ბარძაყისა და იდაყვის დისპლაზია
ბარძაყის დისპლაზია ბარძაყის ბურთისა და მენჯის სახსრის შეუთავსებლობას გულისხმობს. დაავადება ხშირად კოჭლობასა და მოძრაობის გართულებას იწვევს. ბარძაყის დისპლაზიისგან განსხვავებით, იდაყვის დისპლაზია, ლეკვობის დროს, იდაყვის არასწორად განვითარების გამო ჩნდება კომპანიონ ცხოველებში.
თუ კომპანიონი ცხოველის შესიებულ კიდურს ან გადაადგილებასთან დაკავშირებულ დისკომფორტს შეამჩნევთ, დაუყოვნებლივ ეწვიეთ ვეტერინარს. სპეციალისტის ცოდნა და გამოცდილება მკურნალობასთან დაკავშირებულ პროცესს მნიშვნელოვნად გაამარტივებს.
გლაუკომა
გლაუკომა თვალშიგა წნევის ზრდას და მხედველობის ნერვის დაზიანებას იწვევს. გლაუკომის განვითარების თავდაპირველ ეტაპზე კომპანიონი ცხოველების მხედველობა უმნიშვნელოდ უარესდება, თუმცა, დროთა განმავლობაში, შესაძლოა საქმე განუკურნებელ სიბრმავემდე მივიდეს.
მიუხედავად იმისა, რომ დაავადების პრევენცია რთულია, რეგულარული ვეტერინარული შემოწმება დაავადების ადრეულ გამოვლენასა და მკურნალობის პროცესის ეფექტურად წარმართვაში დაგეხმარებათ. ანტიოქსიდანტებით და ომეგა 3 ცხიმოვანი მჟავებით მდიდარი რაციონი თქვენი ოჯახის მნიშვნელოვან წევრის თვალის ჯანმრთელობას საგრძნობლად გააუმჯობესებს.
ბადურის პროგრესირებადი ატროფია
პროგრესირებადი ატროფია ბადურის თანდათანობით გადაგვარებას და მხედველობის დაკარგვას იწვევს. აღნიშნული დაავადება კომპანიონ ცხოველებს მემკვიდრეობით გადაეცემათ. ბადურის ჯანმრთელობის შენარჩუნებაში თვალის რეგულარული გამოკვლევები და ანტიოქსიდანტებით მდიდარი დიეტა დაგეხმარებათ.
ოჯახის მნიშვნელოვანი წევრის შეძენამდე ყურადღებით გამოიკვლიეთ მისი გენეტიკა და დარწმუნდით, რომ თქვენს მომავალ კომპანიონს მხედველობასთან დაკავშირებული პრობლემებისადმი გენეტიკური მიდრეკილება არ აქვს.
იქთიოზი
იქთიოზი მემკვიდრეობითი დაავადებაა, რომელიც კანის ხორკლიანი ქერცლით დაფარვას და მის გარქოვანებას იწვევს. დაავადების გამომწვევი მიზეზი უცნობია, თუმცა, შესაბამისი კვალიფიკაციის მქონე ადამიანები A ვიტამინის უკმარისობას მიიჩნევენ მისი განვითარების მაპროვოცირებელ ფაქტორად.
იქთიოზის რამდენიმე ფორმას განასხვავებენ ერთმანეთისგან. თუმცა, ჩვეულებისამებრ, დაავადების სიმპტომები კანის სიმშრალეს, აქერცვლას და ამის გამო განვითარებულ ინფექციებს მოიცავს. დაავადების ეფექტურად სამართავად ვეტერინართან მჭიდრო თანამშრომლობა და მის მიერ დანიშნული სპეციალური ჰიგიენური საშუალებების გამოყენებაა საჭირო.
შებერილობა
შებერილობა ადამიანებისთვის უწყინარი პრობლემაა, თუმცა, ძაღლებში ამ მდგომარეობამ შესაძლოა ფატალური შედეგიც კი გამოიწვიოს. პრობლემის პრევენციისთვის, მნიშვნელოვანია ყურადღება ისეთ სიმპტომებს მიაქციოთ, როგორიც ღებინება, შესიებული მუცელი ან ჭარბი ნერწყვდენაა. ნებისმიერი სიმპტომის გამოვლენისთანავე, სასურველია დაუყოვნებლივ დაუკავშირდეთ თქვენს ვეტერინარს.
შებერილობის თავიდან ასაცილებლად, თქვენი ერთგული კომპანიონის ყოველდღიური რაციონი მინიმუმ ორ კვებაზე გაანაწილეთ და უპირატესობა ამაღლებული ცენტრის მქონე სპეციალურ თასებს მიანიჭეთ. მათ შეძენას თქვენს სახლთან ახლოს მდებარე ნებისმიერ ზოო მაღაზიაში შეძლებთ.
ადისონის დაავადება
ადისონის დაავადება ვითარდება მაშინ, როდესაც თირკმელზედა ჯირკვლები საკმარისი რაოდენობით ვერ გამოიმუშავებენ კორტიზოლს. ადისონის დაავადებას მადის დაქვეითება და ბეწვის ცვენა ახასიათებს. დაავადებით გამოწვეული სიმპტომების მართვისა და ცხოვრების ხარისხის გასაუმჯობესებლად, ვეტერინარები ხშირად ჰორმონალურ თერაპიას მიმართავენ.
მემკვიდრეობითი კატარაქტა
კატარაქტა კომპანიონი ცხოველის მხედველობის თანდათანობით გაუარესებას იწვევს. ამ დროს ბროლი, რომელიც ჯანმრთელ თვალში გამჭვირვალეა, მონაცრისფრო ან რძისფერ შეფერილობას იძენს.
თანდაყოლილ კატარაქტას, როგორც წესი, ორსულობის დროს გადატანილი ინფექციური დაავადება ან სამშობიარო ტრავმა იწვევს. როგორც კომპეტენტურ მშობელს, გახსოვდეთ, რომ რეგულარული ვეტერინარული შემოწმება და კომპანიონი ცხოველის თვალების მზის მავნე ზემოქმედებისგან დაცვა დაავადების ეფექტურად მართვის წინაპირობაა.
