მალტეზე პატარა და მოსიყვარულე მინიატურული ჯიშია. მცირე ზომის მიუხედავად, ის საკმაოდ ფხიზელი და უშიშარი კომპანიონია. ჯიშის წარმომადგენლები განსაკუთრებით მოსიყვარულეები კომპანიონი ადამიანების მიმართ არიან. თუმცა, დამცველობითმა ინსტიქტმა შესაძლოა ისინი გარკვეულწილად აგრესიული გახადოს უცხო ადამიანების მიმართ. 

არისტოკრატული წარმოშობის მიუხედავად, მალტეზე გამძლე და ადაპტირებადი შინაური ცხოველია. ის დიდხანს ცხოვრობს და ახალი მეგობრების შეძენაძეც არასოდეს ამბობს უარს. ზოგჯერ ჯიუტები და მიზანმიმართულები არიან, თუმცა ჯილდოზე დაფუძნებულ წვრთნაზე ყოველთვის დადებითად რეაგირებენ.

ჯიშის წარმომადგენელთა უმრავლესობას განშორების შფოთვა ახასიათებს. ამიტომ, საუკეთესო შემთხვევაში, მალტეზე ისეთ სახლში უნდა ცხოვრობდეს, სადაც, დღის განმავლობაში, ყოველთვის იქნება მასთან ერთად ოჯახის ერთი წევრი მაინც. დიდხანს მარტო დარჩენის შემთხვევაში, შესაძლოა განუწყვეტლივ იყეფონ და დესტრუქციული ქცევაც კი გამოავლინონ. ქცევითი ვარჯიში და სოციალიზაცია შესანიშნავი გზაა მათი შფოთვის სამართავად. 

მცირე ზომის მიუხედავად, ეს პატარა ცხოველები საკმაოდ თავდაჯერებულები  და ზოგჯერ ჯიუტებიც კი არიან. ამიტომ ადრეული სოციალიზაცია და წვრთნა მათთვის განსაკუთრებით სასარგებლოა. საბედნიეროდ, გონიერი მალტეზეები ყველაფერს სწრაფად ითვისებენ და, ყეფის თვალსაზრისით, შესანიშნავ მცველებად ყალიბდებიან. 

სხვა ჯიშებთან შედარებით, მალტეზეს ნაკლები ვარჯიში სჭირდება, რომ თავი ბედნიერად იგრძნონ. მათთვის ხანმოკლე ყოველდღიური გასეირნებაც საკმარისია.

მუხლის ქუდის დისლოკაცია

მუხლის ქუდის დისლოკაცია მემკვიდრეობითი პრობლემაა. ამ პრობლემით გამოწვეული დისკომფორტის თავიდან ასაცილებლად რეგულარული ვარჯიში და ჯანსაღი წონის შენარჩუნებაა საჭირო. უცხიმო ხორცის, კვერცხის, მაღალი ხარისხის ცილის, კალციუმისა და ფოსფორის დაბალანსებულად მიღება თქვენი ოჯახის მნიშვნელოვან წევრს კუნთების სწორად განვითარებაში დაეხმარება. 

მუხლის ქუდის დისლოკაციასთან დაკავშირებული მძიმე შემთხვევების გამოსასწორებლად შესაძლოა მაკორექტირებელი ოპერაციაც გახდეს საჭირო. თუმცა, რეგულარული ვეტერინარული შემოწმებები მუხლის ქუდის დისლოკაციის ადრეულ ნიშნებს აღმოაჩენს და შესაბამისი ზომების მიღების შესაძლებლობას დაავადების განვითარების ადრეულ ეტაპზე მოგცემთ.

კატარაქტა

კატარაქტა კომპანიონი ცხოველის მხედველობის თანდათანობით გაუარესებას იწვევს. ამ დროს ბროლი, რომელიც ჯანმრთელ თვალში გამჭვირვალეა,  მონაცრისფრო ან რძისფერ შეფერილობას იძენს. 

თანდაყოლილ კატარაქტას, როგორც წესი, დედის ორსულობის დროს გადატანილი ინფექციური დაავადება ან სამშობიარო ტრავმა იწვევს. მიუხედავად იმისა, რომ თანდაყოლილი დაავადებების მართვა ხშირად ჩვენი შესაძლებლობების მიღმაა, C და E ვიტამინებით მდიდარი საკვების მიღება მნიშვნელოვნად გააუმჯობესებს თქვენი ოჯახის მნიშვნელოვანი წევრის თვალის ჯანმრთელობას. 

როგორც კომპეტენტურ მშობელს, გახსოვდეთ, რომ რეგულარული ვეტერინარული შემოწმება და თვალების მზის მავნე ზემოქმედებისგან დაცვა დაავადების ეფექტურად მართვის წინაპირობაა.

მიტრალური სარქვლის დაავადება

მიტრალური სარქვლის დაავადება გულის მარცხენა პარკუჭსა და წინაგულს შორის მდებარე სარქველს დისფუნქციურს ხდის. შესაძლოა ამ დროს, სარქვლის კარედები ბოლომდე არ დაიხუროს და ამან სისხლის უკან, მარცხენა წინაგულში გადასვლა გამოიწვიოს. მკურნალობის გარეშე, ამ მდგომარეობამ შესაძლოა გულის კუნთის დაზიანება გამოიწვიოს. დაავადების თავიდან ასაცილებლად განსაკუთრებით მნიშვნელოვანი ვეტერინართან ვიზიტების დროული დაგეგმვა, წონის მონიტორინგი და სპეციალურად ძაღლებისთვის შექმნილი, მაღალი ხარისხის საკვების მიღებაა. 

მალტეზე სპეციალურად ძაღლებისთვის შექმნილი მაღალი ხარისხის საკვებით უნდა გამოვკვებოთ. წინააღმდეგ შემთხვევაში, შესაძლოა მათი ჯანმრთელობა და სიცოცხლის ხანგრძივობა საფრთხის წინაშე აღმოჩნდეს. მალტეზესთვის საკვების შერჩევისას, გირჩევთ ისეთი ფაქტორები გაითვალისწინოთ, როგორიც მისი ასაკი, ცხოვრების წესი, აქტივობის დონე, ფიზიოლოგიური მდგომარეობა და ჯანმრთელობაა. 

სწრაფი მეტაბოლიზმის გამო, მინიატურული ზომის ძაღლები ენერგიას დიდი ტემპით წვავენ. თუმცა, მათი პატარა კუჭი საკვების ხშირ და ამავდროულად, მცირე ულუფებით მიღებას საჭიროებს. საკვებისადმი მგრძნობელობა და გენეტიკური წინასწარგანწყობა ამ პროცესში განსაკუთრებით საყურადღებოა. ასეთ შემთხვევაში, თქვენი კომპანიონი ცხოველისთვის რეკომენდირებული კვების რაციონის შედგენაში ნუტრიციოლოგის დახმარება დაგჭირდებათ. 

საკვები კომპანიონი ცხოველებისთვის სასიცოცხლო ფუნქციების მხარდასაჭერად საჭირო ენერგიას უზრუნველყოფს. 8 თვის ასაკამდე მალტეზეს ლეკვების იმუნური სისტემა ეტაპობრივი განვითარების პროცესშია. მათი საჭმლის მომნელებელი ტრაქტი ჯერ კიდევ არ არის მომწიფებული და სწორედ ამიტომ არის მნიშვნელოვანი მას სპეციალურად ლეკვებისთვის შექმნილი საკვებით გავუმასპინძლდეთ. 

მნიშვნელოვანია, მალტეზე მთელი ცხოვრების განმავლობაში მოვარიდოთ ადამიანის საკვებს და მისთვის ცხიმიანი საჭმლის მიცემისგანაც შევიკავოთ თავი. კვების გრაფიკის დაცვა ჩვენი კომპანიონი ცხოველის ცხოვრების ნებისმიერ ეტაპზეა აუცილებელი. ამიტომ, საუკეთესო შემთხვევაში, სწორედ საკვების შეფუთვაზე მოცემული კვების მითითებების დაცვა გვმართებს. 

მალტეზეს ჯიში მალტაში, ხმელთაშუა ზღვის საზღვაო პორტში, წარმოიშვა. ოჯახის ეს მნიშვნელოვანი წევრები ერთ-ერთი ყველაზე ძველი წარმომავლობის მინიატურული კომპანიონი ცხოველები არიან. ისტორიული ჩანაწერებიდან ცნობილი ხდება, რომ მალტეზე მაღალი საზოგადოების კომპანიონი ცხოველი გახლდათ და არისტოკრატი ქალბატონების განსაკუთრებული სიყვარულით სარგებლობდა. 

ჯიში სავარაუდოდ, ბერძების გამოჩენამდე, ფინიკიელების დამსახურებით აღმოჩნდა კუნძულზე. მოგვიანებით, ბერძნები ჯიშით იმდენად მოიხიბლნენ, რომ მალტეზეს სრულყოფილ პროპორციებს თავად არისტოტელე და სტრაბონიც კი განიხილავდნენ. 

წლების განმავლობაში, მალტეზეს ჯიშის წარმომადგენლებს მრავალი სახელით მოიხსენიებდნენ. მათ შორის, “მალტის ძაღლი”, “რომაელი ქალბატონების კომპანიონი”, “კომფორტერი”, “მალტეზ ტერიერი” და “ბიშონი”. 

ლეგენდის თანახმად, მალტაზე გემით ჩასულმა წმინდა პავლემ, რომაელი გუბერნატორის მამის განკურნების შემდეგ, მადლიერების ნიშნად სწორედ მალტეზე მიიღო საჩუქრად. რომაულ ხანაში მალტეზეს ჯიშის ფლობა განსაკუთრებულ პრივილეგიად აღიქმებოდა, ამიტომ ოჯახის ამ მნიშვნელოვან წევრებს არც დიდგვაროვანი ქალბატონები იშორებდნენ გვერდიდან. 

მე-16 საუკუნეში, მალტეზეს პოპულარობა საზღვრებს გასცდა და მთელი ევროპა მოიცვა. შოტლანდიის დედოფალთან ერთად, ინგლისისის დედოფალი ვიქტორია და ელიზაბეტ I-იც ფლობდნენ ამ შესანიშნავ მინიატურულ ჯიშს.