პომერანული შპიცი ცოცხალი და ენერგიული კომპანიონი ცხოველია. ის ოჯახის მიმართ განსაკუთრებული ერთგულებით გამოირჩევა, თუმცა ხშირად მხოლოდ ერთი ადამიანის მიმართ ავლენს მიჯაჭვულობას. პომერანელები სიამოვნებით ატარებენ დროს საყვარელ ადამიანებთან ერთად და მათთან თამაშზეც არასდროს ამბობენ უარს.

მოსიყვარულე ბუნებისა და ცხოვრებისადმი ენთუზიაზმით აღსავსე დამოკიდებულების მიუხედავად, პომერანულ შპიცთან თამაშისას განსაკუთრებული სიფრთხილეა საჭირო, რადგან ფუმფულა ბეწვის ქვეშ პაწაწინა, საკმაოდ მყიფე სხეული იმალება.

რაოდენ გასაკვირიც არ უნდა იყოს, ჩიხუახუას მსგავსად, პომერანული შპიცი შესანიშნავი მოდარაჯეა. მას აქტიური ვოკალიზაცია ახასიათებს და მზად არის ნებისმიერი მოულოდნელობის შესახებ დაუყოვნებლივ გაცნობოთ. 

ადაპტირებადი ბუნებისა და კომპაქტური ზომის გამო, პომერანიელებს ნებისმიერი ზომის სახლში შეუძლიათ ცხოვრება. თქვენი ცხოვრების წესისა და ცხოვრებისეული სიტუაციის მიუხედავად, ოჯახის ეს მნიშვნელოვანი წევრები ყოველთვის ისე იგრძნობს თავს, როგორც საკუთარ სახლში. მიუხედავად იმისა, რომ პომი მეგობრულია და ყველასთან ურთიერთობს, ის ზედმეტად დელიკატურია ისეთი აქტიური ოჯახებისთვის, სადაც მცირეწლოვანი ბავშვები იზრდებიან. 

პატარა ზომის მიუხედავად, პომერანელებს რეგულარული ვარჯიში ესაჭიროებათ. ისინი ძალიან ჭკვიანები არიან და სიამოვნებით სწავლობენ მითითებებს. პომები, როგორც წესი, კარგად ეწყობიან სხვა შინაურ ცხოველებს, თუმცა სიფრთხილე გვმართებს ნებისმიერი მინიატურული ჯიშის დიდ ჯიშებთან თანაცხოვრების დროს. 

პომერანელს მშვენიერი ტემპერამენტი აქვს. მის გვერდით ყოფნა ნამდვილი სიამოვნებაა. სიფხიზლისა და მცირე ზომის გამო, ისინი ხანდაზმულებისთვისაც შესანიშნავ კომპანიონებს წარმოადგენენ. თუმცა, თუ სიმშვიდე მოგწონთ, ან მგრძნობიარე მეზობლები გყავთ, აქტიური ვოკალიზაციის გამო, შესაძლოა ისინი თქვენთვის შესაფერისი კომპანიონები არ იყვნენ.

მუხლის ქუდის დისლოკაცია

მუხლის ქუდის დისლოკაცია მემკვიდრეობითი პრობლემაა. ამ პრობლემით გამოწვეული დისკომფორტის თავიდან ასაცილებლად რეგულარული ვარჯიში და ჯანსაღი წონის შენარჩუნებაა საჭირო. უცხიმო ხორცის, კვერცხის, მაღალი ხარისხის ცილის, კალციუმისა და ფოსფორის დაბალანსებულად მიღება თქვენი ოჯახის მნიშვნელოვან წევრს კუნთების სწორად განვითარებაში დაეხმარება. 

მუხლის ქუდის დისლოკაციასთან დაკავშირებული მძიმე შემთხვევების გამოსასწორებლად შესაძლოა მაკორექტირებელი ოპერაციაც გახდეს საჭირო. თუმცა, ვეტერინარულ კლინიკაში რეგულარული ვიზიტი მუხლის ქუდის დისლოკაციის ადრეულ ნიშნებს აღმოაჩენს და შესაბამისი ზომების მიღების შესაძლებლობას დაავადების განვითარების ადრეულ ეტაპზე მოგცემთ.

ტრაქეის კოლაფსი

მცირე ზომისა და ტრაქეის დელიკატური სტრუქტურის გამო, შესაძლოა პომერანული შპიცი ტრაქეის კოლაფსისადმი იყოს მიდრეკილი. ეს გენეტიკური დაავადება ტრაქეის რგოლების შევიწროებას იწვევს. დაავადებას თან ისეთი სიმპტომები ახლავს, როგორიც ფიზიკური დატვირთვით ან ემოციური აღგზნებით გამოწვეული ქრონიკული ხველება, ქოშინი და ჟანგბადის უკმარისობაა. დაავადებასთან დაკავშირებული სიმპტომები შესაძლოა ქიმიური ნაერთების შესუნთქვამ, მჭიდრო საყელომ ან კისრის არეში მიღებულმა ტრამვამ გამოიწვია.

ვეტერინართან მჭიდრო თანამშრომლობა, ცხოვრების ჯანსაღი წესის უზრუნველყოფა და მშვიდი საცხოვრებელი გარემოს შენარჩუნება დაავადების მართვის გონივრული გზაა.

სირინგომიელია

სირინგომიელია ზურგის ტვინში სითხით სავსე კისტის ჩამოყალიბებას იწვევს. დაავადება ტვინსა და სხეულს შორის არსებულ კომუნიკაციას არღვევს და ისეთ სიმპტომებში ვლინდება, როგორიც სისუსტე, ტემპერატურისადმი მგრძნობელობა, კუნთების ატროფია, გამონაყარი და ტკივილია კისრის არეში. სიმპტომები, როგორც წესი, ნელა ვითარდება და დაავადების პროგრესირების გვიანდელ ეტაპზე იჩენს თავს. 

მკურნალობის დაგვიანებამ შესაძლოა ზურგის ტვინის შეუქცევადი დაზიანება გამოიწვიოს. სწორედ ამიტომ, გირჩევთ, პირველივე სიმპტომის  გამოვლენისთანავე მიმართოთ ვეტერინარს  და შესაბამისი დიაგნოსტიკური ტესტებით შეაფასოთ კომპანიონი ცხოველის ხერხემლის ჯანმრთელობის.  

ჰიდროცეფალია

ჰიდროცეფალია თავის ქალაში არსებული სითხის რაოდენობის მატებას და ტვინის პარკუჭების გაფართოებას განაპირობებს. დაავადება თავის ქალის ზომის ზრდას, ძლიერ ტკივილსა და პირღებინებას იწვევს. 

ჰიდროცეფალიის დიაგნოზის დასმა კომპლექსური პროცესია და ვეტერინართან აქტიურ კომუნიკაციასთან ერთად კლინიკური გამოკვლევების ჩატარებასაც საჭიროებს. იმის მიხედვით, დაავადება თანდაყოლილია თუ შეძენილი, მას მედიკამენტებით ან ქირურგიული წესით მკურნალობენ. 

ალოპეცია

ალოპეცია კომპანიონი ცხოველის სხეულის გარკვეული ნაწილებიდან თმის ცვენას გულისხმობს. დაავადების გამომწვევი მიზეზი შესაძლოა გენეტიკური ფაქტორი, ფარისებრი ჯირკვლის პათოლოგია ან ფსიქოლოგიური სტრესი იყოს. 

თმის ზრდის ბუნებრივი პროცესის აღსადგენად ადრეული დიაგნოსტიკა განსაკუთრებით მნიშვნელოვანია. სათანადო მკურნალობის შემთხვევაში ბეწვი რამდენიმე თვის განმავლობაში დაიბრუნებს ბუნებრივ ფერსა და ფორმას. თავდაპირველად, თმა შესაძლოა თხელი და თეთრი ამოვიდეს, თუმცა დროთა განმავლობაში აუცილებლად გამაგრდება.

სწრაფი მეტაბოლიზმისა და პატარა კუჭის გამო, მინიატურული ზომის ძაღლებს საკვების ხშირი, თუმცა, მცირე ულუფებით მიღება ესაჭიროებათ. 

პომერანელისთვის საკვების არჩევისას მათი ასაკი, ცხოვრების წესი, აქტივობის დონე, ფიზიოლოგიური მდგომარეობა, ჯანმრთელობა და საკვები პროდუქტებისადმი მგრძნობელობა უნდა გავითვალისწინოთ. 

ჯიშის ზოგიერთი წარმომადგენელი ჭარბი წონის მატებისკენ არის მიდრეკილი. ამის თავიდან ასაცილებლად, განსაკუთრებული ყურადღება გამოიჩინეთ და თვალი ადევნეთ რა რაოდენობის საკვებს იღებს თქვენი ოთხფეხა მეგობარი დღის განმავლობაში. წონის რეგულარული მონიტორინგი და კვების გრაფიკის დადგენა სიმსუქნესთან დაკავშირებული ჯანმრთელობის პრობლემების თავიდან აცილებაში დაგეხმარებათ. 

პომერანული ლეკვის მოთხოვნები ენერგიის, ცილების, მინერალებისა და ვიტამინების საჭიროების თვალსაზრისით ზრდასრულ ძაღლის საჭიროებებს მნიშვნელოვნად აღემატება. ამიტომ, მათ სპეციალურად ლეკვებისთვის შექმნილი საკვები ესაჭიროებათ. 

თქვენი ოჯახის მნიშვნელოვანი წევრის კვებითი საჭიროებების ნუტრიციოლოგთან დაზუსტება გონივრული გადაწყვეტილებაა. გახსოვდეთ, პროფესიონალთან კონსულტაცია თქვენი კომპანიონი ცხოველის ჯანმრთელი და ბედნიერი ცხოვრების გარანტია.

პომერანული შპიცი ზომის პროგრესული შემცირების გზით, განზრახ იქნა გამოყვანილი. ჯიშს სახელი ევროპის ჩრდილო-აღმოსავლეთ ნაწილში მდებარე იმ ტერიტორიის საპატივცემულოდ ეწოდა, რომელიც ახლა პოლონეთისა და დასავლეთ გერმანიის ნაწილია. 

ოჯახის ამ მნიშვნელოვანი წევრების პოპულარობა დიდწილად დედოფალი ვიქტორიას ძალისხმევამ განაპირობა. ინგლისის პირველმა პირმა ჯიში იტალიაში სტუმრობისას იხილა და სელექციის მიზნით სამშობლოში წაიყვანა. ვიქტორიას გადაწყვეტილებით პომერანიელის ზომა მნიშვნელოვნად შემცირდა, ჯიშის პოპულარობა კი საგრძნობლად გაიზარდა და ის არისტოკრატების საყვარელ კომპანიონ ცხოველად იქცა. 

ცნობილი ბრიტანელი მხატვარი, თომას გეინსბორო ხშირად გამოსახავდა პომერანულ შპიცს ნახატებში. თუმცა, ოჯახის ამ მნიშვნელოვანი წევრების ხელოვნებასთან კავშირი ამით არ სრულდება. პიმპერლის სახელით ცნობილი პომერანული შპიცი მოცარტსაც ჰყავდა. სიქსტის კაპელას ჭერის მოხატვის პროცესში კი თავად მიქელანჯელოს უმშვენებდა გვერდს შპიცის ჯიშის ეს შესანიშნავი წარმომადგენელი.