სიამის კატებს მოსიყვარულე და გონიერი კომპანიონი ცხოველების რეპუტაცია აქვთ. ცნობისმოყვარე ბუნებისა და ინტელექტის მაღალი დონის გამო სიამის გაწვრთნა საკმაოდ მარტივია. ისინი სიამოვნებით ისეინებენ თქვენთან ერთად და საკუთარი ინტერესებისა და სურვილების დაკმაყოფილებასთან ერთად თქვენს კომფორტზეც განსაკუთრებული მონდომებით იზრუნებენ.

სოციალური ხასიათის გამო, სიამის კატები ხშირად კომპანიონი ადამიანებისადმი ღრმა მიჯაჭვულობას ავლენენ და ფიზიკურ სიახლოვესთან ერთად ვერბალურ კომუნიკაციასაც საჭიროებენ. ისინი სწრაფად ეჩვევიან ახალ გარემოს და ოჯახის წევრებთან ერთად თამაშითაც სიამოვნებით ირთობენ თავს. ამგვარი ერთგულება სიამებს შესანიშნავ თანამგზავრებად აქცევს მათთვის, ვისაც გვერდით მოსიყვარულე ოთხფეხა მეგობრის ყოლა სურს. 

მეგობრული ტემპერამენტის გარდა, მეტისი კატების მსგავსად, სიამის კატებიც უნიკალური ვოკალიზაციითაც გამოირჩევიან. ისინი ვოკალურ შესაძლებლობებს ოჯახის წევრებთან კომუნიკაციისთვის, პირადი საჭიროებების გადმოსაცემად ან უბრალოდ ყურადღების მისაქცევად იყენებენ. ცნობისმოყვარე და თავგადასავლების  მაძიებელი ბუნების გამო, შემაღლებულ ადგილებზე მოკალათება და გარემოს ყურადღებით თვალიერება სიამის კატების საყვარელი გასართობია.

ასთმა

ასთმა ადამიანების მსგავსად კომპანიონ ცხოველებშიც ჰაერის უკმარისობას იწვევს. გარკვეულ შემთხვევებში ასთმისთვის დამახასიათებელი სიმპტომები მოულოდნელად, ფილტვებში არსებული სასუნთქი გზების შევიწროვებასთან ერთად ვითარდება. ასთმის შეტევების თავიდან ასაცილებლად, გირჩევთ, კვამლის, ძლიერი სუნისა და გარემოს დამაბინძურებლების ზემოქმედება მინიმუმამდე შეამციროთ. 

რესპირატორული ჯანმრთელობის მონიტორინგისა და ასთმის სიმპტომების ადრეულ ეტაპზე გამოსავლენად რეგულარულ ვეტერინარულ შემოწმებასთან ერთად ჰაერის სათანადო ხარისხის შენარჩუნებას და კარგად ვენტილირებადი სივრცის უზრუნველყოფას არსებითი მნიშვნელობა აქვს.

ბადურის პროგრესირებადი ატროფია 

ატროფია ბადურის თანდათანობით გადაგვარებას და მხედველობის დაკარგვას იწვევს. აღნიშნული დაავადება კომპანიონ ცხოველებს მემკვიდრეობით გადაეცემათ. ბადურის ჯანმრთელობის შენარჩუნებაში თვალის რეგულარული გამოკვლევები და ანტიოქსიდანტებით მდიდარი დიეტა დაგეხმარებათ.

ოჯახის მნიშვნელოვანი წევრის შეძენამდე ყურადღებით გამოიკვლიეთ მისი გენეტიკა და დარწმუნდით, რომ თქვენს პატარა მეგობარს მხედველობასთან დაკავშირებული პრობლემებისადმი გენეტიკური მიდრეკილება არ აქვს. 

ნაწლავის ადენოკარცინომა

ნაწლავის ადენოკარცინომა ონკოლოგიური დაავადებაა, რომელიც ნაწლავის ლორწოვან გარსში ანომალიური უჯრედების წარმოქმნის შედეგად ვითარდება. ნაწლავის ადენოკარცინომით დაავადებული კომპანიონი ცხოველების უმრავლესობას დაავადება ხანდაზმულ ასაკში უვითარდება. რაც უფრო ემატება ასაკი ჩვენი ოჯახის მნიშვნელოვან წევრს, მით უფრო დიდია დაავადების განვითარების ალბათობა. 

ჩვენმა ოთხფეხა მეგობარმა ნაწლავის ადენოკარცინომა შესაძლოა მემკვიდრეობით მიიღოს. სწორედ ამიტომ არის მნიშვნელოვანი, რომ სიამის კატა პასუხისმგებლიანი სელექციონერისგან შეიძინოთ და დარწმუნდეთ, რომ ის გენეტიკური დაავადებებისგან დაცულია. 

ცხოვრების პასიური წესი და ცხიმიანი საკვების მიღება ნაწლავში სიმსივნური წარმონაქმნების გაჩენის ალბათობას მნიშვნელოვნად ზრდის. სწორედ ამიტომ, დაავადების პრეცენციისთვის დაბალანსებული დიეტის დაცვას, რეგულარულ ვარჯიშს და რუტინულ ვეტერინარულ გამოკვლევას გადამწყვეტი მნიშვნელობა აქვს.

მედიასტინალური ლიმფომა

მედიასტინალური ლიმფომა დაავადებაა, რომელიც ლიმფური სისტემის უჯრედების დაზიანებას იწვევს. დაავადების დროს ლიმფოციტები სიმსივნური უჯრედების მსგავსად იქცევიან, უკონტროლოდ მრავლდებიან და ლიმფურ კვანძებში გროვდებიან. ვინაიდან, ლიმფოციტები მთელს ორგანიზმში ცირკულირებენ, სიმსივნური წარმონაქმნები შესაძლოა ლიმფური კვანძის გარდა სხეულის სხვა ადგილებშიც წარმოიქმნას. 

გენეტიკური ფაქტორების გარდა მედიასტინალური ლიმფომის გამოწვევა ბაქტერიულ და ვირუსულ ინფექციებსაც შეუძლია. ტემპერატურის მატება, წონის კლება, ჭარბი ოფლიანობა, დაღლილობა და სუნთქვის გაძნელება ის სიმპტომებია, რომელთაც განსაკუთრებული ყურადღება უნდა მიაქციოთ. ნებისმიერი სიმპტომის გამოვლენისთანავე ჩანიშნეთ ვიზიტი ვეტერინართან და დარწმუნდით, რომ თქვენი ოჯახის მნიშვნელოვანი წევრის ჯანმრთელობას საფრთხე არ ემუქრება. 

ამილოიდოზი

ამილოიდოზი იშვიათი დაავადებაა, რომელიც ცილის სხვადასხვა ორგანოში დაგროვებას და მათი ფუნქციონირების დარღვევას იწვევს. ამილოიდოზი კომპანიონი ცხოველების გარკვეულ ნაწილში მსუბუქი სიმპტომებით ვლინდება. თუმცა არის შემთხვევები, როდესაც დაავადება მწვავე გვერდითი მოვლენების თანხლებით მიმდინარეობს. 

ამილოიდოზის სიმპტომები იმაზეა დამოკიდებული თუ რომელი ორგანო აქვს დაზიანებული ჩვენს კომპანიონ ცხოველს, თუმცა, ჩვეულებისამებრ, დაავადებას დაღლილობა და წონაში კლება ახასიათებს. ამილოიდოზის პრევენცია დაბალანსებული დიეტის, რეგულარული ვარჯიშისა და რუტინული ვეტერინარული შემოწმების გზითაა შესაძლებელი. 

პიკა

პიკა საკვებად უვარგისი ნივთიერებების ჭამას გულისხმობს. პიკას დაავადებას ხშირად გონებრივი განვითარების დარღვევას უკავშირებენ. მეცნიერებმა დაადგინეს, რომ ამგვარი კვებითი აშლილობის გამომწვევი მიზეზი შესაძლოა ორგანიზმისთვის სასარგებლო ისეთი ნივთიერებების ნაკლებობა იყოს, როგორიც, რკინა და თუთიაა. პიკას უმეტესად იმ კომპანიონ ცხოველებში ვხვდებით, რომლებიც არასრულფასოვნად, ერთფეროვანი საკვებით იკვებებიან. 

დაავადების თავიდან ასაცილებლად თქვენი ოჯახის მნიშვნელოვან წევრს სასარგებლო ნივთიერებებით მდიდარი საკვებით გაუმასპინძლდით და სხვადასხვა ინტერაქტიული თამაშებით უზრუნველყავით მისი გონებრივი სტიმულაცია. საბედნიეროდ, პიკა დროებითი მოვლენაა და, ჩვეულებისამებრ, მხოლოდ რამდენიმე თვის განმავლობაში გრძელდება.

სიამის კატებზე კომპეტენტური ზრუნვა მათი ნუტრიციოლოგიური მოთხოვნილებების დაკმაყოფილებას, დაბალანსებული დიეტის უზრუნველყოფას და, საჭიროების შემთხვევაში, ნუტრიციოლოგის ხელმძღვანელობით სპეციფიკური საკვები დანამატების მიწოდებას გულისხმობს. 

სწორი დიეტის, რეგულარული ვეტერინარული შემოწმებისა და კომპეტენტური ზრუნვის კომბინაცია სიამის სახელით ცნობილი ელეგანტური და მოსიყვარულე კომპანიონი ცხოველების ჯანმრთელობასა და კეთილდღეობას მნიშვნელოვნად შეუწყობს ხელს.

სიამის კატებს მათი ცხოვრების კონკრეტული ეტაპისთვის განკუთვნილი მაღალი ხარისხის საკვები ესაჭირობათ. სასურველია გაითვალისწინოთ ისიც, რომ ოჯახის ამ მნიშვნელოვან წევრებს სხვა კომპანიონ ცხოველებთან შედარებით მაღალი მეტაბოლიზმი აქვთ. სწორედ ამიტომ, მათთვის ისეთი საკვების მიწოდებაა რეკომენდირებული, რომელიც მათ ენერგეტიკულ დონეს შეესაბამება. თქვენს ოთხფეხა მეგობარს შესაძლოა ასაკის მატებასთან ერთად საკვები რაციონის ცვლილებაც დასჭირდეს. ასეთ დროს, აუცილებლად დაუკავშირდით ნუტრიციოლოგს და კვებასთან დაკავშირებული ნებისმიერი ცვლილება მასთან შეათანხმეთ.

თქვენი ოჯახის მნიშვნელოვანი წევრის კბილებისა და ღრძილების სიჯანსაღის შენარჩუნებაში კატის მშრალი საკვები დაგეხმარებათ. სველი საკვები კი ორგანიზმისთვის საჭირო ჰიდრატაციას უზრუნველყოფს. დარწმუნდით, რომ თქვენს ძვირფასს კომპანიონს მუდმივად აქვს წვდომა სუფთა წყალზე. 

წყლისგან განსხვავებით, საჭმელზე თავისუფალი წვდომის შემთხვევაში, კომპანიონი ცხოველების გარკვეული ნაწილი ჭარბად იკვებება. ამის გათვალისწინებით, თუ ამჩნევთ, რომ თქვენი ოთხფეხა მეგობარი წონაში იმატებს, ნუტრიციოლოგთან კონსულტაციის საფუძველზე შეამცირეთ მისი ულუფების ზომა და კვების სიხშირე. ჭარბწონიანობის  გამომწვევი მიზეზების თავიდან აცილებით თქვენი ოჯახის მნიშვნელოვანი წევრი ხანგრძლივი და ჯანსაღი ცხოვრებით  იცხოვრებს.

ვინაიდან, ცილა სიამის კატებისთვის საჭირო სასიცოცხლო ელემენტია, უპირატესობა მიანიჭეთ კატის საკვებს, რომელიც ისეთი ცხოველური წარმოშობის ცილებითაა მდიდარი, როგორიც ქათამი და თევზია. გარდა ამისა, ჯანსაღი ცხიმების ზომიერი რაოდენობით მიღება თქვენი ოჯახის მნიშვნელოვანი წევრის ენერგიის, კანის ჯანმრთელობისა და მბზინავი ბეწვის გარანტია.

ასაკის მატებასთან ერთად, შესაძლოა სიამის კატებს სახსრების პრობლემები განუვითარდეთ. ამის თავიდან ასაცილებლად, ნუტრიციოლოგი დაგეხმარებათ შეარჩიოთ საკვები დანამატები, რომლებიც სახსრების ჯანმრთელობასა და სიმტკიცეს შეუწყობენ ხელს. თუმცა, აქვე უნდა აღინიშნოს, რომ გარკვეული საკვები ნივთიერებების გადაჭარბებულმა რაოდენობამ შესაძლოა უარყოფითი შედეგები გამოიწვიოს. ამიტომ, კვებასთან დაკავშირებული ნებისმიერი ცვლილების განხორციელებამდე კონსულტაცია ნუტრიციოლოგთან გაიარეთ. ნუტრიციოლოგი თქვენი კატის ჯანმრთელობის ინდივიდუალურ საჭიროებებს შეაფასებს და სწორედ ამის შესაბამისად გაუწევს რეკომენდაციას კონკრეტულ ვიტამინებსა და საკვებ დანამატებს.

სიამის წარმოშობის ისტორია მითებითა და ლეგენდებითაა მოცული. ითვლება, რომ ეს სახეობა ტაილანდში წარმოიშვა. 1939 წლამდე ტაილანდს სიამს უწოდებდნენ და სიამის კატის სახელწოდებაც სწორედ ამ დასახელებას უკავშირდება. ლეგენდის თანახმად, სიამი ტაილანდის წმინდა ტაძრებისა და სამეფო სასახლეების მკვიდრი კომპანიონი ცხოველი იყო. არსებობს მოსაზრება, რომ ამ კატებს ტაძრებში არსებული ძვირფასი საგანძურის დაცვა ევალებოდათ. 

1800-იან წლებში ბრიტანეთის გენერალურმა კონსულმა ბანგკოკში, ოუენ გულდმა, ტაილანდის მეფისგან საჩუქრად წყვილი სიამის კატა მიიღო. ეგზოტიკური გარეგნობისა და მომხიბვლელი პიროვნების გამო, ფომ და მიამ ინგლისში ჩასვლისთანავე მიიპყრეს საზოგადოების ყურადღება და სულ მალე ყველასთვის სასურველ კომპანიონ ცხოველებად იქცნენ. 

1871 წელს სიამი ლონდონში, კრისტალ პალასის კატების შოუზე გამოჩნდა და სწორედ აქედან დაიწყო მისი საერთაშორისო აღიარება. ჯიშისთვის დამახასიათებელმა გასაოცარმა გარეგნობამ და უნიკალურმა პიროვნულმა თვისებებმა მთელი მსოფლიოს მასშტაბით მოხიბლა კატების მოყვარულები.

საზოგადოებრივი აღიარებისთანავე, სელექციონერებმა სიამის თვისებების დახვეწა და ფერის სხვადასხვა ვარიაციების განვითარება დაიწყეს. ტრადიციულ სიამის კატებს უფრო მტკიცე აღნაგობა და ფერების ფართო დიაპაზონი ჰქონდათ, თუმცა, დროთა განმავლობაში, შერჩევითმა მოშენებამ თანამედროვე სიამის და მისთვის დამახასიათებელი მახასიათებლების ჩამოყალიბება განაპირობა.