ. 

ხარისხიანი საკვები ჩვენი ოთხფეხა მეგობრის განვითარების ყველა ეტაპზე უზრუნველყოფს სიცოცხლისთვის საჭირო აუცილებელი ვიტამინების სწორ ბალანსს. თუმცა, თუ თქვენი ინგლისური პოინტერის კვებასთან  დაკავშირებული პერსონალური რჩევების მიღებას გადაწყვეტთ, გირჩევთ კონსულტაცია ნუტრიციოლოგთან გაიაროთ. 

ინგლისური პოინტერის წარმომავლობა გარკვეულწილად ბუნდოვანია. თუმცა, გავრცელებული მოსაზრების თანახმად, ოჯახის ეს მნიშვნელოვანი წევრები იმ ესპანელი პოინტერების შთამომავლები არიან, რომლებიც ინგლისში 1700-იან წლებში ჩამოიყვანეს. ისტორიკოსები მიიჩნევენ, რომ შესაძლოა ჯიშის სელექციის პროცესში გრეიჰაუნდი, ნიუფაუნდლენდი, სეტერი და ბულდოგიც კი მონაწილეობდნენ. 

ინგლისური პოინტერის ისტორიისთვის თვალის დევნება ხელოვნების ნიმუშებზე დაკვირვებითაცაა შესაძლებული. ოჯახის ეს მნიშვნელოვანი წევრები XVll-XlX საუკუნეების ფრანგი და ინგლისელი მხატვრების ნამუშევრებზე მრავლად არიან წარმოდგენილი. 

კონტინენტურ პოინტერთან შედარებით, ინგლისური პოინტერი უფრო პატარა და სწრაფი ძაღლია. სწორედ ამ ფიზიკური მახასიათებლების გამო  იყენებდნენ მას კურდღლებზე ნადირობის პროცესში. Kennel Club-მა ჯიში ოფიციალურად 1884 წელს აღიარა. დღეს პოინტერები მხოლოდ ნადირობისთვის აღარ გამოიყენებიან. ისინი სამძებრო-სამაშველო საქმიანობასთან ერთად, თერაპიულ ფუნქციებსაც განსაკუთრებული წარმატებით ასრულებენ.