ზომა

მდედრი გოლდენ რეტრივერი სიმაღლეში 55-57, მამრი გოლდენ რეტრივერი კი 58-61 სანტიმეტრს აღწევს. სხვა ფიზიკურ მონაცემებს რაც შეეხება, მდედრი და მამრი გოლდენ რეტრივერის სიგრძე 94-107 სანტიმეტრის ფარგლებში მერყეობს.

წონა

გოლდენ რეტრივერის წონასთან დაკავშირებული ინდივიდუალური შემთხვევები გენეტიკის, დიეტისა და ჯანმრთელობის მდგომარეობის შესაბამისად იცვლება. თუმცა, ჩვეულებისამებრ, ზრდასრული მამრი გოლდენ რეტრივერი 29 კილოგრამიდან 34 კილოგრამამდე იწონის. მდედრი გოლდენ რეტრივერის შემთხვევაში, ეს მაჩვენებელი უფრო მცირეა და 25-29 კილოგრამს არ აღემატება.

სიცოცხლის ხანგრძლივობა

გოლდენ რეტრივერის სიცოცხლის ხანგრძლივობა 10-დან 12 წლამდე მერყეობს და ადამიანის ცხოვრების დაახლოებით 66-77 წელს უტოლდება. თუმცა, გახსოვდეთ, ეს ციფრები მხოლოდ პირობითია და თქვენი ოჯახის მნიშვნელოვანი წევრის სიცოცხლის ხანგრძლივობა მისი ცხოვრების ჯანსაღ წესსა და ჰარმონიულ საარსებო გარემოზეა დამოკიდებული.

ბეწვის საფარი

გოლდენ რეტრივერი საშუალო სიგრძის ოქროსფერი ბეწვით არის ცნობილი. ბეწვის სიმკვრივის გამო, გოლდენ რეტრივერის მოვლის პროცესი განსაკუთრებულ ყურადღებას საჭიროებს. ბეწვის ქვედა ფენა, წყალგაუმტარი ბუნების გამო, უკიდურესად სქელია და შესანიშნავად უზრუნველყოფს ცივ ამინდში სითბოს, ცხელ ამინდში კი სიგრილეს. 

გოლდენ რეტრივერის ბეწვის ცვენა მთელი წლის განმავლობაში შეინიშნება, თუმცა, ეს პროცესი განსაკუთრებით ინტენსიური გაზაფხულსა და შემოდგომაზეა. ამ პერიოდში ბეწვი ყოველდღიურ დავარცხნას საჭიროებს. სხვა დროს, ამ პროცედურის გამეორება კვირაში ორჯერაც საკმარისია.

ადამიანებისადმი გამოვლენილი განსაკუთრებული სიყვარული და ინტელექტის მაღალი დონე გოლდენ რეტრივერს მსოფლიოს ერთ-ერთ ყველაზე პოპულარულ ჯიშად აქცევს. ოჯახის ეს მნიშვნელოვანი წევრები ძალიან კომუნიკაბელურები არიან და საოცრად გაწონასწორებული ხასიათი აქვთ. სწორედ ამის გამო მიიჩნევენ მათ ბავშვებისა და სხვა შინაური ცხოველებისთვის შესაფერის კომპანიონებად. 

მაღალი ინტელექტითა და შთამბეჭდავი სამუშაო ეთიკით დაჯილდოვებულ ამ კომპანიონ ცხოველებს მეგობრული ტემპერამენტი და შთამბეჭდავი ერთგულება ახასიათებთ. სწორედ ამ უნიკალური მახასიათებლების გამო ირჩევენ მათ მეგზურ ძაღლებად უსინათლო და მხედველობადაქვეითებული ადამიანები.

ოჯახის ამ მნიშვნელოვანი წევრებისთვის დამახასიათებელი მხიარული და ენერგიული ბუნება რეგულარული ვარჯიშის საჭიროებასთან ერთად გარე აქტივობების სიყვარულშიც ვლინდება. ცურვა, სეირნობა, სირბილი და ბურთით თამაში აქტივობების ის მცირე ჩამონათვალია, რომელიც თქვენს კომპანიონ ცხოველს ზედმეტი ენერგიის დახარჯვაში დაეხმარება. 

ბარძაყისა და იდაყვის დისპლაზია

შესაძლოა გოლდენ რეტრივერი ბარძაყის დისპლაზიის სახელით ცნობილი გენეტიკური დაავადებით დაიბადოს. ეს სამედიცინო მდგომარეობა ბარძაყის ბურთისა და მენჯის სახსრების შეუთავსებლობას გულისხმობს და ისეთ სიმპტომებში გამოიხატება, როგორიც კოჭლობა და ფიზიკური აქტივობის დონის დაქვეითებაა. ბარძაყის დისპლაზიისგან განსხვავებით, იდაყვის დისპლაზია, ლეკვობის დროს, იდაყვის არასწორად განვითარების გამო ვითარდება. 

თუ კომპანიონი ცხოველის შესიებულ კიდურს ან გადაადგილებასთან დაკავშირებულ დისკომფორტს შეამჩნევთ, დაუყოვნებლივ ეწვიეთ ვეტერინარს. სპეციალისტის ცოდნა და გამოცდილება მკურნალობასთან დაკავშირებულ პროცესს მნიშვნელოვნად გაგიადვილებთ. 

გლაუკომა

გლაუკომა თვალშიგა წნევის ზრდას და მხედველობის ნერვის დაზიანებას იწვევს. გლაუკომის განვითარების თავდაპირველ ეტაპზე კომპანიონი ცხოველების მხედველობა უმნიშვნელოდ უარესდება, თუმცა, დროთა განმავლობაში, შესაძლოა საქმე განუკურნებელ სიბრმავემდე მივიდეს.

მიუხედავად იმისა, რომ დაავადების პრევენცია რთულია, რეგულარული ვეტერინარული შემოწმება და თვალების ჯანმრთელობის დიაგნოსტიკა დაავადების ადრეულ ეტაპზე გამოვლენასა და მკურნალობის პროცესის ეფექტურად წარმართვაში მნიშვნელოვნად დაგეხმარებათ. 

ანტიოქსიდანტებით, ომეგა 3 ცხიმოვანი მჟავებით, A, C და E ვიტამინებით მდიდარი რაციონი თქვენი ოჯახის მნიშვნელოვან წევრს თვალის ჯანმრთელობის შენარჩუნებაში საგრძნობლად დაეხმარება. 

ბადურის პროგრესირებადი ატროფია

პროგრესირებადი ატროფია ბადურის თანდათანობით გადაგვარებას და მხედველობის დაკარგვას იწვევს. აღნიშნული დაავადება კომპანიონ ცხოველებს მემკვიდრეობით გადაეცემათ. ბადურის ჯანმრთელობის შენარჩუნებაში თვალის რეგულარული გამოკვლევები და ანტიოქსიდანტებით მდიდარი დიეტა დაგეხმარებათ.

ოჯახის მნიშვნელოვანი წევრის შეძენამდე ყურადღებით გამოიკვლიეთ მისი გენეტიკა და დარწმუნდით, რომ თქვენს მომავალ კომპანიონს მხედველობასთან დაკავშირებული პრობლემებისადმი გენეტიკური მიდრეკილება არ აქვს. 

ბადურის დისტროფია

დისტროფია ბადურის მოშლას და მხედველობის დაქვეითებას იწვევს. დაავადების გამომწვევი მიზეზი შესაძლოა მემკვიდრეობითი ფაქტორი, ასაკის მატება ან დიაბეტი იყოს. დაავადების დიაგნოსტიკისთვის ვეტერინართან კონსულტაციას გადამწყვეტი მნიშვნელობა აქვს. დროული და სწორი მკურნალობის შემთხვევაში საშიშროების თავიდან აცილებას ეფექტურად შეძლებთ.  

მემკვიდრეობითი კატარაქტა

კატარაქტა კომპანიონი ცხოველის მხედველობის თანდათანობით გაუარესებას იწვევს. ამ დროს ბროლი, რომელიც ჯანმრთელ თვალში გამჭვირვალეა,  მონაცრისფრო ან რძისფერ შეფერილობას იძენს.

თანდაყოლილ კატარაქტას, როგორც წესი, დედის ორსულობის დროს გადატანილი ინფექციური დაავადება ან სამშობიარო ტრავმა იწვევს. მიუხედავად იმისა, რომ თანდაყოლილი დაავადებების მართვა ხშირად ჩვენი შესაძლებლობების მიღმაა, C და E ვიტამინებით მდიდარი საკვების მიღება მნიშვნელოვნად გააუმჯობესებს თქვენი ოჯახის მნიშვნელოვანი წევრის თვალის ჯანმრთელობას. 

როგორც კომპეტენტურ მშობელს, გახსოვდეთ, რომ რეგულარული ვეტერინარული შემოწმება და თვალების მზის მავნე ზემოქმედებისგან დაცვა დაავადების ეფექტურად მართვის წინაპირობაა.

იქთიოზი

იქთიოზი მემკვიდრეობითი დაავადებაა, რომელიც კანის ხორკლიანი ქერცლით დაფარვას და მის გარქოვანებას იწვევს. დაავადების გამომწვევი მიზეზი უცნობია, თუმცა, შესაბამისი კვალიფიკაციის მქონე ადამიანები A ვიტამინის უკმარისობას მიიჩნევენ მისი განვითარების მაპროვოცირებელ ფაქტორად. 

იმის მიხედვით, თუ რომელი გენის მუტაციით არის გამოწვეული დაავადება, სამედიცინო სფეროში, იქთიოზის რამდენიმე ფორმას განასხვავებენ ერთმანეთისგან. თუმცა, ჩვეულებისამებრ, იქთიოზის სიმპტომები კანის სიმშრალეს, აქერცვლას და დაზიანებული ბარიერის გამო განვითარებულ ინფექციებს მოიცავს. 

დაავადების მართვის სტრატეგია ვეტერინართან მჭიდრო თანამშრომლობას და მის მიერ დანიშნული სპეციალური ჰიგიენური საშუალებების გამოყენებას გულისხმობს.

გოლდენ რეტრივერებს ორგანიზმისთვის საჭირო ნივთიერებებით მდიდარი, დაბალანსებული ძაღლის საკვები ესაჭიროებათ. მაღალი ხარისხის ცილა მათი ჯანმრთელობისთვის განსაკუთრებით მნიშვნელოვანია, ამიტომ უპირატესობა მიანიჭეთ საკვებს, რომელიც კომპანიონ ცხოველს ცილის ადეკვატური რაოდენობით უზრუნველყოფს.

საუკეთესო შემთხვევაში, გოლდენ რეტრივერი პროფესიონალური ძაღლის საკვებით უნდა გამოვკვებოთ. საკვების შერჩევის პროცესში, დარწმუნდით, რომ ის სრულად არის დაბალანსებული. ეს იმას ნიშნავს, რომ საკვები ძაღლის ჯანმრთელობისთვის საჭირო ყველა ნუტრიენტს (ცილებს, ცხიმებს, ნახშირწყლებს, ვიტამინებსა და მინერალებს) დაბალანსებული რაოდენობით შეიცავს და სრულად აკმაყოფილებს მის კვებით მოთხოვნილებებს. 

ჯანსაღი ზრდის უზრუნველსაყოფად, გოლდენ რეტრივერის რაციონი კალორიებს, მინერალებსა და ვიტამინებს შესაბამისი პროპორციით უნდა შეიცავდეს. კალორიებით მდიდარი საკვების მიღებამ შესაძლოა წონის მატებასთან ერთად საყრდენ-მამოძრავებელი სისტემის არასწორად განვითარებაც გამოიწვიოს. 

ზრდასრული გოლდენ რეტრივერი დღეში ორჯერ ან სამჯერ უნდა იკვებებოდეს. საჭმლის მომნელებელი სისტემის სწორი ფუნქციონირების ხელშესაწყობად და კუჭ-ნაწლავის პრობლემების თავიდან ასაცილებლად, სასურველია ჩვენი ოჯახის მნიშვნელოვან წევრა ერთსა და იმავე დროს გავუმასპინძლდეთ. 

ცხოველური პროდუქტების კომპანიონი ცხოველებისთვის გაზიარება ჩვეული პრაქტიკაა, თუმცა, ამ საკითხთან მიმართებით განსაკუთრებული ყურადღება გვმართებს. მაგალითად, ღვიძლის ხანგრძლივად მიღებამ შესაძლოა ორგანიზმში A ვიტამინის ჭარბად დაგროვება და მოწამვლა გამოიწვიოს. გოლდენ რეტრივერებისთვის არც მოხარშული ძვლების, ხახვის, ნივრის, ავოკადოს, შოკოლადისა და ყურძნის შეთავაზებაა რეკომენდირებული. 

გოლდენ რეტრივერი შაქრის, ცხიმისა და მარილის შემცველ საკვებსაც უნდა მოვარიდოთ. შაქრიანი და ცხიმიანი საკვები წონის მატებას უწყობს ხელს. მარილის ჭარბი რაოდენობა კი უარყოფით გავლენას ახდენს თირკმელების ჯანმრთელობაზე და წყლის ბალანსის დარღვევასთან ერთად, კანის სხვადასხვა დაავადებასაც იწვევს.

ბარძაყის დისპლაზიისა და ართრიტისადმი მიდრეკილების გამო, ოქროსფერი რეტრივერის საკვების შერჩევისას, დარწმუნდით, რომ პროდუქტი სახსრების ჯანმრთელობისთვის საჭირო ისეთ დანამატებს შეიცავს, როგორიც გლუკოზამინი და ქონდროიტინია. 

გოლდენ რეტრივერები წონის მატებისადმი მიდრეკილებით ხასიათდებიან. შესაბამისად, სხეულის მდგომარეობის რეგულარულ მონიტორინგსა და საკვები პორციების კონტროლს მათი ჯანმრთელობისთვის არსებითი მნიშვნელობა აქვს. გახსოვდეთ, გადაჭარბებულმა კვებამ შესაძლოა სიმსუქნე და სახსრების პრობლემები გამოიწვიოს. 

კვების გრაფიკის ინდივიდუალურ საჭიროებებზე მოსარგებად და კომპანიონი ცხოველის ასაკის, წონის, აქტივობის დონისა და ჯანმრთელობის მდგომარეობის გათვალისწინებით, კვებასთან დაკავშირებული ოპტიმალური გადაწყვეტილებების მისაღებად სასურველია კონსულტაცია ნუტრიციოლოგთან გაიაროთ. 

ოქროს რეტრივერი ფრინველებზე, უფრო კონკრეტულად კი წყლის ფრინველებზე სანადიროდ გამოიყვანეს. შოტლანდიელებს გვერდით ისეთი კომპანიონი ცხოველი სურდათ, რომელიც ხმელეთზე და წყალში ნადირობას თანაბარი წარმატებით შეძლებდა. 

იდეალური რეტრივერის შესაქმნელად, ტვიდმუთის ბარონმა, დადლი მარჯორიბენკსმა, 1865 წელს, ბრაიტონში შეძენილი თავისი ყვითელი რეტრივერი, სახელად ნოუსი, ახლა უკვე გადაშენებულ, ტვიდის წყლის სპანიელთან შეაწყვილა. თუმცა, სელექციის პროცესი ამით არ დასრულებულა. ოქროსფერი რეტრივერის გარეგნობისა და უნარების დასახვეწად, ბარონმა, სხვადასხვა დროს, ლაბრადორ რეტრივერი, წითელი სეტერი და ირლანდიური ბლადჰაუნდი დაიხმარა. 

ამ კომბინაციის დამსახურებით შეიქმნა ამტანი, ძლიერი ძაღლი, რომელმაც ნადირობისთვის საჭირო განსაკუთრებული უნარები და შოტლანდიის მკაცრი კლიმატისთვის შესაფერისი ფიზიკური მახასიათებლები შეიძინა. 

დღეს გოლდენ რეტრივერი ერთ-ერთი ყველაზე პოპულარული ჯიშია მთელს მსოფლიოში. თუმცა, მხოლოდ ერთეულებისთვისაა ცნობილი, რომ ამ ჯიშის სამი განსხვავებული სახეობა (ინგლისური, კანადური და ამერიკული) არსებობს. მათ ერთმანეთისგან მხოლოდ უმნიშვნელო დეტალები განასხვავებთ და სწორედ ამის გამოა, რომ ყველა მათგანი ერთი და იმავე ჯიშად კლასიფიცირდება.