ზომა

მდედრი ტიბეტური მასტიფი სიმაღლეში 61-71, მამრი ტიბეტური მასტიფი კი 66-76 სანტიმეტრს აღწევს. სხვა ფიზიკურ მონაცემებს რაც შეეხება, ჩვეულებისამებრ, მდედრი და მამრი ტიბეტური მასტიფების სიგრძე 90-113 სანტიმეტრის ფარგლებში მერყეობს.

წონა

ტიბეტური მასტიფის წონასთან დაკავშირებული ინდივიდუალური შემთხვევები გენეტიკის, დიეტისა და ჯანმრთელობის მდგომარეობის შესაბამისად იცვლება. თუმცა, ჩვეულებისამებრ, ზრდასრული მამრი ტიბეტური მასტიფი 40.8 კილოგრამიდან 68 კილოგრამამდე იწონის. მდედრი ტიბეტური მასტიფის შემთხვევაში, ეს მაჩვენებელი უფრო მცირეა და 31.8-54.4 კილოგრამს შეადგენს.

სიცოცხლის ხანგრძლივობა

ტიბეტური მასტიფის სიცოცხლის ხანგრძლივობა 12-დან 15 წლამდე მერყეობს და ადამიანის ცხოვრების დაახლოებით 93-114 წელს უტოლდება. თუმცა, გახსოვდეთ, ეს ციფრები მხოლოდ პირობითია და თქვენი ოჯახის მნიშვნელოვანი წევრის სიცოცხლის ხანგრძლივობა მისი ცხოვრების ჯანსაღ წესსა და ჰარმონიულ საარსებო გარემოზეა დამოკიდებული.

ბეწვის საფარი

ხშირი ბეწვი ტიბეტურ მასტიფს მკაცრ კლიმატურ პირობებთან გამკლავებაში ეხმარება. ჯიშისთვის დამახასიათებელი სქელი, ორფენიანი ქურთუკი, შესანიშნავი თბოიზოლატორია. ტიბეტური მასტიფის დავარცხნა კვირაში რამდენჯერმეა რეკომენდებული. დაბანას რაც შეეხება, გაითვალისწინეთ, რომ ამ კომპანიონი ცხოველების გაშრობა შრომატევადი პროცესია, ამიტომ ამ პროცედურის წინასწარ დაგეგმვა ყოველთვის კარგი იდეაა.

ტიბეტური მასტიფი ერთგულების, გამბედაობისა და დამოუკიდებლობის უნიკალური კომბინაციაა. ამ ჯიშის წარმომადგენლები განსაკუთრებულ სიმამაცესა და თავდაჯერებულობას მაშინ ავლენენ, როდესაც საქმე თავიანთი სახლისა და საყვარელი ადამიანების დაცვას ეხება.

ტიბეტური მასტიფის აღსაზრდელად გამოცდილი ადამიანი, თანმიმდევრული წვრთნა და სათანადო სოციალიზაციაა საჭირო. თქვენი ოჯახის მნიშვნელოვანი წევრი მხოლოდ ასეთ შემთხვევაში ჩამოყალიბდება მშვიდ და მოსიყვარულე კომპანიონად.

რაოდენ გასაკვირიც არ უნდა იყოს, ტიბეტური მასტიფის გაწვრთნა განსაკუთრებულ ძალისხმევას არ მოითხოვს, რადგან ის ძალიან დამჯერი და ჭკვიანი ძაღლია. შთამბეჭდავი ზომის მიუხედავად, ამ ჯიშის წარმომადგენლები განსაკუთრებით მოსიყვარულე იმ ადამიანების მიმართ არიან, ვისაც ენდობიან. ისინი ძლიერ კავშირებს აყალიბებენ ოჯახთან და განსაკუთრებით ლოალურები ბავშვების მიმართ არიან.

ბარძაყის დისპლაზია

ბარძაყის დისპლაზია სამედიცინო ტერმინია, რომელიც მენჯ-ბარძაყის სახსრის ნაწილობრივ ან სრულ ამოვარდნას გულისხმობს. ბარძაყის დისპლაზიამ შესაძლოა ძვლის ცვეთა და ამ პროცესთან დაკავშირებული ტკივილი გამოიწვიოს.

კომპანიონი ცხოველების უმრავლესობას ბარძაყის დისპლაზია დაბადებიდანვე აქვს. თუ ბარძაყის დისპლაზიის დიაგნოზირება ადრეულ ეტაპზე მოხდება, პრობლემის გამოსწორებას იოლად შეძლებთ. სხვა შემთხვევებში, ძვლების მდებარეობის შესაცვლელად შესაძლოა ოპერაცია გახდეს საჭირო.

მიუხედავად იმისა, რომ ამ დაავადების განვითარებაში გენეტიკა მნიშვნელოვან როლს ასრულებს, სახსრებზე დატვირთვის შესამცირებლად ჯანსაღი წონის შენარჩუნებას განსაკუთრებული მნიშვნელობა აქვს. ყოველდღიური სეირნობა და ცურვა მენჯ-ბარძაყის გარშემო არსებული კუნთების ჩამოყალიბებას და მათი სიმტკიცის შენარჩუნებას შეუწყობს ხელს.

შებერილობა

შებერილობა ადამიანებისთვის უწყინარ პრობლემად აღიქმება, თუმცა, ძაღლებში ამ მდგომარეობამ შესაძლოა ფატალური შედეგიც კი გამოიწვიოს. პრობლემის პრევენციისთვის, გონივრული იქნება ყურადღება ისეთ სიმპტომებს მიაქციოთ, როგორიც ღებინება, შესიებული მუცელი ან ჭარბი ნერწყვდენაა. ნებისმიერი სიმპტომის გამოვლენისთანავე, გთხოვთ, დაუყოვნებლივ დაუკავშირდეთ თქვენს ვეტერინარს.

შებერილობის თავიდან ასაცილებლად, სასურველია თქვენი ერთგული კომპანიონის ყოველდღიური რაციონი მინიმუმ 2-3 კვებაზე გაანაწილოთ. გირჩევთ, აგრეთვე, ყურადღება მიაქციოთ, რომ ჭამის შემდეგ თქვენმა ოთხფეხა მეგობარმა დიდი რაოდენობით წყალი არ მიიღოს. შებერილობის თავიდან ასაცილებლად, კომპეტენტური მშობლები ხშირად უპირატესობა ამაღლებული ცენტრის მქონე სპეციალურ თასებს ანიჭებენ. მათ შეძენას თქვენს სახლთან ახლოს მდებარე ნებისმიერ ზოო მაღაზიაში შეძლებთ.

ყურის ინფექცია

ინფექციების განვითარების რისკის შესამცირებლად ყურის რეგულარულ წმენდას და  მისი სისუფთავის შენარჩუნებას განსაკუთრებული მნიშვნელობა აქვს. გამოიყენეთ ვეტერინარის მიერ რეკომენდირებული ყურის საწმენდი ხსნარი და ბამბით ნაზად გაუსუფთავეთ ყურები თქვენს კომპანიონ ცხოველს. ამ პროცესში სიფრთხილე გამოიჩინეთ და ეცადეთ ყურის არხი არ დააზიანოთ. ვინაიდან, ტენიანობა ბაქტერიების გამრავლებისთვის შესაფერის გარემოს ქმნის, ჰიგიენური პროცედურის დასრულებისთანავე დარწმუნდით, რომ თქვენი კომპანიონი ცხოველის ყურები მშრალია.

სპეციფიკური დიეტური მოთხოვნების გამო, გიგანტური ჯიშის ძაღლების კვება განსაკუთრებულ ყურადღებას საჭიროებს. რაციონის შედგენისას, გადამწყვეტი მნიშვნელობა მხვედველობაში ისეთი ფაქტორების მიღებას აქვს, როგორიც კომპანიონი ცხოველის ასაკი, ზომა, აქტივობის დონე და საერთო ჯანმრთელობის მდგომარეობაა. საუკეთესო შემთხვევაში, სასურველია, პრიორიტეტი მივანიჭოთ მაღალი ხარისხის კვებას, რომელიც ჩვენი ოჯახის მნიშვნელოვანი წევრების უნიკალურ საჭიროებებზეა მორგებული.

ჯიშისთვის დამახასიათებელი კუნთოვანი მასის შესანარჩუნებლად, ტიბეტურ მასტიფს პროტენით მდიდარი რაციონი ესაჭიროება. ამისთვის მნიშვნელოვანია არჩევანი შევაჩეროთ მაღალი ხარისხის ძაღლის საკვებზე, რომელიც ქათმის, საქონლის ან ცხვრის ხორცს შეიცავს. სისხლში შაქრის სტაბილური დონისა და საჭმლის მომნელებელი სისტემის ჯანმრთელობის შესანარჩუნებლად, ტიბეტური მასტიფის რაციონი ნახშირწყლების ზომიერ რაოდენობასაც უნდა მოიცავდეს.

გახსოვდეთ, იმუნური ჯანმრთელობის უზრუნველსაყოფად ვიტამინები და მინერალები გადამწყვეტ როლს ასრულებენ. ამიტომ, დარწმუნდით, რომ თქვენი ოჯახის მნიშვნელოვანი წევრის დიეტა კარგად არის დაბალანსებული და ვიტამინებისა და მინერალების სათანადო ოდენობას მოიცავს.

ცხიმი კიდევ ერთი მნიშვნელოვანი საკვები ნივთიერებაა, რომელიც ენერგიის კონცენტრირებულ წყაროს ქმნის ამ დიდი და აქტიური კომპანიონი ცხოველებისთვის. თუმცა, სასურველია, უპირატესობა ისეთ ჯანსაღ ცხიმებს მიანიჭოთ, როგორიც თევზის ზეთი ან სელის თესლია.

შებერილობისა და კუჭის პრობლემებისადმი მიდრეკილების გამო, შეეცადეთ თქვენს ტიბეტურ მასტიფს შედარებით მცირე პორციებით, ხშირად გაუმასპინძლდეთ. პორციების კონტროლი სიმსუქნის თავიდან ასაცილებლადაც განსაკუთრებით მნიშვნელოვანია. ჯანსაღი წონის შესანარჩუნებლად, აქტიურად ადევნეთ თვალი თქვენი კომპანიონი ცხოველის სხეულის მდგომარეობას და საჭიროების შემთხვევაში ნუტრიციოლოგთან კონსულტაციის საფუძველზე შეცვალეთ რაციონი.

ტიბეტური მასტიფი უძველესი ჯიშია, რომელიც ათასობით წლის წინ ჰიმალაის რეგიონში წარმოიშვა. როგორც ტიბეტის მონასტრების, სოფლებისა და მომთაბარე ბანაკების მცველებმა, ოჯახის ამ მნიშვნელოვანმა წევრებმა გადამწყვეტი როლი ითამაშეს კომპანიონი ადამიანებისა და შინაური ცხოველების მტაცებლებისგან დაცვაში.

ისტორიკოსების გარკვეული ნაწილი მიიჩნევს, რომ ტიბეტური მასტიფი იმ დიდი მასტიფის ტიპის ძაღლებისგან წარმოიშვა, რომლებიც ასურელმა ვაჭრებმა ტიბეტში ჩვენს წელთაღრიცხვამდე 1100 წელს ჩაიყვანეს. ტიბეტის მკაცრ რელიეფთან ადაპტირების მიზნით, ჯიში საუკუნეების განმავლობაში შერჩევითი მოშენების გზით ვითარდებოდა.

გონიერებითა და ერთგულებით გამორჩეულ მასტიფს ხშირად ჩუქნიდნენ ტიბეტში სტუმრად ჩამოსულ წარჩინებულ პირებსა და პატივცემულ სტუმრებს. თუმცა, დასავლურმა სამყარომ ტიბეტური მასტიფის შესახებ პირველად მხოლოდ მე-19 საუკუნის შუა წლებში შეიტყო, როდესაც ბრიტანელი მკვლევარები და მოგზაურები მათ შორეულ აღმოსავლეთში მოგზაურობის დროს შეხვდნენ. მარკო პოლო წერდა, რომ “ტიბეტური მასტიფი ვირივით მაღალი იყო და ლომივით ძლიერი ხმა ჰქონდა“.