ბოსტონ ტერიერებს, როგორც წესი, მეგობრული და მოსიყვარულე ტემპერამენტი აქვთ. მათ პიროვნებას თამაშის სიყვარული და კომიკური ბუნება აყალიბებს. ჩვეულებისამებრ, ისინი, შესანიშნავად ეგუებიან ბავშვებს და სხვა შინაურ ცხოველებთან ერთადაც კომფორტულად გრძნობენ თავს.
ბოსტონ ტერიერი ადამიანებზე ორიენტირებული ჯიშია. ეს მხიარული, პატარა ძაღლები მარტო დარჩენას რთულად ეგუებიან და უპირატესობას ოჯახის წევრებთან ერთად ყოფნას ანიჭებენ. ბოსტონ ტერიერი საუკეთესოდ შეეფერება მათ, ვისაც სურს მხიარული, მოსიყვარულე თანამგზავრი, რომელსაც არ სჭირდება ბევრი ვარჯიში, მაგრამ ცნობისმყოყვარე ბუნება აქვს და სურს მონაწილეობა მიიღოს ყველაფერში, რაც მის ირგვლივ ხდება.
მცირე ზომის მიუხედავად, ბოსტონ ტერიერი ენერგიული და აქტიური ჯიშია. ამ ჭკვიან კომპანიონ ცხოველებს ზედმიწევნით შეუძლიათ მითითებების შესრულება. თუმცა, არის შემთხვევები, როდესაც არნახულ სიჯიუტეს ავლენენ. ასეთ დროს გაიხსენეთ, რომ ბოსტონ ტერიერი მგრძნობიარე ძაღლია და წვრთნის დროს გამოვლენილი შეუვალობის შემთხვევაშიც კი მხოლოდ შექებასა და მსუბუქ შესწორებებზე რეაგირებს ეფექტურად.
ჯანმრთელობის პოტენციური პრობლემები
გლაუკომა
გლაუკომა თვალშიგა წნევის ზრდას და მხედველობის ნერვის დაზიანებას იწვევს. გლაუკომის განვითარების ადრეულ ეტაპზე კომპანიონი ცხოველების მხედველობა უმნიშვნელოდ უარესდება, თუმცა, დროთა განმავლობაში, შესაძლოა საქმე განუკურნებელ სიბრმავემდე მივიდეს.
დაავადების პრევენცია რთულია. თუმცა, რეგულარული ვეტერინარული დიაგნოსტიკა და თვალების ჯანმრთელობის შემოწმება დაავადების დროულ გამოვლენასა და მკურნალობის ეფექტურად წარმართვაში მნიშვნელოვნად დაგეხმარებათ. ანტიოქსიდანტებით, ომეგა 3 ცხიმოვანი მჟავებით, A, C და E ვიტამინებით მდიდარი რაციონი თქვენი ოჯახის მნიშვნელოვან წევრს თვალების ჯანმრთელობის შენარჩუნებაში საგრძნობლად დაეხმარება.
თვალის სიმშრალე
თვალის სიმშრალე წყლის არასაკმარისი რაოდენობით მიღებამ შეიძლება გამოიწვიოს. ცრემლის წარმოქმნის სირთულე თვალის გაღიზიანებას და მხედველობასთან დაკავშირებულ პრობლემებს იწვევს. თვალის პრობლემების მაპროვოცირებელ გარემოებად ხშირად კლიმატიც გვევლინება. მაგალითად, თუ ზაფხულის გატარებას თქვენს ოთხფეხა მეგობართან ერთად, ზღვისპირა ქალაქში დააპირებთ, სასურველია განსაკუთრებული სიფრთხილე გამოიჩინოთ და თქვენი კომპანიონი ცხოველი შეძლებისდაგვარად მოარიდოთ სიცხეს.
განსაკუთრებული სიფრთხილე თვალის დაავადებისთვის დამახასიათებელი ისეთი ადრეული სიმპტომების მიმართ გამოიჩინეთ, როგორიც სიწითლე და ცრემლდენაა. სასურველია ამ სიმპტომების გამოვლენისთანავე ესტუმროთ ვეტერინარს. როგორც კომპეტენტურმა მშობელმა, მნიშვნელოვანია გაითვალისწინოთ ისიც, რომ თვალებზე ყოველდღიურ ზრუნვას და სპეციალურად ძაღლებისთვის განკუთვნილი ჰიგიენური საშუალებებით მათ რეგულარულ წმენდას დაავადებების პრევენციისთვის არსებითი მნიშვნელობა აქვს.
ბრაქიცეფალია
შიტცუს, ბულდოგისა და ბოქსიორის მსგავსად, ბოსტონ ტერიერიც ბრაქიცეფალია. ეს იმას ნიშნავს, რომ მასაც მოკლე ცხვირი და შევიწროებული ნესტოები აქვს. სწორედ ამიტომ, ოჯახის ეს მნიშვნელოვანი წევრები ტემპერატურის მატებასთან ერთად, სუნთქვის პრობლემებისა და ხვრინვისკენ არიან მიდრეკილი. მათი სუნთქვის პრობლემა წონის მატებასთან ერთად უარესდება. ამიტომ, ჯანსაღი საკვების მიღებას და წონის მონიტორინგს პრობლემის პრევენციისთვის განსაკუთრებული მნიშვნელობა აქვს.
თავის ქალის ბრაქიცეფალიური სტრუქტურის გამო, ბოსტონ ტერიერის დახურულ სივრცეში დიდხანს დატოვება განსაკუთრებით სახიფათოა. მოერიდეთ, აგრეთვე, მის მზეზე გასეირნებას. ჰაერის მაღალი ტემპერატურა და მზის პირდაპირი სხივები ჩვენი კომპანიონი ცხოველების ცხვირის ღრუში დიდი რაოდენობით ლორწოს დაგროვებას და სუნთქვის გაძნელებას იწვევს.
მუხლის ქუდის დისლოკაცია
მუხლის ქუდის დისლოკაცია მემკვიდრეობითი პრობლემაა. ამ პრობლემით გამოწვეული დისკომფორტის თავიდან ასაცილებლად რეგულარული ვარჯიში და ჯანსაღი წონის შენარჩუნებაა საჭირო.
მუხლის ქუდის დისლოკაციასთან დაკავშირებული მძიმე შემთხვევების გამოსასწორებლად შესაძლოა მაკორექტირებელი ოპერაცია გახდეს საჭირო. თუმცა, რეგულარული ვეტერინარული შემოწმებები დაავადების ადრეულ ნიშნებს აღმოაჩენს და შესაბამისი ზომების მიღების შესაძლებლობას პრობლემის წარმოშობის ადრეულ ეტაპზევე მოგცემთ.
კუშინგის სინდრომი
კუშინგის სინდრომი ჰორმონალური დარღვევაა, რომელსაც თირკმელზედა ჯირკვლების მიერ კორტიზოლის ჭარბი გამოყოფა იწვევს. დაავადების თავიდან ასაცილებლად წონის კონტროლს და დაბალანსებულ დიეტას განსაკუთრებული მნიშვნელობა აქვს. კუშინგის სინდრომის მკურნალობა დაავადების გამომწვევ მიზეზზეა დამოკიდებული და მედიკამენტების მიღებასთან ერთად შესაძლოა ქირურგიულ ჩარევასაც საჭიროებდეს.
კანის ინფექცია
ბოსტონ ტერიერისთვის დამახასიათებელი ნაოჭები ინფექციის განვითარების მნიშვნელოვანი რისკფაქტორია. ტენიანობისა და ბუნებრივი ეთერზეთების კანის ნაკეცებში დაგროვებამ შესაძლოა ისეთი უსიამოვნო სიმპტომები გამოიწვიოს, როგორიც სიწითლე, ქავილი ან წვაა. დერმატოლოგიური პრობლემების თავიდან ასაცილებლად ნაკეცების რეგულარულ წმენდას და სათანადოდ გაშრობას განსაკუთრებული მნიშვნელობა აქვს.
მემკვიდრეობითი კატარაქტა
კატარაქტა კომპანიონი ცხოველის მხედველობის თანდათანობით გაუარესებას იწვევს. ამ დროს ბროლი, რომელიც ჯანმრთელ თვალში გამჭვირვალეა, მონაცრისფრო ან რძისფერ შეფერილობას იძენს. თანდაყოლილ კატარაქტას, როგორც წესი, დედის ორსულობის დროს გადატანილი ინფექციური დაავადება ან სამშობიარო ტრავმა იწვევს.
მიუხედავად იმისა, რომ თანდაყოლილი დაავადებების მართვა ხშირად ჩვენი შესაძლებლობების მიღმაა, ვიტამინებითა და მინერალებით მდიდარი საკვების მიღება მნიშვნელოვნად გააუმჯობესებს თქვენი ოჯახის მნიშვნელოვანი წევრის თვალის ჯანმრთელობას. როგორც კომპეტენტურ მშობელს, გახსოვდეთ, რომ რეგულარული ვეტერინარული შემოწმება და თვალების მზის მავნე ზემოქმედებისგან დაცვა დაავადების ეფექტურად მართვის წინაპირობაა.
