გერმანული პინჩერი უსაზღვრო ენერგიის მქონე, აქტიური ჯიშია. ოჯახის ეს მნიშვნელოვანი წევრები გონიერებით გამოირჩევიან და, როგორც წესი, ბრძანებების დასწავლაც იოლად შეუძლიათ. ფიზიკური და გონებრივი კეთილდღეობისთვის მათ ყოველდღიური ვარჯიში ესაჭიროებათ. ველოსიპედით სიარული, სეირნობა, სირბილი, ლაშქრობა და ენერგიული თამაშები, მათი აქტიური ცხოვრების მხარდასაჭერად რეკომენდირებული აქტივობების მცირე ჩამონათვალია. 

თუ თქვენს ოთხფეხა მეგობართან ერთად გადაწყვეტთ სეირნობას, ეცადეთ შეძლებისდაგვარად ხშირად შეცვალოთ მარშრუტი. ასე, ცნობისმოყვარე გერმანულ პინჩერს კიდევ უფრო მეტად დააინტერესებთ. გახსოვდეთ, უმოქმედობის შემთხვევაში, შესაძლოა გერმანული პინჩერი ჰიპერაქტიური გახდეს და პრობლემური ქცევები განუვითარდეს. 

გერმანული პინჩერები, როგორც წესი, მოსიყვარულე კომპანიონები არიან. თუმცა, თუ საფრთხეს იგრძნობენ და სათანადოდ  სოციალიზებული არ იქნებიან, შესაძლოა უცხო ადამიანების გარემოცვაში აგრესია გამოავლინონ. ამის თავიდან ასაცილებლად, დარწმუნდით, რომ განვითარების ადრეულ ეტაპზე თქვენს ძაღლს სათანადო სიხშირით აქვს შეხება სხვა შინაურ ცხოველებთან, განსაკუთრებით კატებთან. 

წვრთნა ადრეულ ასაკში დაიწყეთ და კარგი ჩვევების სწავლებისას მხოლოდ ჯილდოზე დაფუძნებული, წვრთნის პოზიტიური მეთოდები გამოიყენეთ. გაითვალისწინეთ, შესაძლოა უხეშმა მოპყრობამ თქვენსა და თქვენს ოთხფეხა მეგობარს შორის უთანხმოება გამოიწვიოს. 

კატარაქტა 

კატარაქტა კომპანიონი ცხოველის მხედველობის თანდათანობით გაუარესებას იწვევს. ამ დროს ბროლი, რომელიც ჯანმრთელ თვალში გამჭვირვალეა,  მონაცრისფრო ან რძისფერ შეფერილობას იძენს. თანდაყოლილ კატარაქტას, როგორც წესი, დედის ორსულობის დროს გადატანილი ინფექციური დაავადება ან სამშობიარო ტრავმა იწვევს. 

მიუხედავად იმისა, რომ თანდაყოლილი დაავადებების მართვა ხშირად ჩვენი შესაძლებლობების მიღმაა, C და E ვიტამინებით მდიდარი საკვების მიღება მნიშვნელოვნად გააუმჯობესებს თქვენი ოჯახის მნიშვნელოვანი წევრის თვალის ჯანმრთელობას. როგორც კომპეტენტურ მშობელს, გახსოვდეთ, რომ რეგულარული ვეტერინარული შემოწმება და თვალების მზის მავნე ზემოქმედებისგან დაცვა დაავადების ეფექტურად მართვის წინაპირობაა. 

გერმანული პინჩერის კვებისას მნიშვნელოვანია შევარჩიოთ საკვები, რომელიც სრულად დააკმაყოფილებს ჯიშის ენერგეტიკულ მოთხოვნილებებს. ოჯახის ამ მნიშვნელოვან წევრებს მაღალი ხარისხის ცილებით მდიდარი საკვები ესაჭიროებათ. 

ჩვეულებისამებრ, ზრდასრულ გერმანულ პინჩერს დღეში ორჯერ (დილით და ღამით) ესაჭიროება კვება. თუმცა, თუ გრაფიკი ამის შესაძლებლობას მოგცემთ, შეგიძლიათ კომპანიონ ცხოველს მცირე პორციებით უფრო ხშირად გაუმასპინძლდეთ. აქტიური ცხოვრების წესის მიუხედავად, გადაჭარბებულმა კვებამ შესაძლოა სიმსუქნე და სახსრების პრობლემები გამოიწვიოს. 

ზრდის პროცესისთვის საჭირო სასარგებლო ნივთიერებებზე მაღალი მოთხოვნის გამო, ლეკვებს უფრო ხშირად უნდა გავუმასპინძლდეთ. იმუნური სისტემის გასაძლიერებლად და გულ-სისხლძარღვთა სისტემის ჯანმრთელობის უზრუნველსაყოფად, მათ სრულად დაბალანსებული პრემიუმ მშრალი საკვები ესაჭიროებათ. 

გერმანული პინჩერის ისტორია მე-18 საუკუნით თარიღდება. თავდაპირველად, ჯიშის როლი ფერმების დაცვითა და მავნებლებზე ნადირობით შემოიფარგლებოდა. გერმანულ პინჩერს ამ მოვალეობების შესასრულებლად საჭირო ყველა თვისება ჰქონდა. გონიერებამ, სისწრაფემ, მოქნილმა მოძრაობებმა და უსაზღვრო  ენერგიამ პინჩერი ოჯახის მნიშვნელოვან წევრად აქცია. 

მე-19 საუკუნის დასაწყისში გერმანულმა პინჩერმა ევროპის მასშტაბით გაითქვა სახელი. თუმცა, მე-20 საუკუნის შუა ხანებში, ჯიშის წარმომადგენელთა რიცხვი მნიშვნელოვნად შემცირდა. ამის მიუხედავად, ვერნერ იუნგის მსგავსი მიზანდასახული სელექციონერების წყალობით, გერმანული პინჩერი ხელახალი მოშენების გზით გადაურჩა გადაშენებას. 

არსებობს მცდარი მოსაზრება, რომ გერმანული პინჩერი  დობერმანის მინიატურული ვერსიაა. თუმცა, ვიზუალური მსგავსების მიუხედავად, ოჯახის ეს მნიშვნელოვანი წევრები გენეტიკურად სულაც არ არიან ერთმანეთთან დაკავშირებული.