თუ ნაკლებად აქტიური ცხოვრების წესით გამოირჩევით და ეძებთ მოსიყვარულე კომპანიონს, რომელიც ყოველდღიურ ვარჯიშს არ საჭიროებს, მაშინ პეკინესი საუკეთესო არჩევანია თქვენთვის. ოჯახის ამ მნიშვნელოვანი წევრების მთავარი ინტერესი მხოლოდ ლაღი და კომფორტული ცხოვრებაა. 

ოჯახის ეს მნიშვნელოვანი წევრები გონიერებით გამოირჩევიან და კომპანიონი ადამიანების მიმართ გრძნობების გამოხატვასაც არასდროს ერიდებიან. საბედნიეროდ, მათი ეს დამოკიდებულება სხვა კომპანიონ ცხოველებზეც ვრცელდება. პეკინესი არც ბავშვებთან თამაშზე ამბობს უარს, თუმცა, ერთი პირობით – მათდამი უხეშად მოპყრობა დაუშვებელია. 

მიუხედავად იმისა, რომ პეკინესი შინ საკმაოდ აქტიურია, ხანგრძლივ ფიზიკურ დატვირთვას სულაც არ საჭიროებს. ხანმოკლე სეირნობა მისთვის შესაფერისი, იდეალური აქტივობაა. თუმცა, თუ პეკინესის ყოლას აპირებთ, უნდა იცოდეთ, რომ მისთვის კარგი მანერების სწავლა განსაკუთრებულ მოთმინებასა და კრეატიულობას მოითხოვს. გახსოვდეთ, ამ პროცესში, მთავარი წახალისებაა – გამოიჩინეთ ნაზი, მაგრამ, ამავდროულად, მტკიცე მიდგომა და მითითების შესრულებისთანავე შეაქეთ ისინი. 

ბრაქიცეფალია 

ბოქსერის, ბულდოგისა და მოპსის მსგავსად, პეკინესიც ბრაქიცეფალია, რაც იმას ნიშნავს, რომ მასაც მოკლე ცხვირი და შევიწროებული ნესტოები აქვს. სწორედ ამიტომ, ოჯახის ეს მნიშვნელოვანი წევრები ტემპერატურის მატებასთან ერთად, სუნთქვის პრობლემებისა და ხვრინვისკენ არიან მიდრეკილი. მათი სუნთქვის პრობლემა წონის მატებასთან ერთად უარესდება. ამიტომ, ჯანსაღი საკვების მიღებას და წონის მონიტორინგს პრობლემის პრევენციისთვის განსაკუთრებული მნიშვნელობა აქვს.

თავის ქალის ბრაქიცეფალიური სტრუქტურის გამო, პეკინესის დახურულ სივრცეში დიდხანს დატოვება განსაკუთრებით სახიფათოა. ჰაერის მაღალი ტემპერატურა და მზის პირდაპირი სხივები ჩვენი კომპანიონი ცხოველების ცხვირის ღრუში დიდი რაოდენობით ლორწოს დაგროვებას და სუნთქვის გაძნელებას იწვევს.  

კანის ინფექცია

ინფექცია შესაძლოა კანის გამოშრობამ, საფარველის დაბინძურებამ და იმუნიტეტის დაქვეთებამ გამოიწვიოს. კანის ინფექციების თავიდან აცილებაში ჰიგიენის დაცვა, სუფთა საცხოვრებელი გარემოს უზრუნველყოფა, სასარგებლო ნივთიერებებით მდიდარი საკვები და ცხოვრების ჯანსაღი წესი დაგეხმარებათ.  

მუხლის ქუდის დისლოკაცია

მუხლის ქუდის დისლოკაცია მემკვიდრეობითი პრობლემაა. ამ პრობლემით გამოწვეული დისკომფორტის თავიდან ასაცილებლად რეგულარული ვარჯიში და ჯანსაღი წონის შენარჩუნებაა საჭირო. უცხიმო ხორცის, კვერცხის, მაღალი ხარისხის ცილის, კალციუმისა და ფოსფორის დაბალანსებულად მიღება თქვენი ოჯახის მნიშვნელოვან წევრს კუნთების სწორად განვითარებაში დაეხმარება. 

მუხლის ქუდის დისლოკაციასთან დაკავშირებული მძიმე შემთხვევების გამოსასწორებლად შესაძლოა მაკორექტირებელი ოპერაციაც გახდეს საჭირო. თუმცა, რეგულარული ვეტერინარული შემოწმებები მუხლის ქუდის დისლოკაციის ადრეულ ნიშნებს აღმოაჩენს და შესაბამისი ზომების მიღების შესაძლებლობას დაავადების განვითარების ადრეულ ეტაპზე მოგცემთ.

ენტროპიონი 

ენტროპიონი ქუთუთოს ჩაბრუნებას და წამწამების თვალის ზედაპირთან სიახლოვეს იწვევს. ამან შესაძლოა თვალის კაკლის დაზიანება და წყლულის წარმოქმნა გამოიწვიოს. ენტროპიონი ადამიანების მსგავსად ცხოველებშიც ცრემლდენასა და სიწითლეს იწვევს. მდგომარეობის შესამსუბუქებლად ვეტერინარები ხშირად ხელოვნურ ცრემლსა და დამატენიანებელ მალამოებს იყენებენ. 

მშრალი თვალის სინდრომი 

თვალის სიმშრალე წყლის არასაკმარისი რაოდენობით მიღებამ შეიძლება გამოიწვიოს. ცრემლის წარმოქმნის სირთულე თვალის გაღიზიანებას და მხედველობასთან დაკავშირებულ პრობლემებს იწვევს. თვალის პრობლემების მაპროვოცირებელ გარემოებად ხშირად კლიმატიც გვევლინება. მაგალითად, თუ ზაფხულის გატარებას თქვენს ოთხფეხა მეგობართან ერთად, ზღვისპირა ქალაქში დააპირებთ, სასურველია განსაკუთრებული სიფრთხილე გამოიჩინოთ და თქვენი კომპანიონი ცხოველი შეძლებისდაგვარად მოარიდოთ სიცხეს.

განსაკუთრებული სიფრთხილე თვალის დაავადებისთვის დამახასიათებელი ისეთი ადრეული სიმპტომების მიმართ გამოიჩინეთ, როგორიც სიწითლე და ცრემლდენაა. სასურველია ამ სიმპტომების გამოვლენისთანავე ესტუმროთ ვეტერინარს. როგორც კომპეტენტურმა მშობელმა, მნიშვნელოვანია გაითვალისწინოთ ისიც, რომ თვალებზე ყოველდღიურ ზრუნვას და სპეციალურად ძაღლებისთვის განკუთვნილი ჰიგიენური საშუალებებით მათ რეგულარულ წმენდას დაავადებების პრევენციისთვის არსებითი მნიშვნელობა აქვს.

საუკეთესო შემთხვევაში, პეკინესი მაღალი ხარისხის ძაღლის საკვებით უნდა გამოვკვებოთ. თუმცა, ვინაიდან განვითარების სხვადასხვა ეტაპზე, კომპანიონ ცხოველებს განსხვავებული ნუტრიციოლოგიური საჭიროებები აქვთ, მათთვის შესაფერისი საკვების შერჩევისას განსაკუთრებული ყურადღება გვმართებს. მაგალითად, ლეკვობის ასაკში, ოჯახის ამ მნიშვნელოვან წევრებს სპეციალურად ლეკვებისთვის შექმნილი საკვებით უნდა გავუმასპინძლდეთ. 

ჯანმრთელი წონის შესანარჩუნებლად და ჭარბწონიანობის თავიდან ასაცილებლად, ჩვეულებისამებრ, ზრდასრული ძაღლების გამოკვება 10-12 საათიანი შუალედით, დღეში ორჯერაა რეკომენდირებული. თუმცა, კვების გრაფიკი ყოველ ინდივიდუალურ შემთხვევაში, თქვენი პეკინესის ასაკზე, წონაზე, აქტივობასა და ჯანმრთელობის მდგომარეობაზეა დამოკიდებული. 

სანამ ნუტრიციოლოგს მიმართავთ და უშუალოდ თქვენი კომპანიონი ცხოველის საჭიროებების შესაბამისად გაწერთ გრაფიკს, გირჩევთ, საკვების შეფუთვაზე დატანილ ინფორმაციას გაეცნოთ და სწორედ ამაზე დაყრდნობით გადაწყვიტოთ როდის და რა რაოდენობის საკვებით გაუმასპინძლდებით თქვენი ოჯახის მნიშვნელოვან წევრს. 

გახსოვდეთ, სხვა ძაღლების მსგავსად, პეკინესის ჯიშის წარმომადგენლებიც ხშირად არიან მიდრეკილი ჭარბი წონის მატებისკენ, ამიტომ ეცადეთ არასდროს დატოვოთ ზედმეტი საკვები მათ თასში. ნუ დაივიწყებთ ნურც კომპანიონი ცხოველებისთვის საფრთხისშემცველ ისეთ საკვებ პროდუქტებს, როგორიც შოკოლადი, ყურძენი, ხახვი, ნიორი და ავოკადოა. მათი მცირე რაოდენობით მიღებაც კი ტოქსიკური შეიძლება აღმოჩნდეს ჩვენი ოჯახის მნიშვნელოვანი წევრებისთვის. 

პეკინესის ჯიში დაახლოებით 2000 წლის წინ მოევლინა სამყაროს. ამ პერიოდში, ჩინეთი ბუდისტურ ქვეყანად იქცა, თუმცა ბუდიზმის მთავარი სიმბოლო, ლომი, რომელიც, ლეგენდის თანახმად, ბუდამ მოათვინიერა და ერთგულ მსახურად აქცია, ჩინეთში არ არსებობდა. ამ დანაკლისის შესავსებად, ბუდისტმა ბერებმა შერჩევითი მოშენების გზით შექმნეს საკუთარი მინიატურული ლომი პეკინესის სახით. 

ოჯახის ამ მნიშვნელოვანი წევრების ყოლის უფლება მხოლოდ იმპერატორს ჰქონდა. სიკვდილით ისჯებოდა ყველა, ვინც მათ მოპარვას გადაწყვეტდა.

1860 წელს, ოპიუმის ომებში მონაწილე ბრიტანეთი პეკინში შეიჭრა და იმპერატორის სასახლეს მიაშურა ძარცვის მიზნით. ჯარისკაცებმა იმპერატორის დეიდის ოთახში ხუთი პეკინესი აღმოაჩინეს და მათი დედოფალი ვიქტორიასთვის წაყვანა გადაწყვიტეს. ოჯახის ამ მნიშვნელოვანმა წევრებმა ბრიტანეთში ჩასვლისთანავე დაიპყრეს დედოფლის გული და სულ მალე ყველასთვის სასურველ კომპანიონ ცხოველებად იქცნენ.